3
1“Wo Musengwa Aghanga Ebintu Byonabyona, Katonda wa Isiraeli, tuli kukulirira n’emyoyo gyaife egiidhwire enaku era emikoowu. 2Wo Musengwa, tukusaba otuwulirise era otugemerwe ekivunika, kuba twakola ebibi y’oli. 3Iwe ofuga nga kyabazinga ebyanda n’ebyanda, aye ife tufa era twazikirira ebyanda n’ebyanda. 4Wo Musengwa Aghanga Ebintu Byonabyona, Katonda wa Isiraeli, wulirisa okusaba kwaife. Abafu ghazira kye tubasinga naire. Badhaadha baife baakola ebibi y’oli iwe Musengwa Katonda waibwe era baakudheemera. Kyetuva ife buti ni tudaagadaaga olw’ebibi byaibwe. 5Otaidhukira bibi badhaadha baife bye baakola. Aye mu kiseera kino ekizibu lowooza bwa ku buyinza bwo na ku kitiisa kyo byonka, 6kuba niiwe Musengwa Katonda waife, era twidha kukusaakanga. 7Watuleetera okukutya tusobole okukusabanga. Era twidha kukusaakanga eno ye tuli mu bunhage, kuba twakyuka twava mu bibi bya badhaadha baife. 8Bona mpegaano tuli eno mu maghanga ye watusansaaniza, batuvumenga era batukolimirenga. Oli kutubonereza olw’ebibi bya badhaadha baife, abaakudheemera iwe Musengwa Katonda waife ni bakuvaaku.”
Okusaaka amagezi
93:9: Nsa 4:20-22 Imwe Abaisiraeli muwulire ebiragiro ebireeta obulamu, era muteeyo inho omwoyo, mwidha kuba bagezi. 10Imwe Abaisiraeli, lwaki muli mu nsi ey’abazigu? Lwaki muli kukairiyira mu nsi eyindi etali yaimwe? Muli boonoonefu ng’oti mirambo, 11era mu butuufu mubalirwa mu bali e magombe. Aye nga lwaki? 12Ekituufu kiri nti mwava ku nsimuko y’amagezi. 13Ngoli mwali mujiira ku ebyo Katonda by’ayenda, mwandibaire n’emiraala ebyanda n’ebyanda. 14Kale mwege aghali amagezi, n’amaani, n’okutegeera. Olwo mumanhe aghali obulamu n’obughangaazi, aghali obutangaavu obubooleka engira, era aghali n’emiraala.
153:15: Yob 28:12, 20 Naani eyaali azwireku ekifo Amagezi ghe gaba, waire okwingiraku mu iterekero lyago? 16Abalangira ab’amaghanga bali gha, n’abo abafuga ensolo? 17Bali gha abo abayiiga enhonhi ng’omuzaanho, n’abo ababunga feeza ni zaabu abantu bye beesiga einho era bye batalekera ku kunoonia? 18Bali gha abo abeeraliikirira einho nga bayiiya ensambo ey’okufunamu empiiya era ni bafaabiikana obuteerekaamu, aye nga bye bakola tibiboneka? 19Abo baabulagho ira baaja e magombe, abantu abandi bairagho mu bifo byaibwe. 20N’abato ab’oluse olwairirira baazaalibwa era baaba mu nsi. Aye boona tibaazuula ngira etuuka ghali magezi, waire okutegeera ensambo ey’okugatuukaku. 21Abaana baibwe boona baadaaliima baalemwa okuzuula engira egatuukaku. 22Abantu b’omu Kanaani tibabonangaku ku magezi ago, n’abantu b’omu Edomu tibagawulirangaku, 23waire nga baaganoonereza inho nga benda okugamanha. N’abasuubuzi b’e Merrani n’ab’e Tema boona tibagawulirangaku, waire abantu abaghaya einho engero, n’abo boonaboona abanoonereza okuzuula ghe gali.
24Imwe Abaisiraeli, ekifo Katonda mw’aba nga kikologho, n’obufuzi bwe nga bumaamiire woonawoona! 25Biziraku ghe bikoma, era ghazira ngeri ya kupimamu bugazi bwabyo oba obugungumavu bwabyo. 263:26: Mainh 6:4; Mag 14:6 Era abantu abawaigufu abaamanhibwa einho mu biseera ebyeira, eyo ye baazaalibwa nga ba bighaga era nga bakugu mu kulwana entalo. 27Aye Katonda tiyabalonda babe bantu be, waire okubooleka engira ebatuusa ku kumanha. 28Kale baafa baasaanagho olw’obusiru bwaibwe, kuba tibaali na magezi.
29Naani eyaali ajiireku ghaigulu mu igulu, okutoolayo Amagezi okugaleeta ghansi okuva mu bire. 30Naani eyaali asomoikeku enhandha okuzuula amagezi ghe gali, oba okugagula ni zaabu ow’omughendo. 31Ghazira aidhi ngeri ya kugatuukaku, oba okuzuula engira etuuka ghe gali.
32Aye Katonda aidhi buli kintu, ni yenka aidhi Amagezi. Yakozesa okutegeera kwe yaagazuula, yataagho ensi ebengagho ebiseera byonabyona era yaagiidhuza ensolo edha buli nsambo. 33Oyo yayeta obutangaavu bwamugondera nga budhugumira. Yaabulagira okuja ye yabutuma. 34Yayeta emuunienie, dhaavugira mangu geene. Buli ndala yaaja mu kifo kyayo, era dhaayaka n’eisanhu okumusiimya oyo eyadhikola. 35Oyo ni Katonda waife, era ezira ali ng’oti niye. 36Era oyo n’eyavumbula engira etuuka ku kutegeera mu bulamba bwayo, yaagha omugheereza we Isiraeli y’ayenda einho Amagezi. 37Okuva ku olwo, Amagezi gaaboneka ku nsi era gaabanga mu ife.