2
1“Kale Musengwa yaatuukiriza ekyo kye yeesoomera okutukola ife, n’abalamuzi baife, ni bakyabazinga baife, n’abafuzi baife abandi, n’abantu boonaboona ab’omu Isiraeli ni mu Buyudaaya. 2Ku nsi tikubangaku bintu ng’ebyali mu Yerusalemu, Musengwa bwe yatuukiriza bye yeesoomera okutukola, ebyaghandiikibwa mu Mateeka ga Musa. 3Ebintu byali bibi inho, twatuuka n’okulya batabane baife ni baghala baife beene eminofu. 4Agho Musengwa yaasansaania abantu baife, yaatughaayo okufugibwa amaghanga agatwetooloire, baatuvuma era baatwenhinhata. 5Mu kifo ky’eighanga lyaife okughangula abazigu baife, kabiri abazigu n’abaatughangula. Ebyo byali bityo lwa kuba twakola ebibi ye Musengwa Katonda waife, twaloba okugondera by’atukoba.
6“Musengwa Katonda waife mutuufu buliidho. Aye okutuusa ni ye buli eno ife ni badhaadha baife bye tukola bitugemya n’ensoni. 7Waire nga Musengwa yatubonereza nga bwe yatwesoomera, 8era titwakyuka ni twira y’ali kumusaba atuyambe buli muntu aleke ebyo omwoyo gwe omubi bye gwenda. 9Musengwa yategeka ebiinoino eby’okutusindikira, yaabitereka. Era yaamala yaabitusindikira, kuba mwene mutuufu mu byonabyona by’atulagira okukola. 10Aye ate twamudheemera, twaloba kujiira ku biragiro bye yatuteeragho.
Basaba Katonda abatoole mu kabi
11“Wo Musengwa, niiwe Katonda wa Isiraeli eyatoola abantu bo e Misiri ng’okozesa amaani agataloodheka, n’obumanhiso, n’ebyewuunhio, n’ebyewuninkiriza. Wayolesa amaani go ago agataloodheka, weekolera eriina ery’ekitiisa erikaaligho ni ye buli eno. 12Wo Musengwa Katonda waife, ife twayonoona, twaloba kuba beesigwa, era twadheemera ebiragiro byo byonabyona. 13Aye komya agho okutusungughalira, tusigairegho batono mu maghanga mwe watusansaaniza. 14Wo Musengwa, wulirisa okusaba kwaife n’okukwegayirira kwaife, otuwonie olw’ekitiisa ky’oli nakyo. Leetera abo abaatuleeta eno mu bunhage batusiime. 15Olwo ensi yoonayoona emanhe nga niiwe Musengwa Katonda waife, era nga walonda abantu ab’eighanga Isiraeli okwetebwanga ababo.
16“Wo Musengwa ng’oli eyo mu igulu linga ghansi obone okudaagadaaga kwaife, owulirise okusaba kwaife. 17Moga amaiso obone abafu abali e magombe, abatakaali na muuka gwe bagheera mu mibiri gyaibwe. Abo tibasobola kukusaaka oba okwatula nga bw’oli omutuufu. 18Aye abalamu bonka n’abasobola okukusaaka n’okwatula nga bw’oli omutuufu, ni bwe baba nga badaagadaaga inho ng’emigongo gyabeegheta, era nga banafu beene abalumwa endhala, nga n’okubona tibakaabona bukalamu.
19“Wo Musengwa Katonda waife, tukusaba otusaasire. Aye nga ti lwakuba nti ghaligho akalungi koonakoona badhaadha baife oba bakyabazinga baife ke baakola; 20kuba watumaliraku obusungu bwo n’ekiruyi kyo, nga bwe wali omaze okutwesoomera ng’obita mu bagheereza bo abalanzi, abaayogera ebibono byo nga bakoba bati, 212:21-23: Yer 7:34; 27:10-12 ‘Musengwa akoba ati: Mughete emigongo gyaimwe mugheereze kyabazinga ow’e Babilonia, memale musobole okusigala nga mukaali mu nsi ye nagha badhaadha baimwe. 22Aye bwe mutagondera kiragiro kyange eky’okugheereza kyabazinga oyo, 23nja kulekeza mu bibuga eby’omu Buyudaaya ni mu Yerusalemu emizira egy’abali mu binhumo ni mu kusagamba, ndekeze n’egy’abo abali mu mbaga edh’obugole. Ensi eyo ya kufuuka bifulukwafulukwa omutaba bantu.’
242:24: Yer 8:1-2 “Aye titwagondera kye watulagira okugheereza kyabazinga wa Babilonia. Kale waatuukiriza kye weesoomera okukola, kye wayogera ng’obita mu bagheereza bo abalanzi, oti amagumba ga bakyabazinga baife n’aga badhaadha baife gaja kutoolebwa mu magombe gaago gasansaanizibwe. 25Era mpegaano gaagano gasuuliibwa ku luya, akasana kagookya omusana ate empewo ey’ekiinhogogo yaagafuuwa obwire. Baafiira mu bulumi bungi, nga baitirwa mu ntalo, nga balambuka endhala, era nga bafa endwaire ya kawumpuli. 26Era olw’ebibi by’abantu Abaisiraeli n’Abayudaaya, waleetera eisinzizo lyo lyene okufuuka ebifunfugu, era nga lityo bwe likaali ni mpegaano.
27“Aye iwe Musengwa Katonda waife otuguminkiriiza inho, era waatwoleka ekivunika ekingi einho 282:28-29: Ma 28:58-62 nga bwe wasuubiza ng’obita mu mugheereza wo Musa, ku lunaku lwe wamulagira okughandiika Amateeka ng’Abaisiraeli babona. 29Wakoba oti, ‘Bwemutagondera bye mbakoba, olukunkumuli lw’abantu bano nja kulukendeeza musigale nga mubalirwa bwa ku ngalo, eyo mu maghanga ye nja okubasansaaniza. 30Nkiidhi nti timuja kungondera, kuba muli ba mpwitu. Aye bwe mulitwalibwa mu bunhage mu nsi eyindi, olwo muliiramu akategeera. 31Agho mulimanha nga ninze Musengwa Katonda waimwe, era ndibaleetera okuba abagonvu mu mwoyo n’okuba n’amatu agawulira. 32Nga muli eyo mu nsi mu bughanganguse, mulindidhukira mwansaaka. 33Mulirekera agho okuba ab’empwitu era abakozi b’ebibi, kuba muliidhukira ebyatuuka ku badhaadha baimwe, bwe baakola ebibi ni bansungughaza. 34Olwo ndibaiza mu nsi ye neerayirira okugha badhaadha baimwe: Aburahamu ni Isaaka ni Yakobo. Ensi eyo eriiramu okuba eyaimwe kabiri. Ndibongeraku obungi mwaba kamaala, era timulikendeera kabiri ni muba batono. 352:35: Yer 32:38-40 Ndikola n’imwe endagaano ey’ebyanda n’ebyanda. Ndiba Katonda waimwe era imwe muliba bantu bange. Tiriirayo kabiri kubatoola mu nsi ye nabagha imwe abantu bange Abaisiraeli.’ ”