EMBALUWA PAULO YE YAGHANDIIKIRA
AB’E KOLOSAI
Enhandhula
Embaluwa Paulo ye yaghandiikira ab’e Kolosai, yagighandiikira Ekikunsu eky’Abaikiriza mu Kurisito eky’e Kolosai. Kolosai kyali kibuga nga kiri mu nsi Asia Entono era nga kiri ku luuyi lw’e buvandhuba obwa Efeso. Ekikunsu eky’Abaikiriza mu Kurisito kino, Paulo ti n’eyakitandiikagho aye kyali mu kiketezo Paulo kye yawuliranga mule ng’ali n’okukirabirira. Era ng’akigheerezaamu abakozi okuva mu Efeso, ekyali ekibuga ekikulu eky’omu isaza ly’Abaroma ery’omu Asia. Paulo yali amaze okukimanha nga bwe mwalimu abeegeresa abaguya mu Kikunsu eky’Abaikiriza mu Kurisito ekyo eky’e Kolosai, abaakakirizanga abaayo nga babakoba bati okusobola okumanha Katonda n’okufuna okulokolebwa okwidhuvu, omuntu ateekwa okusinzanga “emizimu egitwalibwa nga n’egifuga ensi eno” (2:8). Okwongereza ku ekyo, abeegeresa abo nga bakoba mbu omuntu ateekwa okugema kiisi mpisa ya badhaadha, ng’ey’okukeketebwa, era n’okugondera ebiragiro eby’ensi ebigema ku by’okulya, n’ebindi.
Paulo bye yaghandiika byali bya kutakania ndhegeresa eyo, era mwene yaalomboodha obukwenda bwa Kurisito. Okwiramu kwe eri abo abaali badaaliimya abantu, kwali nti Yesu asobola okugha obulokozi obwidhuvu, era nti okuganha endhegeresa eyindi yoonayoona aghalala n’empisa edhigijiiraku, mu butuufu bwene kuleetera omuntu okudaaliima yaava ku Yesu. Katonda yatonda ensi ng’abita mu Kurisito, era mu mwene oyo mw’abita okwiza ensi y’ali. Mu kweyimba ni Kurisito ni mwonka omuli eisuubi ery’ensi okulokolebwa. Paulo aja ng’ainhonhola ki kyene okwegeresa kuno okukologho kye kutegeeza mu bulamu obw’abaikiriza.
Tugwaine tumanhe nti Tukiko eyatwala embaluwa ya Paulo eno e Kolosai, yagherekerwaku Onesimo. Onesimo ono n’omwiru Paulo ye yawolereza bwe yaghandiikira Filemoni.
Ebirimu nga bwe biiraganwaku
Enhandhula 1:1-8
Ekikula kya Kurisito n’omulimo gwe 1:9—2:19
Obulamu obuyaaka Kurisito bw’atugha 2:20—4:6
Okufundikira embaluwa eno 4:7-18