EKITABO KYA MUSA EKISOOKA EKYETEBWA
AMAINHAMA
Enhandhula
Ekitabo kino ekyetebwa Amainhama, kiinhonhola okutondebwa okw’ensi, okw’ebintu, n’okw’abantu. Kiinhonhola n’ensambo ekibi n’okudaagadaaga ye byaidhamu ku nsi, era n’ensambo Katonda y’akolaganamu n’abantu.
Ekitabo kino kighanga okwawulwamu ebimega ebikologho bibiri.
Ekimega ekisooka kirimu Enkenga 1-11: Okutondebwa kw’ensi, n’ebyafaayo eby’abantu abaasooka. Muno n’omuli ebigema ku Adamu ni Eva, Kaini ni Abeli, Noa, amaadhi ag’omwidhuzo, n’omunaala ogw’e Babeli.
Ekimega ekyokubiri kirimu, Enkenga 12-50: Ebyafaayo ebya badhaadha b’Abaisiraeli abaasooka. Asooka ni Aburahamu, amanhiibwa einho olw’okwikiriza n’obuwulize bye yali nabyo eri Katonda. Okwo kwairaku mutabane we Isaaka, ni mwidhukulu we Yakobo era ayetebwa Isiraeli, ni batabane ba Yakobo oyo eikumi n’ababiri abaasimukamu ebika bya Isiraeli eikumi n’ebibiri. Ku batabane ba Yakobo abo eikumi n’ababiri, Yosefu n’asinga okwogerwaku era n’ebyo ebyaviiraku Yakobo ni batabane be era n’ab’omu maka gaibwe okusenga e Misiri.
Waire ng’ekitabo kino kyogera ku byafaayo eby’abantu, aye ensonga enkulu einho, n’okwogera ku ebyo Katonda bye yakola. Ekitabo kitoolera nga kikakasa nti Katonda yatonda ensi, era kyamaliriza nga kyoleike nti Katonda akaayongera okulumirwa abantu be. Mu kitabo kyonakyona Katonda n’omutwe omukulu: alamula yaabonereza aboonooni, akulemberamu era yaabeera abantu be, yaabakolera ebyamagero.
Ekitabo kino kyaghandiikibwa okwoleka ebyafaayo eby’okwikiriza okw’abantu, era n’okwongera okukuuma okwikiriza okwo, kube nga kukaaja mu maiso.
Ebirimu nga bwe biiraganwaku
Okutondebwa okw’ensi n’okw’abantu 1:1—2:25
Ekibi n’okudaagadaaga biidha mu nsi 3:1-24
Ebyaligho okuva ku Adamu okutuuka ku Noa 4:1—5:32
Noa n’amaadhi ag’omwidhuzo 6:1—10:32
Omunaala ogw’e Babeli 11:1-9
Ebyaligho okuva ku Shemu okutuuka ku Aburahamu 11:10-32
Aburahamu, Isaaka, ni Yakobo 12:1—35:29
Baidhukulu ba Esau 36:1-43
Yosefu ni baganda be 37:1—45:28
Abaisiraeli nga bali e Misiri 46:1—50:26