4
14:1: Sir 24:23 Amagezi n’ekitabo eky’ebiragiro bya Katonda, era n’Amateeka agaja okubaagho ebyanda n’ebyanda. Abo boonaboona abagagumiraku baidha kubanga balamu, aye abagavaaku baidhanga kufa. 2Imwe Abaisiraeli, mukyuke mwire y’Amagezi mugeegemeku. Mutambule nga muja eri okumesunkana okw’obutangaavu bwago. 3Mutalekera bantu bandi kutwala kitiibwa kyaife, waire okulekera abandi omukisa gwaife gwe tuli nagwo ng’abantu ba Katonda. 4Imwe Abaisiraeli, nga tuli ba nkabi okumanha ebisiimya Katonda!
Okugumya ab’omu Yerusalemu
5Imwe abantu bange mugume emyoyo, kuba niimwe abaleetera eriina lya Isiraeli okusigala nga likaaligho. 6Mwatundibwa mwaguzibwa amaghanga agandi ti lwa kuzikirizibwa. Aye lwa kuba mwasungughaza Katonda, yaabaghaayo mu ngalo edh’abazigu baimwe. 7Mwaleetera Katonda eyabatonda okubasungughalira, bwe mwaghangayo emisengo eri emizimu emibi, mu kifo ky’okugighaayo eri mwene. 8Mwerabira Katonda ow’ebyanda n’ebyanda eyabaliisa ni mukula, era mwaleetera Yerusalemu eyabalera okunakughala. 9Yerusalemu yabona nga Katonda ali kubabonereza olw’obusungu. Agho Yerusalemu oyo yaakoba ebibuga byonabyona ebimuliiraine ati: “Mubone enaku etaloodheka Katonda y’ansindikiire. 10Nabona batabane bange ni baghala bange nga batwalibwa mu bunhage, obwabatuusibwaku Katonda oyo omulamu ebyanda n’ebyanda. 11Nakuza abaana bange abo n’eisanhu, aye naalira era naagegenga nga babantoireku. 12Ghatabaagho asanhukira kudaagadaaga kwange, olw’okubona nga ndi namwandu era ng’abaana bange kamaala bantoolebwaku. Nasigala agho nga nfuuse bifulukwa olw’ebibi byaibwe, kuba baava ku Mateeka ga Katonda. 13Nga tibafaayo kugondera biragiro bye, waire okumuganha abagalagire okukola ebituufu.
14“Imwe mwenamwena ebibuga ebiiniinaine, mwidhe mubone Katonda oyo omulamu ebyanda n’ebyanda bwe yasindika abaana bange mu bunhage. 15Yabaleetaku eighanga eryava eghala, lyaidha lyabalumba. Eighanga erizira nsoni, eryogera olulimi lwe bataidhi, era eritata kinhagansi mu bakaire waire okusaasira abaana abato. 16Abantu abo baatwala batabane bange abagonzi, baatwala ni baghala bange, naalekebwagho nga ndi namwandu nga nsigaire mulala nti bedengedenge.
17“Baana bange imwe abali mu bunhage, nnaakola ntya okubayamba? 18Eyabatuusaaku ekibonerezo ekyo ni yenka asobola okubanunula okubatoola mu ngalo dh’abazigu baimwe. 194:19: 2 Esid 2:2 Baana bange, muje mube eyo ku lwaimwe. Nze ndi zenka nti. 20Ntoiremu ebivaalo bye navaalanga mu biseera eby’emiraala, naavaala ekutiya olw’enaku. Ndidha kulirira Katonda oyo omulamu ebyanda n’ebyanda, ekiseera kyonakyona kye nnaamala nga nkaaligho ku nsi.
21“Baana bange, mugume, mulirire Katonda abayambe. Aidha kubatoola mu buyinza bw’abazigu baimwe. 22Neekakasa nti Katonda oyo abaagho ebyanda n’ebyanda aidha kubalokola. Omutukuvu oyo era Omulokozi waimwe oyo abaagho ebyanda n’ebyanda, aja kunsanhusa ng’abalaze okusaasira. 23Nalira amaziga era naawowoola, nga babatwaire, aye Katonda aidha kubaiza nsanhukenga era nsagambenga ebyanda n’ebyanda. 24Ng’abantu b’omu bibuga ebiiniinaine bwe baabeerolera nga muli kutwalibwa mu bunhage, era batyo mu kiseera ekitali kya ghala bwe baidha okubona Katonda oyo abaagho ebyanda n’ebyanda ng’aidhira mu kitiisa ekimesunkana okubalokola. 25Baana bange, mugumire ekibonerezo kya Katonda n’obuguminkiriza. Abazigu baimwe babakiriige inho, aye mu kiseera ekitali kya ghala mulibabona nga bazikiriziibwa era imwe mulibatyankirira n’ebigere. 26Baana bange abagonzi, mubise mu bizibu ebitakobeka, baabakunguudhia ng’oti n’entaama abazigu dhe banhaze.
27“Baana bange, mugume, mulirire Katonda abayambe. Yababonereza aye taja kubeerabira. 28Nga bwe mwadaaliima ni muva ku Katonda nga muli bamalirivu, mpegaano mukyuke mwire y’ali, mumugheereze nga ku luno muli n’obumalirivu bwa mikuzi ikumi okusinga bwe mwali nabwo ku olwo. 29Oyo eyabatuusaaku akabi ako aja kubalokola, abaleetere okubanga mu isanhu ebyanda n’ebyanda.”
Yerusalemu kikakasibwa nga kija kuyambibwa
30Iwe Yerusalemu, guma. Katonda oyo eyakutuuma eriina lyo aja kukusaasira. 31Abaakubisa obubi, ni bamala basagamba ng’ogwire, baja kudaagadaaga. 32Ebibuga ebyafuula abaana bo okuba abairu bija kudaagadaaga. Ekibuga Babiloni ekyamiranga batabane bo kija kudaagadaaga. 33Ng’ekibuga ekyo bwe kyasanhuka ng’ogwire, ni kisagamba ng’ozikiriire, ni kyene kityo bwe kiriwulira enaku nga kyene kyona kifuuse bifulukwafulukwa. 34Okwesuutasuuta kwakyo ndikufuula nnaku, naakitoolamu abantu baakyo abangi batyo abakyeyagaza. 35Nze Katonda abaagho ebyanda n’ebyanda, ndikisindikaku omuliro gwakyokya okumala enaku kamaala. Era kirimala ekiseera kinene ng’emizimu emibi gyesololeza omwo.
36Yerusalemu, linga e buvandhuba obone eisanhu Katonda ly’ali kukuleetera. 37Bona, abaana bo abaakutoolebwaku baabo. Katonda Omutukuvu n’aghaire ekiragiro beesoloze okuva mu buvandhuba ni mu bugwandhuba. Buti bali kwira eka nga basagamba mu kitiisa kya Katonda oyo.