1
Danieli ni bakabona aba Beli
1Nga kyabazinga Asityage amaze okufa era nga bamaze n’okumuziika mu lwambiidhi lwa badhaadha be, Kuro ow’e Perusia yaatwala obwakyabazinga bwe. 2Danieli yalinga nga n’omulala ku bantu kyabazinga Kuro be yasinganga okwebuuzaaku, era nga kyabazinga Kuro oyo amugha inho ekitiibwa okuwula bandi boonaboona abaamughanga amagezi.
3Abababilonia baasinzanga ekintu ekitali Katonda kye baayetanga Beli. Buli lunaku abantu baalinga n’okughaayo ye kiri, kilo ebikumi bina (400) edh’obuwunga obw’engaano obuseereibwa obukalamu, entaama amakumi ana (40), ni lita ebikumi bibiri (200) edh’omwenge ogw’emizabbibu.3: Isa 46:1; Yer 51:44 3-32: Dan 6:16-24 4Kyabazinga Kuro ng’aikiririza mu Beli, era nga buli lunaku aja yaakisinza. Aye nga Danieli asinza Katonda we.
5Lwali lulala kyabazinga yaabuuza Danieli ati: “Lwaki tosinza Beli?”
Danieli yaamwiramu ati: “Nze tisinza bitali Katonda ebyakolebwa n’engalo dh’abantu. Nsinza Katonda omulamu yenka, eyatonda eigulu n’ensi, era oyo ni Musengwa afuga abantu boonaboona.”
6Kyabazinga yaamubuuza ati: “Olowooza oti katonda waife Beli ti mulamu? Tobona bungi bwa bintu by’alya ni by’anhwa buli lunaku?”
7Danieli yaaseka era yaakoba ati: “Isebantu kyabazinga, otaganhanga kukusubagha. Beli ye mweta katonda, kintu kya itosi butosi kye baalimbyaku ekyuma eky’ekikomo ku ngulu. Tikiryangaku kintu kyonakyona oba okunhwa.” 8Kyabazinga bwe yawulira ekyo yaasungughala, era yaayetesa bakabona ba Beli, yaabakoba ati: “Bwe mutankobera alyanga bintu bigheebwayo ye Beli, mwidha kwitibwa. 9Aye bwe munaaleeta obukakafu obwoleka nga bwenebwene Beli n’alyanga ebintu ebyo byonabyona, Danieli n’aidha okwitibwa kuba anhoomye Beli.”
Danieli yaikiriza ati: “Yii kibe kityo.” 10Bakabona ba Beli boonaboona baali nsanvu (70), nga tobaze bakazi baibwe na baana baibwe. Agho kyabazinga yaaja ni Danieli mu isabo lya Beli.
11Ni bakabona ba Beli boona baaja eri kyabazinga mu isabo eryo. Bwe baatuuka omwo baakoba kyabazinga bati: “Isebantu kyabazinga, ife ka tufulume, iwe ote eby’okulya ku meeza era otegeke n’omwenge ogw’emizabbibu. Bw’onaaba ovaagho oidha kusibagho olwigi ng’ofulwime, oluteeku n’akamanhiso ng’okozesa empeta yo ey’obwakyabazinga. 12Enkyo bw’onaira n’oyagaana nga Beli byonabyona tabiriire, onaatwita. Aye bw’anaaba abiriire, Danieli y’onaita olw’okutughaayiriza.”
13Bakabona tibaalimu kutya kwonakwona, kuba baali baasima ira mu ngiso ekiina ghansi gh’emeeza mu isabo eryo. Omwo nga mwe babita buli bwire, baaja baalya ebyagheebwangayo.
14Kale bakabona abo bwe baafuluma, kyabazinga yaateeragho Beli eby’okulya. Agho Danieli yaalagira abagheereza be, baaleeta eivu baalimansira ghansi woonawoona mu isabo, nga ni kyabazinga ali kubona. Bwe baamala, boonaboona baafuluma baigalagho olwigi, baalusiba baalutaaku n’akamanhiso nga bakozesa empeta ey’obwakyabazinga.
15Obwire obwo, nga buliidho, bakabona, ni bakazi baibwe n’abaana baibwe, beibirira bangira mu isabo nga babitira mu kiina kire kye baasima mu ngiso. Baamaliriragho eby’okulya byonabyona n’omwenge ogw’emizabbibu gwonagwona.
16Ku nkyo einho ku lunaku olwairirira, kyabazinga ni Danieli baaja ye isabo.
17Kyabazinga yaabuuza Danieli ati: “Danieli, obumanhiso baabugemyeku?”
Danieli yairamu ati: “Isebantu kyabazinga, tibaabugemyeku.”
18Olwaigulagho olwigi bati, kyabazinga yaabona emeeza nga nkaya, yaayasiikana ati: “Wo Beli, oli mukologho era oziramu buguya naire.”
19Aye Danieli yaatimbuka enseko, yaakoba kyabazinga ati: “Ng’okaali kungira mu isabo, sooka olinge ghansi ebigere ebyo by’oli kubona by’ani?”
