15
Olufumo olugema ku muzabbibu
1Agho Musengwa Katonda yaayogera ninze ng’akoba ati: 2“Iwe omuntu, omuzabbibu oli ni bw’ogugeza ku muti, oba ku lusaga lwonalwona olw’oku muti ogw’omu kibira? 3Omuzabbibu basobola okugusalamu embaawo baadhibaadhamu ekintu kyonakyona? Oba basobola okugutoolaku waire enkondo obukondo baaghanikaku ekintu kyonakyona? 4Omuti ogwo bagukumisa bwa muliro. Aye omuliro bwe gumala okugwokya eruuyi n’eruuyi, ni ghagati ni guya, basobola kabiri okugukozesa ekintu kyonakyona? 5Bona eno, oba bwe gwali nga gukaali omulamba tigwali na mugaso, memale obwo omuliro nga gumaze okugwokya eruuyi n’eruuyi, ni ghagati nga gumaze okuya, bwe gunaaba n’omugaso?”
6Musengwa Katonda kyava n’akoba ati: “Nga bwe mpaayo omuzabbibu ni bagutoola mu miti egy’omu kibira okuja okugukumisa omuliro, era ntyo bwe ndighaayo abatyamye ab’omu Yerusalemu ni mbabonereza. 7Ndibeefuulira naababonereza ni bwe balirumuka batya okuwona omuliro, era gulibookya. Kale ni bwendyefuulira abantu abo ni mbabonereza, mulimanha nga ninze Musengwa Katonda. 8Ndizikiriza ensi eyo yaafuuka bifulukwa byereere, kuba abantu baamu tibaali beesigwa ye ndi. Nze Musengwa Katonda ninze nkobye.”