3
Hamani akola olukwe okuzikiriza Abayudaaya
1 Nga ghabiseegho ekiseera, kyabazinga Ahasuero yaagha omusaadha eyayetebwanga Hamani ekitiibwa, yaamukuza abe katuukiro we. Hamani yali mutabane wa Hammedatha eyasimuka e Bouga. 2 Kyabazinga yalagira abakungu boonaboona abaali bamugheereza batenga ekitiibwa mu Hamani nga bakutamyaku emitwe buli lwe baaseeta okumpi naye. Boonaboona baakolanga batyo, okutoolaku Morodekai eyaloba okukolanga atyo. 3 Abakungu abandi abaagheerezanga kyabazinga baabuuza Morodekai lwaki adheemera ekiragiro kya kyabazinga. 4 Buli kaakyeire nga bamupikiriza agonde aye nga taganha. Ng’abainhonhola ati: “Nze ndi Muyudaaya, kale tisobola kukotamiza Hamani mutwe gwange.” Agho baakobera Hamani nga Morodekai bwe yali adheemera ekiragiro kya kyabazinga. 5 Hamani yaasungughala ekibitiriire bwe yakizuula nga Morodekai yali taja kumukotamizaaku mutwe. 6 Kale yaayiiyaayo entegeka ey’okuzikiriza Abayudaaya boonaboona abaali mu bwakyabazinga bw’e Perusia.
7 Mu mwaka ogweikumi n’ebiri (12) nga kyabazinga Ahasuero n’afuga Perusia, Hamani yalagira okukuba obululu okubona omwezi n’olunaku olutuufu olulala luti, olw’okuzikiririzaaku Abayudaaya boonaboona. Olunaku olweikumi n’eina olw’omwezi ogwetebwa Adari lwalondebwa.
8 Agho Hamani yaakobera kyabazinga, ati: “Ghaligho eighanga ery’abantu abaasansaanira mu maghanga agandi goonagoona agali mu bwakyabazinga bwo. Bajiira ku mpisa edhitafaananaku na dha ighanga lindi lyonalyona. N’ekindi tibagondera mateeka ga bwakyabazinga bwo, kale ozira ky’oganhulwamu okubaguminkiriza. 9 Kale Isebantu kyabazinga, bw’oba ng’osiimye gha ekiragiro babaite. Bw’onaaba okoze otyo, ndi kukusuubiza nti nja kuta mu ndyanga ey’obwakyabazinga kilo dha feeza edhighera emitwalo amakumi asatu n’ena (340,000).”
10 Agho kyabazinga yaatoola empeta ku lwala lwe eyakozesebwanga okuta akamanhiso ak’obwakyabazinga ku bighandiiko, yaagigemya Hamani akakase ekiragiro ekikoba Abayudaaya okwitibwa. 11 Kyabazinga era yaamukoba ati: “Kola kyonakyona ky’oyenda n’abantu ab’eighanga eryo, aye empiiya dho dhisigaze.”
12 Kale ku lunaku olweikumi n’eisatu olw’omwezi ogusooka, Hamani yaayeta abaghandiisi ba kyabazinga, yaayogeranga, eno nga bwe baghandiika ekiragiro ekyali nga kiri n’okukyusibwa mu nnimi dhoonadhoona edhaali mu bwakyabazinga, era nga kiri n’okugheerezebwa abakungu n’abafuzi boonaboona. Ekighandiiko ekyo baakighandiika mu liina lya kyabazinga Ahasuero, baakigheereza mu biketezo byonabyona ekikumi n’abiri n’omusanvu (127), ebyavanga e Buyindi ni bituuka e Sudani. 13 Abalumusi baalumusa ekiragiro ekyo okukitwala mu buli kiketezo eky’obwakyabazinga. Kyali kikoba kiti ku lunaku lulala luti mu mwezi ogweikumi n’ebiri ogwetebwa Adari, Abayudaaya boonaboona baali bali n’okwitibwa, n’ebyaibwe binhagululwe.3:13 Enkenga 3 yeeyongerayooku emberi ng’Enkenga B eri kuja okwiraku emaze okuwaaku.
