EBIKOLWA BY’ABATUME
Enhandhula
Ekitabo kino eky’Ebikolwa eby’Abatume kyaghandiikibwa nga kyongerezebwa ku ekyo eky’Amawulire Amalungi nga bwe gaaghandiikibwa Luka. Ekikulu einho ekyagendererwa mu kukighandiika n’okutukobera abo abaatoolereza okunonereza Yesu, nga bwe baasansaania Amawulire Amalungi aga Yesu oyo, nga Mwoyo Mutukuvu n’abakulembereiremu. Baagakobera abantu “mu Yerusalemu, ni mu Buyudaaya mwonamwona, ni mu Samaria, n’okutuusa ensi y’ekoma” (1:8). Ekitabo kino kiraga ng’Obukurisito bwe bwaja nga bulanda nga busookera mu bantu Abayudaaya, okutuusa bwe bwafuuka okwikiriza okw’ensi yoonayoona. Omughandiisi era yayenda okukikakasa abasomi be ati Abakurisito tibaali na kigendererwa kya kwitaitana na kumalagho bufuzi bwa Baroma. Era yayenda okukikakasa ati endhikiriza y’Ekikurisito n’eidhuuliriza ensinza ey’Ekiyudaaya.
Ekitabo kino eky’Ebikolwa eby’Abatume osobola okukyawulamu ebimega ebikulu bisatu. Mu bimega bino tubona ng’ekiketezo abakwenda kye baakobereramu abantu Amawulire Amalungi aga Yesu, kija nga kigazigha. Era tubona ng’Ekikunsu eky’Abaikiriza mu Kurisito kimeruka. Ebimega ebyo ni bino: (1) Okwinhama kw’Obukurisito mu Yerusalemu nga Kurisito amaze okuzuukira. (2) Obukurisito okuja nga bulandira era nga bugazigha mu biketezo ebindi eby’e Buyudaaya. (3) Obukurisito okweyongera okulandira era n’okugazigha mu biketezo eby’ensi edhiriiraine Enhandha eya Ghagati n’okutuukiza irala mu Roma.
Mu kitabo eky’Ebikolwa eby’Abatume mulimu ekintu ekikologho kye tutasobola kutuumya maiso: Ebintu Mwoyo Mutukuvu bye yakola. Mwoyo Mutukuvu oyo, ku lunaku lwa Pentekote yaika ku baikiriza Yesu Kurisito nga bali mu Yerusalemu, yaabagha amaani. Era okuva ku olwo Mwoyo oyo yeeyongeranga okuja ng’alamba era ng’agha amaani Ekikunsu eky’Abaikiriza mu Kurisito n’abakulembeze baakyo. Bino byeyolekera mu ebyo ebyaligho ebyaghandiikibwaku mu kitabo kino. Obukwenda obw’Ekikurisito bwafunzibwa mu kwegeresa n’okulamba, ebiri mu kitabo kino. Era ebyo ebyaligho ebyaghandiikibwa mu kitabo kino, byoleka amaani agali mu bukwenda obwo. Amaani ago geeyolekera mu bulamu obw’abaikiriza, era ni mu kwisania okwali mu kikunsu eky’Abaikiriza mu Kurisito.
Ebirimu nga bwe biiraganwaku
Abatume bategekebwa okudhulira Yesu 1:1-26
(i) Ekiragiro kya Yesu ekyasembayo n’ekisuubizo 1:1-14
(ii) Eyasikira Yuda 1:15-26
Okudhulira Yesu mu Yerusalemu 2:1—8:3
Okudhulira Yesu mu Buyudaaya ni mu Samaria 8:4—12:25
Okwegeresa kwa Paulo 13:1—28:31
a. Olugendo lwe olw’obutume olwasooka 13:1—14:28
b. Olwekobaano olwali mu Yerusalemu 15:1-35
c. Olugendo lwe olw’obutume olwokubiri 15:36—18:23
d. Olugendo lwe olw’obutume olwokusatu 18:24—21:16
e. Paulo nga musibe mu Yerusalemu, mu Kaisaria, ni mu Roma 21:17—28:31