20Kyabazinga yaakoba ati: “Ndi kubona ebigere eby’abasaadha, eby’abakazi n’eby’abaana.” 21Era kyabazinga yaasungughala ekibitiriire, yaalagira bageme bakabona abo, ni bakazi baibwe, n’abaana baibwe, babaleete gh’ali. Era beene abo baamala baamwoleka omulyango ogw’omu ngiso mwe beibiriranga ni baingira okulya ebyateebwanga ku meeza eyo. 22Kale kyabazinga yaalagira baita bakabona abo, era yaaleka Beli mu buyinza bwa Danieli. Danieli yaazikiriza ekifaananie ekyo era yaamenhagho n’eisabo lyakyo.
Danieli aita ogusota
23Ghaaligho n’ogusota ogukologho Abababilonia gwe baasinzanga. 24Lulala kyabazinga yaakoba Danieli ati: “Danieli, bwenebwene tosobola kutakana oti katonda ono ti mulamu. Kale musinze.”
25Danieli yaamwiramu ati: “Nze nsinza Musengwa Katonda wange. Oyo ni Katonda yenka omulamu. 26Era, Isebantu kyabazinga, bw’oba ng’onganhie nsobola okwita ogusota ogwo nga tikozeisaaku mpiima oba omwigo ogw’entole.”
Kyabazinga yaakoba ati: “Kale nkuganhie ogwite.”
27Agho Danieli yaatoola ebintu ebiri ng’oti koolaasi, n’amasavu, n’enviiri, byonabyona yaabitogokeza ghalala. Bwe yamala yaabiwulumpamu ebitole, yaabigha ogusota gwalya. Ogusota bwe gwabirya, gwazimba, gwawuukeera era gwayabika. Agho Danieli yaakoba ati: “Mubone kye mubairenga musinza, imwe Abababilonia!”
28Abantu ab’e Babilonia bwe baawulira ebibairegho baasungughalira kyabazinga era beegugunga inho. Baayasiikana bati: “Kyabazinga afuuse Muyudaaya. Yasooka kuzikiriza Beli, yaatirimbula bakabona, mpegaano aise n’ogusota gwaife.” 29Baaja ye kyabazinga baamukoba bati: “Tughe Danieli. Aye bw’oloba okumutugha twidha kukwita iwe n’ab’omu ndhu yo.”
30Kyabazinga bwe yabona nga bamwekalangwireku inho, yaakakibwa okubagha Danieli. 31Baamusuula mu kiina ekyalimu empologoma, baamuleka omwo okumala enaku mukaaga. 32Mu kiina omwo mwalimu empologoma musanvu, nga badhiriisa mirambo ebiri egy’abantu n’entaama ibiri buli lunaku. Aye okumala enaku edho omukaaga tibaadhigha kya kulya kyonakyona, nga benda dhirye Danieli.
Danieli bamutoola mu kiina omwali empologoma
33Mu kiseera ekyo, mu Bayudaaya ghaaligho omulanzi nga bamweta Habakkuku. Habakkuku oyo yaafumba eiva, yaamegulirameguliramu emere, era byonabyona yaabita mu kibya ng’ali kubitwalira abakungula engaano mu nimiro. 34Aye malaika wa Musengwa yaamukoba ati: “Twala emere eyo y’obbeeze oje ogighe Danieli, ali mu Babiloni mu kiina ekirimu empologoma.”
35Habakkuku yairamu ati: “Musengwa, tijangaku Babiloni, era tiidhi ghali kiina ekyo ekirimu empologoma.”
36Agho malaika yaagema omulanzi oyo enviiri yaamubbeeda, yaamutwala e Babiloni ku mbiro ng’oti n’empewo dh’eziinhuukiraku.Akanhiriri 36 ku mbiro ng’oti n’empewo dh’eziinhuukiraku oba mu maani g’omwoyo gwe. Yaamwisa kumpi n’ekiina ekyalimu empologoma. 37Habakkuku yaayeta ati: “Danieli, Danieli, Katonda akugheereiza emere. Yiino toola.”
38Danieli bwe yawulira Habakkuku ng’ali kwogera, yaasaba ati: “Wo Katonda wange, ondidhukiire kuba bwenebwene tolekulirangaku agho abo abakugonza.” 39Agho yaasituka yaalya emere eyo. Era mangu ago nga malaika wa Katonda aizaayo Habakkuku eka.
40Nga ghabiseegho enaku musanvu kasookanga basuula Danieli mu mpologoma, kyabazinga yaaja y’ekiina mwe dhaali, alire olwa Danieli oyo. Bwe yatuukayo n’alinga mu kiina, yaabona Danieli ng’ali mule atyaime. 41Agho kyabazinga yaayasiikana ati: “Wo Musengwa, Katonda wa Danieli, bwenebwene oli mukologho. Niiwe Katonda wenka.” 42Kale yaaghaluzaayo Danieli mu kiina. Aye yaalagira abo abaagezaaku okwita Danieli oyo, baasuulibwa mu kiina ekyo. Era olwabasuulamu bati, ng’empologoma dhibaliiragho mu kaseera keene ako nga ni kyabazinga alingiriire.