B
Ekiragiro kya kyabazinga Ahasuero eky’okwita Abayudaaya
14 Ekiragiro kyali kikoba kiti: “Nze kyabazinga Ahasuero omukologho, mpandiise ekiragiro kino kije eri abafuzi ab’ebiketezo ekikumi n’abiri n’omusanvu (127) ebiva e Buyindi ni bituuka e Sudani, n’eri abakungu abali ghansi ghaibwe.
15 “Bwe namala okufuuka omufuzi ow’amaghanga kamaala era musengwa ow’ensi yoonayoona, nasalagho nti nhenda abantu bange be nfuga boonaboona batyame batereere mu miraala buliidho. Ekyo nakyenda ti lwa kwenda kwesuuta olw’obukumu bwe ndi nabwo, aye lwa kuba numirwa inho obulungi obwa buli muntu, era naafuga abantu bange n’ekivunika. Namalirira okwizaagho obuyaaka emiraala buli muntu gye yeegomba, n’okukola einho nteegho obwakyabazinga obw’abantu abagundhufu. Omuntu abe ng’asobola okutambula yaava ku nsalosalo eno yaasala okutuuka ku yindi, nga ghazira ky’atyamu naire.
16 “Nabuuzaaku abampa ku magezi engeri ye nsobola okutuukiriza ekyo, Hamani yaaba n’ekidhuubo kye yaleeta. Omusaadha oyo amanhiibwa inho mu ife nga n’omuntu ow’amagezi agataloodheka. Buli kiseera ayoleka ng’afaayo inho ku bulungi obw’obwakyabazinga. Era olw’okweghaayo kwe n’aba omwesigwa, yakuzibwa yaagheebwa ekifo ekya ghaigulu einho ekyokubiri mu bwakyabazinga bwonabwona. 17 Mu biseera ebitali bya ghala, Hamani yatukobera ati eriyo abantu ab’empwitu abaasansaanira mu maghanga goonagoona agali mu bwakyabazinga. Yatwinhonhola ati abantu abo bali n’amateeka agaibwe ku bwaibwe agatagemagana na ga maghanga gandi goonagoona. Era buli kiseera badheemera ebiragiro bya kyabazinga. Kale eneebisa yaibwe eyo eri kulemesa okutaagho obufuzi obwa ghalala obufaanana mu biketezo byonabyona eby’omu bwakyabazinga, nga bwetwandyenze bube.
18 “Abantu abo batakania obufuzi obw’obwakyabazinga bwaife, era baiza emisango emikakali egisobola n’okuviiramu obwakyabazinga okutabanguka. Bajiira ku mpisa edhaibwe edhitali ng’oti dhaife, baagondera amateeka agaibwe ku bwaibwe, era buli kiseera baakontana na buli muntu atali nga beene. 19 N’olw’ensonga eyo tulagiire tuti abantu abo katuukiro waife Hamani b’ayogeraku baitibwe boonaboona, ka babe abakazi oba abaana, aghazira kulekaghooku waire omulala ati. Abantu abo bazigu baife, kale titwidha kubasaasira naire. Ekiragiro kino kiri n’okutuukirizibwa omwaka guno ku lunaku olweikumi n’eina olw’omwezi ogweikumi n’ebiri ogwetebwa Adari. 20 Abantu abo abaleese obuzibu obungi butyo okumala ekiseera ekinene kityo, baja kwitibwa n’obukambwe boonaboona ku lunaku lulala luti. Okuva ku olwo obufuzi bwaife buja kutereera.”
3
21 Byonabyona ebyali mu kiragiro ekyo baabimanhisa abantu boonaboona abaali mu buli kiketezo, era buli muntu baamulagira yeetegekere olunaku olwo.
22 Ekiragiro ekyo baakisansaania mangu eri buli muntu mu kibuga Susa. Era kyabazinga ni Hamani baabanga bali eno mu kutamiira, ng’ere ekibuga Susa kigwiremu akatambala.