27
Amateeka ga Katonda agaaghandiikibwa ku mabaale
1Agho Musa, ng’ali ghalala n’abakulembeze b’Abaisiraeli, yaakoba abantu ati: “Mukuumenga ebiragiro byonabyona bye ndi kubagha olwaleero. 2Ku lunaku lwe mulisomoka omwiga Yorudani, ni mwingira mu nsi Musengwa Katonda waimwe y’ali kubagha, mulisimba amabaale amakologho, mwagasiigaku langi endheru. 27:2-8: Yosh 8:30-32 3Olwo mwaghandiikaku ebibono byonabyona eby’amateeka gano nga mumaze okusomoka, ni mwingira mu nsi Musengwa Katonda, Katonda waimwe y’ali kubagha, engimu era erimu ebirungi kamaala, Musengwa Katonda wa badhaadha baimwe oyo ye yabasuubiza. 4Kale, nga mumaze okusomoka omwiga Yorudani, mulisimba amabaale ago ku lusozi Ebali, nga bwendi kubalagira olwaleero, era mwagasiigaku langi endheru. 5Eyo mulizimbirayo Musengwa Katonda waimwe alutaari ey’amabaale ge mutakozeisa kyuma kugaawuzaamu. 27:5-6: Kuv 20:25 6Kuba alutaari ya Musengwa Katonda waimwe, mwidha kugizimbisanga mabaale gatali mateme gaaku. Era ku alutaari okwo kwe mwidha okugheerangayo ye Musengwa Katonda waimwe ebigheebwayo ebyokebwa. 7Mwidha kughangayo omusengo ogw’ebigheebwayo olw’okutabagana, muliirenga eyo era musagambirenga mu maiso ga Musengwa Katonda waimwe. 8Era mulighandiikira irala bukalamu ku mabaale ago, ebibono byonabyona eby’amateeka ago.”
9Agho Musa ng’ali ni bakabona Abalevi, yaakoba Abaisiraeli boonaboona ati: “Musirike muwulire, imwe Abaisiraeli. Olwaleero mufuuse ighanga lya Musengwa Katonda waimwe. 10Kale ni mumuwulirenga era mutuukirizenga amateeka ge n’ebiragiro bye, bye ndi kubagha olwaleero.”
Okukolimira abadheemu
11Agho Musa yaasikirira abantu ku lunaku olwo ng’akoba ati: 12“Bwe mulimala okusomoka omwiga Yorudani, ab’ebika bino n’abalyemerera ku lusozi Gerizimu okusabira abantu enkabi: ekika ekya Simeoni, n’ekya Levi, n’ekya Yuda, n’ekya Issakari, n’ekya Yosefu, n’ekya Benjamini. 27:12: Ma 11:29; Yosh 8:33-35 13Ate ab’ebika bino n’abalyemerera ku lusozi Ebali okukolima: ekika ekya Reubeni, n’ekya Gadi, n’ekya Ashera, n’ekya Zebuluni, n’ekya Dani, n’ekya Nafutali. 14Olwo Abalevi balikoba Abaisiraeli boonaboona mu mamiro ag’amaani bati: 15‘Omuntu yeenayeena anaakolanga ekifaananie ekibaadhe, oba ekisaanuusiibwa mu kyuma, memale n’akitaagho n’akisinza, akolimirwenga! Kuba okusinza ebitali Katonda kiba ekyenhinhalwa ye Musengwa Katonda.’ Olwo abantu boonaboona baliiramu bati, ‘Amiina.’ 27:15: Kuv 20:4; 34:17; Lev 19:4; 26:1; Ma 4:15-18; 5:8
16“ ‘Omuntu yeenayeena anaanhoomanga ise oba inhina, akolimirwenga!’
“Olwo abantu boonaboona baliiramu bati, ‘Amiina.’ 27:16: Kuv 20:12; Ma 5:16
17“ ‘Omuntu yeenayeena anaakyusanga embibi edh’ekibandha kya muliraanwa we, akolimirwenga!
“Olwo abantu boonaboona baliiramu bati, ‘Amiina.’ 27:17: Ma 19:14
18“ ‘Omuntu yeenayeena anaabuzanga omutulu okumutoola ku ngira entuufu, akolimirwenga!’
“Olwo abantu boonaboona baliiramu bati, ‘Amiina.’ 27:18: Lev 19:14
19“ ‘Omuntu yeenayeena anaasalirizanga omusango ogw’omusenze ni mulekwa ni namwandu, akolimirwenga!’ Olwo abantu boonaboona baliiramu bati, ‘Amiina.’ 27:19: Kuv 22:21; 23:9; Lev 19:33-34; Ma 24:17-18
20“ ‘Omusaadha yeenayeena anaawemulanga ise, ng’aba n’owundi ku baka ise oyo mu buliri, akolimirwenga!’
“Olwo abantu boonaboona baliiramu bati, ‘Amiina.’ 27:20: Lev 18:8; 20:11; Ma 22:30
21“ ‘Omuntu yeenayeena anaabanga n’ensolo, mu nsambo abasaadha ye baba n’abakazi mu buliri, akolimirwenga!’
“Olwo abantu boonaboona baliiramu bati, ‘Amiina.’ 27:21: Kuv 22:19; Lev 18:23; 20:15
22“ ‘Omuntu yeenayeena anaabanga ni mwanhina mu buliri, waire nga mwanhina ku ise oba ku inhina, akolimirwenga!’
“Olwo abantu boonaboona baliiramu bati, ‘Amiina.’ 27:22: Lev 18:9; 20:17
23“ ‘Omuntu yeenayeena anaabanga n’inhazaala we mu buliri, akolimirwenga!’
“Olwo abantu boonaboona baliiramu bati, ‘Amiina.’ 27:23: Lev 18:17; 20:14
24“ ‘Omuntu yeenayeena anaatemulanga mwine mu ngiso, akolimirwenga!’
“Olwo abantu boonaboona baliiramu bati, ‘Amiina.’
25“ ‘Omuntu yeenayeena anaaganhanga okugulirirwa okutemula omuntu aziraku musango, akolimirwenga!’
“Olwo abantu boonaboona baliiramu bati, ‘Amiina.’
26“ ‘Omuntu yeenayeena ataatuukirizenga mateeka gano, akolimirwenga!’
“Olwo abantu boonaboona baliiramu bati, ‘Amiina.’ ”27:26: Gal 3:10