10
Kyabazinga Ahasuero ni Morodekai baali bakologho
1 Kyabazinga Ahasuero yataagho omusolo, abantu abaabanga mu biketezo eby’oku nhandha n’abaabanga munda mu bwakyabazinga bwe, gwe baamughanga. 2 Byonabyona eby’obuyinza n’amaani bye yakola, ghalala n’obukombe n’ebitiibwa eby’obwakyabazinga bwe, byaghandiikibwa mu bitabo eby’Ebyomubyanda bya Bakyabazinga ab’e Media n’e Perusia. 3 Morodekai n’eyali owokubiri ku kyabazinga Ahasuero mu kitiibwa. Yali muntu mukologho mu bwakyabazinga bwonabwona era nga Bayudaaya baine bamutaamu ekinhagansi, baamugonza ebitaloodheka kuba yakolereranga inho obulungi obw’abantu be.
F
Morodekai aidhukira ekirooto kye
4 F:1 Bino ebiri mu Enkenga eno F:1-10 mu Baibuli edhindi byagaanibwa mu Nkenga 10:4—11:1. Agho Morodekai yaakoba ati: “Katonda n’aleeteire ebintu bino byonabyona okubaagho! 5 Era andidhwisa ekirooto kye naloota ku bino byonabyona. Buli kye nabona mu kirooto ekyo kituukiriire: 6 akaiga akatono akaavaamu omwiga omunene, n’obutangaavu obwavaamu akasana okwememula, era n’amaadhi amangi, mbiidhukira bukalamu. Akaiga ako nga ni Esitheri, kyabazinga ye yafumbirwa n’amufuula inhebantu. 7Agasota agakologho agabiri nga gategeeza nze ni Hamani. 8 Amaghanga nga gategeeza abo boonaboona abeesoloza okuzikiriza Abayudaaya. 9 Eighanga lyange nga litegeeza Abaisiraeli abaalirira Katonda abayambe, era ni balokolebwa. Musengwa yalokola abantu be, yaatutoola mu kabi ako ng’akola ebyewuninkiriza ebikologho n’ebyewuunhisa ebitabangaghooku mu maghanga gandi. 10 Ebyo byali bityo, lwa kuba Katonda yategeka ebirituuka ku bantu ababe ku bubwe bibe nga bya ndhawulo ku by’amaghanga agandi goonagoona. 11 Era olunaku n’esaawa byatuuka, Katonda asalegho atuukirize entegeka ye yakolera amaghanga. 12 Olwo Katonda yaidhukira abantu be abalonde era yaasala omusango baagusinga. 13 Kale buli mwaka enaku dhino dhombi, olweikumi n’eina n’olweikumi n’eitaanu mu mwezi gwa Adari, abantu ba Katonda baidha kwesolozanga badhikuzenga mu masanhu ni mu kusagamba ebyanda n’ebyanda.”
Ebyongeirwaku
Mu mwaka ogwokuna, Putolemi ghalala ni mughala we Kuleopatura nga n’abafuga,F:10 Kuleopatura: Ono ni Kuleopatura Thea, era eyali amanhiibwa nga Kuleopatura Owokusatu. Se ti ni Kuleopatura Owomusanvu eyaligho okuva mu mwaka ogwenkaaga n’omwenda (69) okutuuka mu gw’amakumi asatu (30) nga Kurisito akaali kwidha, mu biseera bya Kaisari ni Mariko Antonio. omusaadha ye baayetanga Dositheo era mwene nga yeeyeta Mulevi era kabona, yaleeta embaluwa eyo egema ku kibinuko kya Purimu. Yaidha ng’agherekeirwaku mutabane we Putolemi, nga bakoba bati embaluwa eyo yali ntuufu. Era baakoba bati Lisimako mutabane wa Putolemi, owundi ku bantu abaabanga mu Yerusalemu, n’eyagikyusa okugiiza mu lulimi olwo.