EKITABO KYA MUSA EKYOKUTAANU EKYETEBWA
AMATEEKA AGOKUBIRI
Enhandhula
Ekitabo kino Amateeka Agokubiri, kyategekebwa nga kijiira ku ebyo Musa bye yakobera Abaisiraeli mu nsi y’e Moabu, mwe baayemereraku nga bali ku lugendo lwaibwe oluleeyi olw’omu irungu. Olwo baali nga banaatera okwingira n’okutwala ensi y’e Kanaani.
Bino n’ebindi ku bikulu ebighandiikiibwa mu kitabo kino: (1) Musa aidhukiza abantu ebikulu ebyabaagho mu myaka amakumi ana gye baali bamaze okubitamu. Yaabakubiriza obuteerabiranga nga Katonda bweyabakulemberamu okubabisa mu irungu. Olwo ni baidhukirenga okuwuliranga Katonda oyo n’okumugumiraku. (2) Musa airamu okubaidhukiza Ebiragiro Eikumi, era yainhonhola obukulu obw’Ekiragiro Ekisooka, ekiragira abantu okwegheerayo irala eri Musengwa Katonda yenka. Agho yaaja ng’abita mu mateeka agaali ag’okufuga obulamu bw’Abaisiraeli mu nsi ensuubize. (3) Musa aidhukiza abantu amakulu g’Endagaano Katonda ye yakola nabo, yaabakubiriza okwiramu okugha obweyamo nga baidha kutuukiriza ebigirimu. (4) Yoshua agemesebwa omulimo ogw’okukulembera abantu ba Katonda, ng’aira mu kifo kya Musa. Musa bweyamala okwemba olwembo olusaaka Katonda nga bw’ali omwesigwa, n’okusabira ebika bya Isiraeli enkabi, yaafiira mu Moabu e buvandhuba w’omwiga Yorudani.
Ekitabo kino kyoleka nga Katonda bw’alokola era n’agha enkabi abantu be abalondemu b’agonza. Era kyoleka ng’abantu bwe bagwaine okugonzanga n’okuwuliranga Katonda waibwe, memale basobole okuba n’enkabi dhe.
Mu bibono by’omu kitabo kino ebimanhiibwa einho, n’omuli bino ebiri mu 6:4-6, Yesu bye yayeta ekiragiro ekisinga byonabyona obukulu: “Ogonzanga Musengwa Katonda, oyo Katonda wo, n’omutima gwo gwonagwona, n’omwoyo gwo gwonagwona, n’amaani go goonagoona.”
Ebirimu nga bwe biiraganwaku
Okwogera kwa Musa okusooka 1:1—4:43
Okwogera kwa Musa okwokubiri 4:44—26:19
a. Ebiragiro Eikumi 4:44—10:22
b. Amateeka, okulamba, n’okulabula 11:1—26:19
Ebigema ku kwingira mu nsi Kanaani 27:1—28:68
Okwiza obuyaaka Endagaano 29:1—30:20
Ebibono bya Musa ebyasembayo 31:1—33:29
Okufa kwa Musa 34:1-12