11
Okwikiriza
1Okuba n’okwikiriza n’okukakasa ng’ebyo bye tusuubira birituukirira, era n’okukakasa ng’ebyo bye tutabona bwene biriyo. 2Okwikiriza n’okwaleetera abantu ab’eira okusiimibwa Katonda.
3Okwikiriza n’okutusobozesa okutegeera ng’ensi yatondebwa na kibono kya Katonda kyaba nti ebiboneka byakolebwa okuva mu ebyo ebitaboneka.11:3: Mainh 1:1; Zab 33:6, 9; Yoa 1:3
4Okwikiriza n’okwasobozesa Abeli okughaayo ye Katonda omusengo omukalamu ogusinga ogwa Kaini, era mwe yabita Katonda okumubala okuba omutuufu, kuba Katonda yasiima ebirabo bye. Era olw’okwikiriza kwe waire yafa, akaayogera.11:4: Mainh 4:3-10
5Okwikiriza n’okwaleetera Enoka okutwalibwa mu igulu nga tasoose kufa, era ghazira yamubonaku kuba Katonda yamutwala. Bwe yali ng’akaali kutwalibwa kyakakasibwa nga yasiimya Katonda. 6Ghazira aghanga kusiimya Katonda ng’azira kwikiriza. Kuba aja ye Katonda ateekwa okwikiriza nga Katonda aligho, era ng’agha empeera abo abamunoonia.
7Okwikiriza n’okwaleetera Noa okuwulira Katonda, bwe yamulabula ku bintu ebyali bikaali kuboneka, yaazimba eryato eryawonia mwene n’amaka ge. Olwa kino yaasalira ensi omusango, era mwene yaabalibwa okuba omutuufu olw’okwikiriza.11:7: Mainh 6:13-22
8Okwikiriza n’okwaleetera Aburahamu okuwulira Katonda bwe yamweta ave ku butaka, aje mu nsi ye yali aja okugheebwa ng’ekisuubizo, era yaaja nga taidhi y’aja.11:8: Mainh 12:1-5 9Era okwikiriza n’okwamusobozesa okuba ng’omuvaghala mu nsi eyamusuubizibwa. Yaasulanga mu ntindi ni Isaaka, ni Yakobo, boona abaasuubizibwa.11:9: Mainh 35:27 10Kuba Aburahamu yali ali kwesumba ekibuga Katonda kye yategeka era kye yazimba, ekiri n’omusingi omugumu.
11Okwikiriza n’okwasobozesa Sara okutoola enda waire yali ng’akairiighe okubitirira, kuba yaikiriza ng’eyamusuubiza mwesigwa.11:11: Mainh 18:11-14; 21:2 12Kale waire Aburahamu yali omukaire awoireyo, yavaamu abaidhukulu kamaala inho ng’oti n’emuunienie edh’oku igulu era ng’oti musenho ogw’oku mbali okw’enhandha ogutabalika.11:12: Mainh 15:5; 22:17; 32:12
13Abo boonaboona baafiira mu kwikiriza nga bakaali kufuna ebyo Katonda bye yabasuubiza, aye nga babirengerera ghala era nga babisangaalira, era nga baatula nga bwe baali abavaghala era abanoonia obubudamo ku nsi kuno.11:13: Mainh 23:4; 1 Byom 29:15; Zab 39:12 14Kuba aboogera batyo booleka bukalamu nga bwe bali kwagala obutaka obwaibwe. 15Era nguli baali badhuuba ku nsi ye baavaamu, bandighanze okwirayo. 16Aye mperaano kyali nti baali bali kwegomba obutaka obusinga obukalamu n’obwo obw’omu igulu. Kale Katonda kyava tagemwa nsoni kwetebwa Katonda waibwe, kuba yabategekera ekibuga.
17Okwikiriza n’okwasobozesa Aburahamu, Katonda bwe yamuleba, okughaayo Isaaka omwana we omulala ati bedengedenge abe omusengo. Aburahamu oyo, Katonda yali amaze okumusuubiza ati:11:17: Mainh 22:1-14 18“Mu Isaaka mw’olifunira abaidhukulu.”11:18: Mainh 21:12 19Aburahamu yamanha nga Katonda asobola okuzuukiza abafu kyaba ng’oti Katonda yamwiriza Isaaka ng’ali ng’aviire mu bafu.
20Okwikiriza n’okwaleetera Isaaka okusabira Yakobo ni Esau babe ba nkabi mu biseera ebyali bija okwidha.11:20: Mainh 27:27-29, 39-40
21Okwikiriza n’okwaleetera Yakobo, bwe yali ng’ali kumpi okufa, okusabira abaana ba Yosefu mulala mulala babe ba nkabi, ng’akotaime ku mwigo gwe era ng’asinza Katonda.
