8
Kyabazinga akoba Abayudaaya beerwaneku beene
1 Ku lunaku olwo, kyabazinga Ahasuero yaagha inhebantu Esitheri ebintu byonabyona ebyali ebya Hamani, omuzigu w’Abayudaaya. Esitheri yaakobera kyabazinga nga Morodekai bw’amuliku oluganda, era okuva ku olwo Morodekai yaikirizibwa okwidhanga ye kyabazinga. 2 Kyabazinga yaatoolaku empeta ye eyakozesebwanga okuta akamanhiso ak’obwakyabazinga ku bighandiiko, ye yatoola ku Hamani, yaagigha Morodekai. Esitheri yaagha Morodekai obuvunaanizibwa ku bintu byonabyona ebyali ebya Hamani.
3 Agho Esitheri kabiri yaayogera ni kyabazinga. Yaakuba amakiryaivu gha bigere bya kyabazinga, yaamwegayirira nga bw’alira n’amaziga. Yaamusaba abeeku ni ky’akola okulobera olukwe Hamani lwe yali akoleire Abayudaaya. 4 Kyabazinga yaagololera Esitheri omwigo gwe ogw’obwakyabazinga ogwa zaabu. Kale Esitheri yaasituka, yaayemerera, 5 era yaamukoba ati: “Isebantu kyabazinga, bw’oba ng’osiimye era nga zeena onfaaku, lagira baghandiike ekiragiro ekisazaamu kire Hamani mutabane wa Hammedatha asimuka mu Agagi, kye yali ayiiyiiza okuzikiriza Abayudaaya abali mu biketezo byonabyona eby’obwakyabazinga bwo. 6 Nze nnaaguma ntya, ng’akabi ako kali kwidhira abantu b’eighanga lyange? Nnaalingirira ntya obulingirire, nga bali kuzikirizibwa?”
7 Kyabazinga Ahasuero yaakoba inhebantu Esitheri ati: “Bona eno, mmaze okulengeedheza Hamani ku mulabba yaafa, olw’okukola olukwe okwita Abayudaaya, era ebintu byonabyona ebibaire ebibye naabikugha. 8 Ekiragiro kye baghandiise mu liina lya kyabazinga, ni bakitaaku n’akamanhiso ak’empeta ey’obwakyabazinga, tikisoboka kusazibwamu. Aye muli ba idembe okughandiikira Abayudaaya embaluwa mu liina lyange nga bwe mubona, mwagitaaku n’akamanhiso ak’empeta ey’obwakyabazinga.”
9 Kale ku lunaku olwabiri n’eisatu olw’omwezi ogusooka ogwetebwa Nisani, baayeta abaghandiisi ba kyabazinga. Baaghandiika embaluwa nga badhighandiikira Abayudaaya, abakungu, n’abafuzi ab’omu biketezo byonabyona ekikumi n’abiri n’omusanvu (127), okuva e Buyindi okutuuka e Sudani. Buli kiketezo baakighandiikira mu lulimi olw’abantu baakyo. 10 Embaluwa edho baadhighandiika mu liina lya kyabazinga, era baadhitaaku n’akamanhiso ak’empeta ey’obwakyabazinga. Baadhigemya abalumusi baadhitwala.
11 Mu mbaluwa edho kyabazinga yaikiriza Abayudaaya abaali mu buli kibuga okwebisa nga bajiira ku mateeka agaibwe ku bwaibwe. Yaabaikiriza n’okwesoloza beerwaneku, nga bazikiriza abazigu baibwe mu nsambo yoonayoona ye baba baboine. 12 Ekyo nga bali n’okukikola mu biketezo byonabyona kyabazinga Ahasuero bye yafuganga, ku lunaku lulala luti olweikumi n’eisatu mu mwezi ogweikumi n’ebiri ogwetebwa Adari.8:12 Enkenga 8 yeeyongerayooku emberi ng’Enkenga eno E eri kuja okwiraku emaze okuwaaku.
