5
Esitheri aja eri kyabazinga
1 D:1 Bino ebiri mu Nkenga eno D:1-16 mu Baibuli edhindi byagaanibwa mu Nkenga 15:1-16. Inhebantu Esitheri yasabira enaku isatu. Bwe yamala okusaba atyo, yaatoolamu ebivaalo bye yali alimu, yaavaala ebivaalo bye ebirungi einho kabiri. 2-3 Era ng’ali mu bitiibwa bye eby’Obwainhebantu, kabiri era yaasaba Katonda we era omulokozi we abona buli kintu. Agho yaatambula nga inhebantu, yaava mu kisenge kye ng’ali kugherekerwaku abagheereza be abaghala babiri. Owundi yali amugemye ku mukono, 4 ate owundi yaabavangaku einhuma ng’agemereire ekirenge eky’ekivaalo kye kirobe kukwekwebya ghansi. 5 Mu maiso inhebantu Esitheri yali ali kuboneka bulungi inho, era ng’ali kumesunkana bumesunkane. Yaboneka nga musangaavu era ng’asanhusa okubona, aye nga mu mwoyo gwe yali ali kutengera olw’okutya. 6 Yaaja ng’abita mu miryango gyonagyona okutuusa bwe yangira mu kisenge ekyalimu ekityamo eky’obwakyabazinga, yaayemerera agho mu maiso ga kyabazinga. Kyabazinga yali atyaime ku kityamo kye eky’obwakyabazinga, ng’avaire ebivaalo bye eby’ebitiibwa bye baadholiga ni zaabu era n’amabaale ag’omughendo. Ng’okumulingaku obulinge, atiisa inho. 7 Mu maiso yaboneka nga musangaavu ng’ali mu bitiibwa bye, aye bwe yabona Esitheri yaamutaaku amaiso ng’amoza bukambwe bwereere. Esitheri amaani gaamuwaamu ni mu maiso mwamusiiwuuka yaabulaku katono okuzirika, era yaasiira omutwe gwe ku ibega ly’owundi ku bagheereza be abaamugherekeraku.
8 Aye Katonda yaaleetera obusungu bwa kyabazinga okukyuka, yaafuuka omuntu ali kufaayo era ali kulumirwa. Kale yaasituka mangu okuva mu kityamo kye eky’obwakyabazinga, yaagemerera Esitheri mu mikono gye okutuusa bwe yafuna amaani ag’okwemerera ku magulu ge mwene. Agho kyabazinga yaiza mu Esitheri omwoyo ng’akozesa ebibono ebimugumya. 9 Yamukoba ati: “Esitheri, obaire ki? Ninze balo, kale otatya naire. 10 Eiteeka lyaife ligema ku bantu ba buliidho bonka, kale iwe toidha kwitibwa. 11 Idha ghano ghe ndi.” 12 Agho yaagolola omwigo gwe ogw’obwakyabazinga ogwa zaabu, yaagusiinha ku nkoto ya Esitheri. Yaamala yaamunhwegera era yaamubuuza ati: “Nkobera, kiki ky’oli kwenda?”
13 Inhebantu yaamukoba ati: “Bwenkulinzeeku iwe musengwa wange, onfaananiire nga malaika wa Katonda, era naatya inho ekitiibwa eky’obwakyabazinga bwo. 14 Weewuunhisa era mu maiso waidhula ekivunika.”
15 Aye yali akaayogera, kabiri yaazirika. 16 Kyabazinga yeeraliikirira olw’embeera ya inhebantu, era abagheereza be boonaboona baafuba inho okwiza Esitheri oyo engulu.
5
Esitheri ayeta kyabazinga ni Hamani ku mbaga
17 5:17 3 Mu Lugureki, bino ebiri mu Nkenga eno D n’ebiira mu kifo ky’obunhiriri 5: 1-2 obw’ekitabo kya Esitheri eky’Oluheburayi. Kyabazinga yaabuuza Esitheri ati: “Esitheri, obaire ki? Nkobera ky’oyenda, oidha kukifuna. Ni bwekiba okwawuza mu bwa kyabazinga bwange ni nkughaaku oluuyi.”5:3: Mar 6:23
18 Esitheri yaamukoba ati: “Olwaleero lunaku lwa ndhawulo inho ye ndi. Musengwa wange, bw’oba ng’osiimye, ndi kusaba iwe ni Hamani mube bageni bange ku mbaga y’ekyeigulo ye ndi kubategekera.”
19 Kyabazinga yaalagira Hamani aidhe mangu, baje babe bageni ba Esitheri. Kale Kyabazinga ni Hamani baaja ku mbaga y’ekyeigulo Esitheri ye yafumba. 20 Bwe baali bali kunhwa omwenge ogw’emizabbibu, kyabazinga kabiri yaabuuza ati: “Inhebantu Esitheri, nkobera ky’oyenda.”
21 Esitheri yairamu ati: 22 “Musengwa wange, bw’oba ng’ongemeirwa ekivunika era ng’osiimye okunkolera kye nja okukusaba, nandyenze iwe ni Hamani mube bageni bange olwaidho ku mbaga eyindi ey’ekiiwulo ye nja okubategekera. Embaga eyo eja kuba ng’oti n’eno.”
Hamani asala olukwe okwita Morodekai
23 Hamani yaava ye kyabazinga nga musangaavu era ng’asuuyiriire, okutuusa bwe yabona Morodekai Omuyudaaya mu luya olw’omu kisaagaati eky’obwakyabazinga. Ekyo kyamutaaku obusungu obutaloodheka, 24 aye yaabita yaaja eka we. Bwe yatuuka eka yaayetesa bakagwa be okwidha ewuwe, era yaakoba ni mukazi we Zereshi abeeyimbeku. 25 Agho yaabeesuutiraku nga bw’ali omukombe einho, era yaabakobera n’ekitiisa kyabazinga kye yamugha bwe yamukuza n’amutuusa ku kuba omukungu owa ghaigulu atyo, ng’amufuula okuba katuukiro we. 26 Era yaakoba ati: “Ate n’okwongera ku ebyo, inhebantu Esitheri yategeike embaga nga tategekera wundi yeenayeena okutoolaku kyabazinga ninze. Era atwese n’olwaidho kabiri tuje. 27 Aye ebyo byonabyona bizira makulu ye ndi, nga nkaabona Omuyudaaya oyo Morodekai ng’atyaime mu luya olw’omu kisaagaati eky’obwakyabazinga.”
28 Agho mukazi we ni bakagwa be boonaboona baamukoba bati: “Lwaki tolagira bulagire basimbe empango ibiri nga dhija ghaigulu mita oti makumi abiri na ibiri, ghaigulu ghaadho bakiikeyo omulabba? Olwaidho ku nkyo osobola okusaba kyabazinga, yaalagira baalengeedhia okwo Morodekai yaafa. Olwo oje ku mbaga ni kyabazinga era onhumirwe.”
Hamani yaabona ng’amagezi ago makalamu, kale yaalagira baasimba empango ibiri era ghaigulu baakiikayo omulabba.