EMBALUWA PAULO YE YAGHANDIIKIRA
AB’EFESO
Enhandhula
Embaluwa Paulo ye yaghandiikira ab’Efeso, mu kusooka kwene egema ku “Ntegeka ya Katonda ey’okusololeza aghalala ebitonde byonabyona ebiri mu igulu n’ebiri ku nsi nga biri mu Kurisito (1:10).” Ekindi, ekubiriza abantu ba Katonda okutuukiriza entegeka eyo enkologho, abantu boonaboona babe ku nsi nga beeyimbye ghalala mu Yesu Kurisito, nga bali ng’oti muntu mulala.
Mu kwinhama kw’ekitabo kino, Paulo aja mpolampola ng’atoolayo ekikulu kyene kye yaghandiikaku, era nga n’eky’okweyimba. Ayogera ku ngeri Katonda Lata ye yaja ng’alonda abantu be, engeri y’abasonighamu, engeri y’aja ng’abateekuza okuva ku bibi byaibwe nga babita mu Yesu Kurisito Omwana, era n’engeri Mwoyo Mutukuvu y’akakasaamu ati ekisuubizo kya Katonda ekikologho kirituukirizibwa.
Ekiiririra n’okukubiriza abasomi ab’ekitabo kino okwebisa mu nsambo eyoleka nga boonaboona bali kirala mu Kurisito ng’omuntu omulala.
Paulo akozesa eby’okuboneraku kamaala okwoleka ng’abantu ba Katonda bwe bateekwa okuba ng’omuntu omulala, beene na beene era ni Kurisito; nga ghaziragho ndhawukana naire. Akoba ati ab’omu Kikunsu eky’Abaikiriza mu Kurisito bali ng’oti n’omubiri, nga Kurisito n’omutwe; era ati kiri ng’oti kizimbe nga Kurisito n’eibaale eikulu ery’omu nsonda; era ati kiri ng’oti mukazi era nga Kurisito ni iba w’omukazi oyo. Paulo alowooza inho ku kivunika kya Katonda ekyeyolekera mu Kurisito, era atoolera okughandiika nga by’aghaya byoleka nga bya ghaigulu inho. Buli kintu akibonera mu kugonza kwa Kurisito eyaghaayo obulamu bwe ng’omusengo mu kusonigha, mu kivunika, ni mu bwamufu.
Ebirimu nga bwe biiraganwaku
Enhandhula 1:1-2
Kurisito n’Ekikunsu eky’Abaikiriza mu Kurisito 1:3—3:21
Obulamu obuyaaka Kurisito bw’atugha 4:1—6:20
Okufundikira embaluwa eno 6:21-24