EKITABO KYA
EZEKIELI
Enhandhula
Omulanzi Ezekieli yaligho mu Babiloni nga munhage, mu biseera Yerusalemu ghe kyabeera nga kikaali kugwa ni mu biseera nga kimaze okugwa, mu mwaka ogwebikumi ebitaanu n’ekinaana n’omukaaga (586) nga Kurisito akaali kwidha. Obukwenda bwe bwali bwa bantu abaali mu bunhage e Babiloni mu biseera ebyo, n’abo abaali basigaire mu Yerusalemu. Ekitabo kya Ezekieli kisoboka okwawulwamu ebitundu ebikulu mukaaga:
Ekitundu ekisooka kirimu nga Katonda ayeta Ezekieli abe omulanzi. Ekitundu ekyokubiri kyabaamu obukwenda obulabula abantu nga Katonda bw’aja okubasalira omusango aleetere ni Yerusalemu okuzikirizibwa, kigwe. Ekitundu ekyokusatu kyabaamu obukwenda obuva ye Musengwa Katonda nga bukoba nga bw’aja okusalira amaghanga ag’endhawulo omusango, agaatuntuzanga abantu be ni gabaleeteranga n’okudaaliima. Ekitundu ekyokuna kigumya Abaisiraeli oluvainhuma olw’okugwa kwa Yerusalemu, era kyabasuubiza ebirungi Katonda by’alibagha eyo ye bwidha. Ekitundu ekyokutaanu kirimu obulanzi obuvumirira kyabazinga Gogi. Mu kitundu ekyomukaaga Ezekieli agha ekifaananie eky’eisinzizo n’eighanga lya Katonda, nga bwe biriba nga biiziibwagho obuyaaka.
Ezekieli yali n’okwikiriza kunene inho era nga yeefumintiriza inho ku Katonda mu mwoyo gwe. Ebintu kamaala eby’obumanhi byamwidhiranga mu ngeri ya kubonekerwa, era obukwenda bwe kamaala ng’abutuusa ku bantu mu kukozesa ebikolwa ebibonekera irala obukalamu. Ezekieli yata inho amaani ku ky’omuntu okweiza obuyaaka mu mwoyo gwe ni mu ndowooza ye, n’eky’okuvunaanizibwa n’okubonerezebwa olw’ebibi bye. Era yalangirira eisuubi lye yali nalyo eri eighanga lye, nga liriiramu okuba mu bulamu obulungi. Yali kabona era omulanzi eyagonzanga einho eisinzizo era ng’awulira inho mule obwetaavu obw’okuba omutukuvu.
Ebirimu nga bwe biiraganwaku
Okwetebwa kwa Ezekieli 1:1—3:27
Obukwenda obugema ku kabi ak’okwidhira Yerusalemu 4:1—24:27
Katonda asalira amaghanga omusango 25:1—32:32
Katonda bye yasuubiza abantu be 33:1—37:28
Okulanga akabi ak’okwidhira kyabazinga Gogi 38:1—39:29
Okubonekerwa eisinzizo n’ensi Isiraeli nga bwe biribaagho ye bwidha 40:1—48:35