E
Ekiragiro kya kyabazinga ekighagira Abayudaaya
13 E:1 Bino ebiri mu Nkenga eno E: 1-24 mu Baibuli edhindi byagaanibwa mu Nkenga 16:1-24. Ekiragiro ekyo kyali kikoba kiti:
“Ninze kyabazinga Ahasuero omukologho, mpandiikiire abafuzi ab’omu biketezo byonabyona ekikumi n’abiri n’omusanvu (127) okuva e Buyindi okutuuka e Sudani, era naaghandiikira n’abo boonaboona abagondera obufuzi bwaife. Mwenamwena mbalamwisa.
14 “Abantu kamaala bwe bagheebwa ebitiibwa ni bagheebwa n’obuyambi, baaja nga beeyongera okwekuluntaza. 15 Baba tibaidhi kya kukozesa mukisa mulungi ng’oti n’ogwo. Kale tibakanga ku kyakwenda kulumya bantu baife kyonka, aye bayiiya n’ensambo ye banaatuusa obuzibu ku abo ababayamba. 16 Tibasiima bantu bye babakolera, era baadhuuba nga basobola okuwona Katonda oyo akyagha ebibi era n’abona buli kintu, yaaloba kubasalira musango. Olw’okwekuluntaza kwaibwe, benda inho okuwulira ng’abakozi ab’ebibi abazira ni kye baidhi babasuutiriza.
17 “Emikuzi kamaala abafuzi babaaku ni bakagwa baibwe be bata mu bifo eby’obukulembeze. Aye bakagwa baibwe abo bamalanga baabapikiriza baita abantu abaziraku musango, baaleetagho obuzibu obutaba bwangu kumalagho. 18 Abantu ng’oti n’abo bakozesa obuguya n’obukupankupania, baadaaliimya abafuzi abo ab’omwoyo omulungi. 19 Eby’okuboneraku ebigema ku ngeri obuyinza ye bukozesebwamu obubi, tibiri mu ngero dhe baatunhumiza edh’ebyaligho eira mwonka, aye biri ni mu bikolwa ebyekikambwe ebibairegho mu imwe mu biseera bino.
20 “Ndi kukola okubona nti ye bwidha eyo, mu bwakyabazinga bwange mubaamu emiraala buli muntu atyame atereere. 21 Ekyo nsobola okukituukaku nga nkyusaamu enkola ey’ebintu ebindi, era nga tyekubira mu nsala yange ku buli nsonga eba ng’ereeteibwa ye ndi.
22 “Kale mulowooze ku ky’okuboneraku ekya Hamani mutabane wa Hammedatha Omumakedonia. Yali wa ighanga lindi aziramu musaayi gwa Baperusia era aziramu kisa nga ife. Aye namusangaalira, 23 naamwoleka nga bwengonza era ni numirwa abantu boonaboona. Yatuuka n’okwetebwa ‘Lata’ w’obwakyabazinga era yaaba n’ekitiibwa ekiwula eky’abandi boonaboona okutoolaku ekya kyabazinga kyonka.
24 “Aye okwekuluntaza kwe kwaswikirira, yaagezaaku n’okuntemula atwale obwakyabazinga. 25 Ng’akozesa olugezigezi n’obuguya, yasaba aikirizibwe okwita Morodekai. Ate nga Morodekai oyo olundi yawonia obulamu bwange, era nga buliidho abaire ankolera bukalamu. Era Hamani oyo yasaba n’okwita Esitheri, inhebantu waife azira musango. Yaasaba n’Abayudaaya boonaboona baitibwe. 26 Ekigendererwa kye kyali kutunafuya, olwo Abamakedonia batwale obwakyabazinga bw’Abaperusia. 27 Waire ng’omusaadha omwonoonefu oyo yakola olukwe okusaaniagho Abayudaaya, nze tibabonamu nkwe naire, era n’amateeka gaibwe ghazira muntu ye ganhigiriza. 28 Basinza Katonda omulamu asingayo okuba ow’ekitiisa era asingayo okuba omukologho. Oyo n’akuumye obwakyabazinga bwaife buno mu mbeera enungi einho okuviira irala mu biseera bya badhaadha baife okutuusa ni ye buli eno.
