1
Morodekai aloota ekirooto eky’engeriengeri
1-3 Morodekai yali musaadha Muyudaaya nga ise ni Yairi mwidhukulu wa Kishi ni Shimei. Ekika kyaibwe baali Babenjamini. Morodekai yatwalibwa mu bunhage e Babilonia ghalala ni Yehoiakini eyali kyabazinga w’e Buyudaaya. Eyabatwala nga ni Nebukadinezzari eyali kyabazinga ow’e Babilonia, lwe yagema Yerusalemu. Morodekai yali ng’aba mu Susa ekibuga ekikulu ekya Perusia, era nga mukungu wa kitiisa mu kisaagaati kya kyabazinga Ahasuero omukologho ow’e Perusia.A:1-3 2 Bakyab 24:10-16
Ku lunaku olusooka olw’omwezi ogwetebwa Nisani, mu mwaka ogwokubiri nga kyabazinga Ahasuero n’afuga Perusia, Morodekai yaloota ekirooto. 4 Mu kirooto ekyo nga mulimu okuwowoigana okungi einho, n’akasasamalo, n’okubwatuka okw’olukuba okw’amaani, n’ensi okutengeesebwa musisi, n’okutabukatabuka okutaloodheka. 5 Agho ghaabonekagho agasota agakologho gabiri, nga buli gusota gwetegeike okulwana ni gwinaagwo. 6 Agasota ago gaadhwira mu nsambo etiisa einho, era bwe gaadhwira gatyo, amaghanga goonagoona geetegeka okulwanisa eighanga lya Katonda ery’abantu abakola ebituufu. 7 Eri ensi yoonayoona lwali lunaku lwa kivumbi era lwa kazigizigi, lunaku lwa bizibu era lwa kweraliikirira, lunaku lwa kulumizibwa era lwa kuzikirira. 8 Abantu ba Katonda boonaboona abakola ebituufu baali mu buzibu era nga bali kutya inho olw’ebyo ebyali bija okubatuukaku. Kale beetegekera okufa, 9 aye nga bwebasaba Katonda abayambe. Era mu kirooto kyene ekyo okusaba kwaibwe kwairibwamu; omwiga omunene gwaidha nga gukuuluula okuva mu kaiga akatono. 10 Obwire bwakya, endhuba yaavaayo. Abo abawombeefu baagulumizibwa, baagheebwa amaani, baazikiriza abazigu baibwe abeekuluntazanga.
11 Agho Morodekai yaazuuka yaava mu kirooto ekyo, mwe yabonera Katonda bye yategeka okukola. Yabirowoozaaku olunaku lwonalwona nga ali kugezaaku okutegeera ekirooto ekyo kye kitegeeza.
Morodekai awonia obulamu bwa kyabazinga
12 Agho Morodekai yaaja okuwuumuliraku mu luya olw’omu kisaagaati kya kyabazinga, okumpi n’aghaali abasaadha ba kyabazinga abalaawe abaali bali kukuuma, nga beetebwa Gabatha ni Tharra. 13 Yaabawulira bombi nga ghaligho olukwe lwe baali bali kukola. Era bweyawulirisa bukalamu bye baali bali kukoba, yaakizuula nga baali bali kwekobaana kwita kyabazinga. Kale yaaja yaakobera kyabazinga Ahasuero eby’olukwe olwo. 14 Kyabazinga oyo yaalagira baababuuza ku by’olukwe olwo. Era bwe baikiriza nga baali balukoze, baabatwala baabaita.
15 Kyabazinga yaalagira baaghandiika ebintu ebyo mu kitabo eky’obwakyabazinga eky’ebigwagho. Ni Morodekai yeena yaabighandiika. 16 Agho kyabazinga yaalonda Morodekai abe mukungu mu bwakyabazinga bwe, era yaamugha ebirabo kamaala olw’ekyo kye yakola.
17 Aye omusaadha eyayetebwanga Hamani nga mutabane wa Hammedatha ow’e Bouga, yaakibona bubi. Ate nga kyabazinga yali ata inho ekinhagansi mu Hamani oyo. Kale Hamani oyo yaagezaaku okukola Morodekai ni Bayudaaya baine akabi, olw’okuba Morodekai n’eyaitisa abalaawe bale ababiri.
1
Inhebantu Vashiti adheemera kyabazinga Ahasuero
18-19 Ebintu bino byonabyona byabaagho mu biseera kyabazinga ye baayetanga Ahasuero bye yafugiramu. Obwakyabazinga bwe nga buva e Buyindi bwatuuka e Sudani ebyo nga n’ebiketezo ekikumi n’abiri n’omusanvu (127) bye yatwalanga. Ekityamo kye eky’obwakyabazinga kyabanga mu kibuga ekikulu Susa ekya Perusia.
20 Mu mwaka gwe ogwokusatu nga n’afuga Perusia, yaakola embaga. Yaayeta abakungu be boonaboona, n’abakwenda ab’ensi edhindi, n’abakologho okuva e Perusia n’e Media, n’abafuzi be abaafuganga ebiketezo. 21 Embaga eyo yaamala enaku kamaala, edhaagherera irala ekikumi n’ekinaana (180), nga kyabazinga ali kwolesa obukombe n’ekitiisa ebitaloodheka eby’obwakyabazinga bwe.