22Okwikiriza n’okwaleetera Yosefu, bwe yali ng’ali kumpi okufa, okwogera ku ky’Abaisiraeli okuva mu Misiri, era n’okubagalagira kye babe bakolere amagumba ge.11:22: Mainh 50:24-25; Kuv 13:19
23Okwikiriza n’okwaleetera abazaire ba Musa okumugisa okumala emyezi esatu ng’amaze okuzaalibwa kuba baamubona nga mwana aboneka bulungi, baaloba kutya kudheemera kiragiro kya kyabazinga.11:23: Kuv 2:2; 1:22
24Okwikiriza n’okwaleetera Musa ng’amaze okukula, okuloba okwetebwanga omwana wa mughala wa kyabazinga.11:24: Kuv 2:10-12 25Yasiima okudaazibwadaazibwa ghalala n’abantu ba Katonda okusinga okuba mu isanhu ery’ekibi ery’akaseera obuseera. 26Yabona nga okuvumwa olwa Kurisito kya mughendo inho okusinga obukombe bw’e Misiri, kuba yalowoozanga ku mpeera ye yali aja okugheebwa.
27Okwikiriza n’okwaleetera Musa okuva e Misiri, n’atatya kiruyi kya kyabazinga ng’ali ng’oti abonera irala Katonda ataboneka, yaaguma.
28Okwikiriza n’okwamuleetera okutaagho Ekibinuko ky’Okubitizibwa, yaamansira omusaayi, olwo Namuzisa alobe kwita baana baibwe abalenzi ababeri.11:28: Kuv 12:21-30
29Okwikiriza n’okwasobozesa Abaisiraeli okubita mu Nhandha Emyufu nga bali ng’oti babita ku bukalu, aye Abamisiri bwe baagezaaku baadimira.11:29: Kuv 14:21-31 30Okwikiriza n’okwaleetera ebimante by’ekibuga Yeriko okugwa oluvainhuma olw’Abaisiraeli okubyezungulula okumala enaku omusanvu.11:30: Yosh 6:12-21 31Okwikiriza n’okwawonia malaaya Rahabu n’atazikirira n’abo abataikiriza, kuba yasangaalira abakeesi.11:31: Yosh 2:1-21; 6:22-25
32Nkobe ki era ndeke ki? Ekiseera kiidha kumpwaku bwe nnaayogera ku Gideoni, Baraki, Samusoni, Yefutha, Daudi, Samueli, ni ku balanzi.11:32: Balam 6—8; 4—5; 13—16; 11—12; 1 Sam 16:1—1 Bakyab 2:11; 1 Sam 1—12; 15; 16:1-13 33Okwikiriza n’okwabasobozesa okughangula bakyabazinga, baakola ekituufu era baafuna ebyo Katonda bye yabasuubiza. Baalobera empologoma okwasama,11:33: Dan 6:1-27 34baazikiza omuliro ogw’amaani, era baawona okwitibwa n’empiima. Baafuna amaani okuva mu bunafu, baafuuka balwani ba ntalo abaziramu ntete, era baabinga amagye ag’abavaghala,11:34: Dan 3:1-30 35n’abakazi baagheebwa abantu baibwe abazuukiziibwa. Abandi tibaaganha kulekulibwa, baitibwa basobole okuzuukirira obulamu obusinga bukalamu.11:35: 1 Bakyab 17:17-24; 2 Bakyab 4:25-37 36Abandi baabakiina, baabakuba, baabasiba ku ndhegere era baabata mu ikomera.11:36: 1 Bakyab 22:26-27; 2 Byom 18:25-26; Yer 20:2; 37:15; 38:6 37Baabakuba amabaale baabasalamu ghabiri n’emisumeeni, baitibwa n’empiima. Baabitanga nga bavaire amawu g’entaama n’ag’embuzi, nga bazira kantu, nga badaagadaaga, baabisibwa bubi,11:37: 2 Byom 24:21 38era nga n’ensi tibagibonamu muganhulo. Baatambulatambulanga eyo batyo mu malungu ni mu nsozi ng’oti n’abanoonia obubudamo, nga basula mu mpuku ni mu biina.
39Abo boonaboona waire Katonda yabasiima olw’okwikiriza kwaibwe, aye tibaafuna ebyo bye yasuubiza. 40Kuba Katonda yatutegekera ekisinga obukalamu, abo balobe kufuulibwa batuukiriire okutuusa nga twena tubeeyimbyeku.