6
Abazaire n’abaana baibwe
1Abaana, abazaire baimwe mubawulirenga mu Musengwa, kuba ekyo n’ekigwaine.6:1: Kol 3:20 2“Lata wo n’inhoko obatangamu ekinhagansi.” Kino n’ekiragiro ekisooka ekirimu ekisuubizo ekikoba kiti:6:2-3: Kuv 20:12; Ma 5:16 3“Lw’onaasobola okuba obukalamu era n’okughangaala ku nsi.”
4Imwe abazaire, mutasoononkerezanga baana baimwe kubaleetera kunakughala, aye mubakuze nga mubagalagira era nga mubeegeresa ebya Musengwa.6:4: Kol 3:21
Abairu ni basengwa baibwe
5Abairu mwisenga inho ekitiisa mu basengwa baimwe ab’oku nsi, era mubawulirenga mu mwoyo oguziramu buguya, nga bwe mwandiwuliire Kurisito.6:5-8: Kol 3:22-25 6Ekyo mutakikolanga lwa bantu kubabona, babasiime, aye mukolenga nga Katonda bw’ayenda n’omwoyo gwaimwe gwonagwona, ng’abagheereza ba Kurisito. 7Mukolerenga mu mwoyo mukalamu ng’oti n’abakolera Musengwa, aye ti ng’abakolera abantu. 8Mumanhe muti buli muntu, oba mwiru oba ti mwiru, Musengwa alimusasula buli kikalamu ky’akola.
9N’imwe basengwa b’abairu, mwena mubisenga mutyo abairu baimwe, nga timubeesoomera. Mumanhe muti oyo Musengwa waibwe era owaimwe, ali mu igulu era oyo tasaliriza.6:9: Ma 10:17; Kol 3:25; 4:1
Eby’okulwanisa bya Katonda
10Ekisembayo, mube bagumu mu Musengwa, n’obuyinza bwe obw’amaani. 11Mukozesenga eby’okulwanisa bya Katonda, musobole okutala nga Sitaani abalumbye n’obukodyo bwe; 12kuba tituli kulwana na bantu buntu aye tuli kulwana n’emizimu emibi egy’omu ibbanga kamaala. Tuli kulwana n’abafuzi n’ab’obukumu, n’emisambwa egy’omu luse luno olw’ekizikiiza. 13Kale ni mutoole eby’okulwanisa byonabyona ebya Katonda, mughange okuguma ku lunaku omuzigu lw’abalumba, era bwe mulimaliriza okulwana okutuuka ku nkomerero, musigale nga muli bagumu.
14Mwemerere nga muli bagumu, ng’amazima n’olusibiro lwe mwesibye mu nkende, ate obutuufu nga n’ekivaalo eky’omu kifuba eky’ekyuma.6:14: Isa 11:5; 59:17 15Okuba abeetegefu okulangirira Amawulire Amalungi, agaleeta emiraala, kubabeere ng’engaito mu bigere byaimwe. 16Mugemerere okwikiriza kubabeere engabo, musobole okuzimya obusaale bwonabwona obw’omuliro obulasibwa Omubi. 17Muvaale obulokofu ng’enkuufiira ey’ekyuma, mugeme ekibono kya Katonda ng’empiima Mwoyo y’abagha.6:17: Isa 59:17 18Buliidho musabenga, nga Mwoyo bw’anaabanga abagalagiire. Mubenga beetegefu nga timwiririra, musabirenga abatuukirivu boonaboona. 19Zeena munsabire, bwe naabanga nga ndhogera, mpeebwe eby’okwogera, era mbyogere nga titya, nga mmanhisa abantu ekyama eky’Amawulire Amalungi. 20Ndi mukwenda wa Mawulire ago Amalungi waire ndi mu ikomera. Munsabire ndobe kutya mu kugamanhisa abantu nga bwe kigwaniire.
21Tukiko, owoluganda omugonzi era omugheereza omwesigwa mu Musengwa, aidha kubakobera byonabyona, mumanhe ebinfaaku ni bye ndi kukola.6:21: Bik 20:4; 2 Tim 4:126:21-22: Kol 4:7-8 22Kye nviire ni mmutuma ye muli, mumanhe bwe tuli, era abagumye emyoyo.
23Katonda Iseife ni Musengwa Yesu Kurisito, aghe aboluganda boonaboona emiraala n’okugonza n’okwikiriza. 24Enkabi dha Katonda dhibe n’abo boonaboona abagonza Musengwa waife Yesu Kurisito n’okugonza okutakoma.