22 Embaga eyo bwe yawa,1:22 5 Embaga eyo; mu bighandiiko ebindi mulimu muti: embaga eyo ey’obugole. kyabazinga oyo yaakola embaga eyindi. Yaayeta abantu abamaghanga agandi abaali nga baba mu kibuga Susa. Embaga eyo yali mu luya olwali mu kisaagaati kye eky’obwakyabazinga okumala enaku musanvu. 23 Mu luya omwo baali nga batimbyemu ensuubo edhaakolebwa mu ngoye empegheevu ni mu ngoye dha pamba, nga dhiri kulengeedhera ku bugugha obwakolebwa mu ngoye empegheevu edha langi ya nakasooma, nga dhisibiibwa ku matofaali ga feeza n’aga zaabu agaali ku mpango edhaakolebwa mu mabaale ag’omughendo agamirimiinha, ni mu mabaale ag’omughendo agandi. Oluya olwo lwali nga baalwaliira amabaale ag’omughendo einho aga langi ya kiragala, n’ag’erangi endheru, n’ag’erangi ng’edha musoke aba ku igulu. Era nga balutairemu ebityamo ebiri ng’oti buliri, nga byakolebwa mu zaabu ni mu feeza. Ebityamo ebyo byali nga baabighembaku obugoye obugheghere nga bughegheevu, era nga bwa langi kamaala. Obugoye obwo nga baabulukiraku ebimuli bya roza ku mbali okwezunguluza.
24 Ghaaligho ebikopo ebya zaabu n’ebya feeza, ng’ekindi ku ebyo baakidholiga n’amabaale ag’omughendo era nga kirowoozebwa okuba nga kyagula taani dha feeza ng’oti lukumi (1,000). Ekyo baakita agho nga benda abantu bakyelolere. Omwenge ogw’emizabbibu gwaligho kyodoodo ate nga mulungi gwene, nga bagutoola mu iterekero lya kyabazinga lyene. 25 Obungi obw’eby’okunhwa tibwaliku kikomo. Kyabazinga yaalagira abagheereza ab’omu kisaagaati kye eky’obwakyabazinga baleete eby’okunhwa, mwene n’abageni be banhwe okutuusa ku nkooye.
26 Mu kiseera n’ekirala, inhebantu Vashiti yeena yali ali kugabula abakazi embaga munda mu kisaagaati kya kyabazinga Ahasuero oyo.
27 Ku lunaku olwomusanvu olw’embaga, kyabazinga Ahasuero bwe yamala okunhwa omwenge ogw’emizabbibu n’aba omusangaavu einho, yaayeta abasaadha be abalaawe omusanvu abaamugheerezanga, bano: Hamani, Bazani, Tharra, Boraze, Zatholita, Abataza, ni Tharaba. 28 Yaabalagira bamuleetere inhebantu Vashiti, amute engule ku mutwe ey’obwainhebantu, amwolese eri abakungu be n’abageni be boonaboona kuba inhebantu oyo yali mukazi aboneka obulungi einho. 29 Aye inhebantu Vashiti yaaloba kugondera kiragiro ekyo, era yaaloba kuganha bagheereza kumutwala ye kyabazinga. Ekyo kyaleetera kyabazinga okuswala era kyamusungughaza ebitaloodheka.
30 Yaakikoberaku abakungu be abaamughanga amagezi, era yaabeebuuzaaku kiki ky’agwaine okukola mu mateeka. 31-32 Abasatu ku abo nga kyabazinga b’asinga okwebuuzaaku era nga n’abasingamu okuba mu bifo ebya ghaigulu mu bwakyabazinga. Kale abo baidha, baamukobera amateeka kye gakoba era ekigwaine okukolera inhebantu Vashiti olw’okudheemera ekiragiro kyabazinga oyo kye yamugha ng’akibisa mu bagheereza be. Abasatu abo baali Arakeseusi, Sarasatheusi, ni Maleseara, era nga bakungu ba mu Perusia ni mu Media.
33 Bwe yamala yaakobera n’abakungu be abandi, n’abafuzi ab’omu biketezo, eky’e Perusia n’eky’e Media, nga inhebantu bw’amudheemeire. Agho Mukaeo yaakoba kyabazinga ni boonaboona abaaligho ati: “Inhebantu Vashiti tanhoomye iwe kyabazinga wenka aye anhoomye n’ife twenatwena. 34-35 Bakazi baife olunaawulira ekyo inhebantu ky’akoze bati, nga boona bakanaghala okudheemera baibaibwe n’okubabisa eyo batyo nga tibabataamu kanhagansi, nga Vashiti bw’akubisiisa. 36 Kale ni Isebantu kyabazinga, bw’oba ng’osiimye, bisa ekiragiro okuva mu bwakyabazinga, oti Vashiti atairangayo kubonekaku mu maiso go iwe kyabazinga. Era ekyo ka bakighandiike mu mateeka g’e Perusia n’ag’e Media. N’ekifo kya Vashiti eky’Obwainhebantu, okighe omukazi owundi amusinga. Ghazira nsambo yindi ya kugemamu nsonga eyo, okutoolaku eyo yonka. 37 Ekirangiriro kyo bwe kinaamala okubuna mu bwakyabazinga bwo buno bwonabwona, agho buli mukazi aidha kutanga mu iba ekinhagansi nga bwe kigwaine, iba k’abe omukombe oba omwavu.”
38 Amagezi ago kyabazinga yaagasiima, n’abakungu be boona baagasiima, era kyabazinga oyo yaakola nga Mukaeo bwe yateesa. 39 Kyabazinga yaagheereza embaluwa mu biketezo byonabyona eby’omu bwakyabazinga bwe buli kiketezo ng’akigheereza mu lulimi olw’abantu baakyo. Embaluwa eyo ng’ekoba eti buli musaadha mufumbo ateekwa okuteebwamu ekinhagansi mu maka ge.