6
Kyabazinga agha Morodekai ekitiibwa
1 Obwire obwo Musengwa yaaleetera kyabazinga endoolo okumubula. Kale kyabazinga yaalagira omughandiisi we aleete ekitabo eky’ebyafaayo eby’obwakyabazinga, era akimusomere. 2 Agho yaasoma ku nsambo Morodekai ye yazuula olukwe olwali olw’okwita kyabazinga. Olukwe olwo lwali lukoleibwa abalaawe babiri abaali abakuumi ab’ekisaagaati eky’obwakyabazinga. 3 Kyabazinga yaabuuza ati: “Kitiibwa ki era kirabo ki, bye twagha Morodekai olw’ekyo kye yakola?”
Abagheereza be baamwiramu bati: “Musengwa, ghazira kye wamukolera.”
4 Mu kiseera kyene ekyo kyabazinga kye yali ali kubuukizaamu ebigema ku kikolwa ekirungi ekyo Morodekai kye yakola, Hamani yangira mu luya olw’ekisaagaati. Yali aidhie kusaba kyabazinga alagire balengeedhie Morodekai afiire ku mulabba gwe baali bamaze okukiika ghaigulu ku mpango eibiri dhe baasimba.
Kyabazinga yaabuuza ati: “Naani oyo angiire mu luya olw’ekisaagaati?”
5 Abagheereza bairamu bati: “Musengwa, Hamani n’angiire ali kuteegerera ng’ayenda kukubona.”
Kyabazinga yaabakoba ati: “Mukobe angire eno.”
6 Agho Hamani yangira. Kyabazinga yaamukoba ati: “Ghaligho omuntu ye nhenda einho okugha ekitiibwa. Omuntu oyo mmukolere ki?”
Hamani yaadhuuba mule ati: “Naani owundi kyabazinga ye yandyenze obwaga agho okugha ekitiisa? Ateekwa okuba nga ninze.”
7-8 Kale yairamu kyabazinga ati: “Musengwa, abagheereza bo ka bamutoolereyo ekivaalo ekyakolebwa mu lugoye olughegheevu, iwe mwene ky’ovaala. Era ka baleete n’embalaasi iwe mwene y’ovuga. 9 Olwo ofune omukungu wo awula kuba nga wa idaala lya ghaigulu, avaaze omuntu oyo y’ogonza obwaga agho ekivaalo ekyo. Era omukungu oyo amukulembere ng’amutyamiisa ku mbalaasi eyo, ajenga ng’amubisa mu luya olw’ekibuga, ng’eno bw’alangirira ati, ‘Mubone kyabazinga bw’asasula omuntu y’aba ng’ayenze okugha ekitiisa!’ ”
10 Agho kyabazinga yaakoba Hamani ati: “Kirungi inho! Ebyo byonabyona bikolere Morodekai Omuyudaaya, omukungu ali ku idaala erya ghaigulu mu kisaagaati kino eky’obwakyabazinga. Ghatabaagho ky’olekayo naire.”
11 Kale Hamani yaafuna ekivaalo kire, yaakivaaza Morodekai. Yaafuna n’embalaasi ere, yaagityamyaku Morodekai oyo. Agho Hamani yamukulembera, yaamubisa mu luya olw’ekibuga ng’aja bw’alangirira eri abantu ati: “Mubone kyabazinga bw’asasula omuntu y’aba ng’ayenze okugha ekitiisa!”
12 Olwamala, Morodekai yairayo ku mulyango gw’ekisaagaati eky’obwakyabazinga. Aye Hamani yaayangugha okwirayo eka we nga yeeghembye ni mu maiso olw’okuswala. 13 Bweyatuuka yaakobera mukazi we ni bakagwa be byonabyona ebyamutuukaku. Agho boonaboona baamukoba bati: “Morodekai atooleire okukumalaku obuyinza. Mwene Muyudaaya, kale iwe tosobola kumusinga. Bwenebwene aja kukughangula, kuba Katonda omulamu ali ku luuyi lwe!”
Hamani aitibwa
14 Baali bakaayogera, abalaawe ab’omu kisaagaati kya kyabazinga baatuuka nga baidhie okunona Hamani aje ku mbaga Esitheri ye yategeka.