9
Abayudaaya bazikiriza abazigu baibwe
1 Ku lunaku olweikumi n’eisatu olw’omwezi ogwetebwa Adari, ekirangiriro ekyali mu liina lya kyabazinga ekyasooka lwe kyali kija okuteebwa mu nkola.9:1: 1 Bamak 7:49; 2 Bamak 15:36 2 Aye abazigu b’Abayudaaya n’abaazikirizibwa ku olwo. Woonawoona abantu baali batya Abayudaaya era nga ghazira waire omulala ati akana kubalwanisa. 3 Mu butuufu abafuzi ab’omu biketezo, n’abo abaakuliranga abantu, aghalala n’abaghandiisi b’obwakyabazinga, nga bagha Abayudaaya ekitiibwa olw’okutya Morodekai. 4-5 Eiteeka lya kyabazinga eryo lyaleetera Morodekai okumanhikana mu bwakyabazinga bwonabwona.
6 Mu kibuga ekikulu kyene Susa, Abayudaaya baitamu abantu ebikumi bitaanu (500), 7-10 n’ebintu byaibwe baabinhagulula. Mu abo n’omwali batabane ba Hamani omwana wa Hammedatha ow’e Bouga, era omuzigu w’Abayudaaya. Baali ikumi era ni bano: Farisannesitaini, Delifoni, Fasiga, Faradatha, Barea, Sarabaka, Marimasima, Arufao, Arisao, ni Zabuthao.
11 Olunaku lwene olwo omughendo ogw’abantu abaitibwa mu Susa baagukobera kyabazinga. 12 Kyabazinga yaakoba Esitheri ati: “Mu Susa mwonka, Abayudaaya baiseemu abantu ebikumi bitaanu (500). Me leero baise bameka mu biketezo ebindi eby’omu bwakyabazinga! Nkobera ekindi ky’oyenda era oidha kukifuna.”
13 Esitheri yairamu ati: “Isebantu kyabazinga, bw’oba ng’osiimye, ganha Abayudaaya kye bakoze mu Susa olwaleero kabiri bakikole n’idho. Era lagira emirambo gya batabane ba Hamani eikumi bagirengeedheze ku mulabba.” 14 Kyabazinga yaaganha Abayudaaya balengeedheze ku mulabba emirambo gya batabane ba Hamani eikumi, abantu bagibone. 15 Ku lunaku olweikumi n’eina olw’omwezi Adari, Abayudaaya ab’omu Susa beesoloza kabiri, baita abantu abandi ebikumi bisatu (300) mu kibuga. Aye ku olwo tibaanhaga bintu.
16 Abayudaaya abaali mu biketezo eby’obwakyabazinga, boona beesoloza okwerwanaku. Beewonia abazigu baibwe nga baita abantu omutwalo omulamba n’enkumi eitaanu (15,000) ku lunaku olweikumi n’eisatu olw’omwezi gwa Adari. Aye tibaanhaga bintu. 17 Ku lunaku olwairirira olweikumi n’eina olw’omwezi gwene ogwo tibaita bantu bandi kabiri. Era olunaku olwo Abayudaaya baaluwuumula nga bali mu masanhu na mu kulya mbaga. 18 Aye Abayudaaya ab’omu Susa olunaku olweikumi n’eitaanu lwe baafuula olw’okuwuumula, kuba ku lweikumi n’eisatu ni ku lweikumi n’eina baali mu kutirimbula bazigu baibwe. 19 Era eyo n’ensonga lwaki Abayudaaya ababa mu bibuga ebitono batwala olweikumi n’eina olw’omwezi gwa Adari, nga n’olw’okuwuumula n’okugheerezagania ebirabo eby’emere. Ng’ate Abayudaaya ab’omu bibuga ebinene bakuza lwaikumi na itaanu nga n’olw’okuwuumula n’okugheerezagania ebirabo eby’emere.
Ekibinuko ekyetebwa Purimu
20 Morodekai yaalagira ebyo ebyaligho baabighandiika mu bitabo, era baabigheereza Abayudaaya boonaboona abaali okumpi n’abaali eghala mu bwakyabazinga bw’e Perusia bwonabwona. 21 Baabaghandiikira okubakubiriza okukuumanga olunaku olweikumi n’eina n’olweikumi n’eitaanu mu mwezi gwa Adari nga dha kuwuumula. 22 Edho n’enaku Abayudaaya dhe beewonezaaku abazigu baibwe. Baali n’okukuuma omwezi gwonagwona nga gwa kuwuumula, kuba omwezi ogwo gwali guja kuba gwa nnaku na kuweesa isuubi. Aye nga buti gwafuulibwa gwa masanhu na kusagamba. Era baabakoba okukuumanga enaku edho nga balya mbaga, era nga bagheerezagania ni bakagwa baibwe emere n’ebirabo, baaghaaku n’abaghafu. 23Abayudaaya baaganha okukola ebyo byonabyona Morodekai bye yabakoba ebyali mu kighandiiko ekyo.
24 Morodekai yaghandiika nga Hamani mutabane wa Hammedatha Omumakedonia bwe yalwanisa Abayudaaya. Era nga bwe yali abakoleire olukwe okubazikiriza, n’ataagho mwene eiteeka era n’akubisa obululu obwetebwa Puri okubazikiriza abamaliregho irala. 25 Era nga bwe yaja ye kyabazinga okumusaba alengeedhie Morodekai ku mulabba afe. Aye nti Hamani yamala yaatuuka ku ekyo kyene kye yali ategeike kituuke ku Bayudaaya, mwene ni batabane be bwe baabalengeedhia ku mulabba ni bafa. 26-28 Olw’embaluwa Morodekai ye yaghandiika, n’olw’ebyo byonabyona ebyabatuusaaku okulumizibwa, Abayudaaya baaganha ekidhuubo kya Morodekai. Beeteekera eiteeka beene, n’abaana baibwe, n’abaidhukulu, era n’omuntu owundi yeenayeena aba ng’afuuse Omuyudaaya, bati baidha kukuumanga butiribiri enaku edho nga dha kiidhukizo eky’ense n’ense, mu buli kibuga, na mu buli kiketezo era na mu buli nsi. Abayudaaya baali n’okwidhukiranga era n’okukuumanga enaku edho edha Purimu mu biseera byaibwe byonabyona eby’omu maiso, aghazira kudheerabira naire.9:26-28 Purimu: Ekiwuumulo ekyo bakyeta Purimu, kuba mu lulimi lwaibwe “obululu” babweta “Purimu”.
29-30 Agho inhebantu Esitheri mughala wa Aminadabu ghalala ni Morodekai Omuyudaaya, baaghandiika ebyo byonabyona bye baakola mu kitabo. Era baakozesa obuyinza bwa inhebantu obwidhuvu nga baghandiika embaluwa eyalimu ekiragiro eky’okukuzanga ekibinuko kya Purimu. 31 Bombi baatwala obuvunaanizibwa okubona ng’ekibinuko ekyo kibaagho era baasalagho nga baidha kukikuumanga, okwenda n’obutenda. 32 Esitheri yataagho ekibinuko ekyo nga kya kubangagho byanda na byanda, era ekiragiro kye yagha nga inhebantu eky’okukuzanga ekibinuko ekyo, kyaghandiikibwa mu bitabo.