7
1 Kale kyabazinga ni Hamani baaja okulya embaga ewa inhebantu Esitheri 2 Omukuzi ogwokubiri. Bwe baali bali kunhwa omwenge ogw’emizabbibu, kyabazinga yaabuuza Esitheri kabiri ati: “Inhebantu Esitheri, nkobera kiki kyene ky’oyenda? Kinkobere era oidha kukifuna, ni bwekinaaba okwawuza mu bwakyabazinga bwange ni nkughaaku oluuyi.”
3 Inhebantu Esitheri yaakoba ati: “Isebantu kyabazinga, bwenebwene bw’oba ng’osiimye okumpa kye ndi kukusaba n’obuwombeefu, nsaba onganhe mbe mulamu, era oganhe n’abantu bange boona babe balamu. 4 Nze n’ab’eighanga lyange baatutunda okuba abairu. Ebintu byaife byanhagibwa, era mperaano tuja kuzikirizibwa. Twenatwena n’abaana baife tuja kuba bairu, era ekyo mbaire nga nkaakisirikiire. Aye bwenebwene omuzigu waife tagwaniire kuba mukungu wo.”
5 Agho kyabazinga Ahasuero yaabuuza Esitheri ati: “Naani aghanga okukana okukola ekintu ng’oti n’ekyo?”
6 Esitheri yaamwiramu ati: “Omuzigu waife n’ono Hamani omuntu omubi!”
Agho nga Hamani yeenayeena atiire inho, yaalinga ku kyabazinga ni ku inhebantu. 7 Kyabazinga yaasituka ku kiiwulo, yaaja mu nimiro edh’omu kisaagaati eky’obwakyabazinga. Hamani yaabona ng’atuuse aghazibu, kale yaaloba kumunonereza aye yaasigala nga yeeghemba inhebantu awonie obulamu bwe. 8 Yali yaakeesuula ghansi ku kityamo kya Esitheri ekyali ng’oti buliri okumusaba amusaasire, kyabazinga yaira mu kisenge mwe baali, ng’ava mu nimiro edh’omu kisaagaati eky’obwakyabazinga. Bweyabona Hamani ghe yali, yaakaabuka ati: “Ee! Oyenda kukaka mukazi wange mu ndhu yange mwene?”
Hamani bweyawulira ekyo yaakyuka yaalinga ere, ng’amaani gamuwoiremu. 9Agho owundi ku balaawe abo ye baayetanga Bogathani, yaaseegha ati: “Isebantu kyabazinga, Hamani oyo takomye ku ekyo. Aye yalagiire baasimba n’empango ibiri edhigheraku mita amakumi abiri n’eibiri, baakiikaku ghaigulu omulabba, ogw’okulengeedhezaaku Morodekai afe. Ate nga Morodekai n’eyakulabula nga bakoze olukwe okwenda okukwita!”
Agho kyabazinga yaalagira ati: “Muje mulengeedheze okwo Hamani afe.”
10 Kale baalengeedhia Hamani ku mulabba ogwo gwe yali akoze okwitiraku Morodekai. Agho obusungu bwa kyabazinga bwawoleera.