15
Katonda akola endagaano ni Aburamu
1Ebyo nga bimaze okubaagho, Aburamu yaawulira Musengwa Katonda mu kirooto, ng’amukoba ati: “Aburamu, otatya. Nze ndidha kubanga ngabo yo nkuwonie ebizibu, era ndidha kukugha empeera nnene.” 2Aye Aburamu yairamu ati: “Wo Musengwa Katonda, kiki ky’onampa ni kingasa nga nkaasigaire nga nziraku mwana era ng’omusika w’endhu yange ni Eliezeri ow’e Damasiko? 3Bona, tompaire izaire era omwiru eyazaalirwa mu ndhu yange, n’aja okuba omusika wange.” 4Agho yaawulira nga Musengwa Katonda akoba ati: “Omwiru oyo Eliezeri ti n’aidha okuba omusika wo, aye omwana wo mwenemwene n’alikusikira.”15:4: Mainh 17:16, 21; 18:10; 21:2 5Yaamufulumya kuliya, yaakoba ati: “Lingirira ku igulu, obale emuunienie edhiriku, oba nga osobola okudhibala.” Agho yaamukoba ati: “N’abaidhukulu bo batyo bwe baliba obungi.”15:5: Rom 4:18; Heb 11:12 6Aburamu yaikiriza Musengwa Katonda kye yamukoba, era kino kyaleetera Musengwa Katonda okumutwala nga muntu mutuufu.15:6: Rom 4:3, 9, 22, 23; Gal 3:6
7Yaamukoba ati: “Ninze Musengwa eyakutoola mu Uri ensi ey’Abakaladea, naakuleeta okukugha ensi eno.” 8Aye Aburamu yaamubuuza ati: “Wo Musengwa Katonda, nnaamanhira ku ki ng’ensi eno eidha kuba yange?” 9Musengwa Katonda yaamwiramu ati: “Ndeetera ente ey’emyaka esatu, n’embuzi ey’emyaka esatu, n’entaama enume yoona nga ya myaka esatu, era n’enjiibwa, n’eighemba eito.” 10Aburamu yaaleeta ensolo edho ye Katonda, yaadhibaagamu ghabiri, yaata ebitundu ebyo ku ndhuyi ibiri ng’abirinzagainia. Aye enhonhi tiyadhibaagamu ghabiri. 11Ensega dhaidha okugwa ku mamba eyo, aye Aburamu yaadhibinga.
12Endhuba bweyali ng’eri kugwa, enzikiiza eri bedimudimu yaagema, endoolo enhingi einho era n’entiisa byamugema. 13Musengwa Katonda yaamukoba ati: “Baidhukulu bo balija mu nsi etali yaibwe, baaba eyo nga bairu, era baanhigirizibwa inho okumala emyaka bikumi bina.15:13-14: Bik 7:6-7 14Aye ndibonereza eighanga eryo eriribafuula abairu, era baliva mu ighanga eryo nga bafunie n’ebintu kamaala. 15Aye iwe olija eri badhaadha bo ng’oli miraala oliziikibwa ng’oghangaaliire irala bukalamu. 16Mu nsi eyo balibaayo ghaabitagho ense ina memale baira ghano, kuba tija kubingagho Bamori okutuusa nga beeyongeire okuba ababi einho okugwanira okubonerezebwa.”
17Endhuba bweyamala okugwa enzikiiza ng’egemye, mangu ago agho ghaabonekagho olugyo oluliku amanda nga gali kunioka omwosi, era ghaabonekagho n’engada edhiri kwaka; bino byombi byabita ghagati gh’ebitundu bire eby’ensolo. 18Ku lunaku olwo, Musengwa Katonda yaakola endagaano ni Aburamu. Yaakoba ati: “Baidhukulu bo mbaghaire ensi eno yoonayoona okuva ku nsalosalo ya Misiri okutuuka ku mwiga omukologho Eufurate.15:18: Mainh 17:2, 7, 9-14, 21 19Omwo nga mw’otwaliire n’ensi dhino: ey’Abakeni, ey’Abakenizzi, ey’Abakademoni, 20ey’Abahitti, ey’Abaperizzi, ey’Abarefa, 21ey’Abamori, ey’Abakanaani, ey’Abagirigashi, n’ey’Abayebusi.”