29 “Kale ni, imwe ndi kubagha amagezi obutajiira ku biragiro ebiri mu mbaluwa Hamani dhe yagheereza. 30 Mwene n’eyadhighandiika ku lulwe, era buti baamala okumulengeedhia ku mulabba yaafa ghalala n’ab’omu ndhu ye boonaboona, agho ku miryango egy’ekibuga Susa. Katonda oyo afuga ebintu byonabyona yamugha ekibonerezo eky’amangu ekyamugwanira.
31 “Agho ni, imwe ndi kubagha ekiragiro mutimbe eiteeka lino buli abantu ghe beesololeza. Muleke Abayudaaya beebise ng’empisa edh’eighanga lyaibwe bwe dhibalagira. 32 Era mubayambe bwebaliba beerwanaku okwetaasa abo abalibalumba ku lunaku olwateebwagho okubazikirizaaku, nga ikumi na isatu omwezi ogweikumi n’ebiri ogwetebwa Adari. 33 Katonda oyo afuga ebintu byonabyona akyusiisa olunaku olwo olwandibaire olw’okuzikirizaaku abantu be yalonda, yaalufuula lwa kusagamba eri abantu be abo.
34 “Olunaku olwo mulubalirenga mu nnaku enkulu edh’okuwuumuliraku mu ighanga, era mulukuzenga n’ebibinuko. 35 Okuva ni leero n’okutuusa eyo ye bwidha, olunaku olwo lwidha kutwidhusanga ife n’abo abatuyamba, engeri Katonda y’akuumamu eighanga lyaife. Ate abo abatusalira olukwe okutuzikiriza lwidha kubaidhusanga nga Katonda bweyabeesoomera okubazikiriza.
36 “Kiisi kiketezo na kiisi kibuga ekitaagondere kiragiro kino, nja kukimaliraku obusungu bwange aghazira kubitiza. Kija kuzikirizibwa mu lutalo era omuliro gukyokye gukisaaniegho. Tikiribaamu muntu waire omulala ati kabiri, era n’enhonhi waire ensolo edh’omunsiko dhoona dhija kukyesambanga ebyanda n’ebyanda.”
8
37 8:37 13 Obunhiriri 1-12 n’obwasoose memale Enkenga eno E yairaku. “Mutimbe eiteeka lino abantu ghe banaalibonera obukalamu mu buli kiketezo eky’obwakyabazinga, olwo Abayudaaya babe beetegefu okulwanisa abazigu ng’olunaku olwo lutuuse.”
38 Abakwenda baaziinhuuka embiro nga bali ku mbalaasi, baaja okutuukiriza kyabazinga bye yalagira. Eiteeka eryo lyamanhisibwa abantu boonaboona ab’omu kibuga Susa.
39 Morodekai yaafuluma mu kisaagaati eky’obwakyabazinga ng’ali mu bivaalo eby’ekikungu. Yeesiba ku mutwe ekitambaala ekyakolebwa mu lugoye olughegheevu olwa langi ya nakasooma, ng’avaire n’engule ya zaabu ku mutwe. Abantu ab’omu kibuga Susa bwebaamubona baamusangaaza n’emizira. 40 Abayudaaya baasangaala inho nga bali masanhu meereere. 41 Mu buli kibuga na mu buli kiketezo ekiragiro kya kyabazinga ye kyatimbibwa, abantu baawuumula baasagamba mu bibinuko nga basangaavu. Mu butuufu abantu kamaala abamaghanga agandi baafuuka Bayudaaya, olw’okutya Abayudaaya.