4
1Nkusikirira mu maiso ga Katonda ni Kurisito Yesu, aja okusalira abalamu n’abafu omusango, era aja okwira okufuga nga Kyabazinga. 2Koberanga abantu ekibono, badeebe oba bakisiima oba tibakisiima, bainhonhole, obanenie era obagumye, obeegerese n’obuguminkiriza. 3Kuba ekiseera kiri kwidha abantu balekere okuwulira okwegeresa okw’amazima, aye olw’okwenda einho okuwulira ababeegeresa ebibanhoonha, balyagala abeegeresa aba buli nsambo. 4Balirekera okuwulirisa eby’amazima, beemalira mu kuwulirisa nfumo. 5Aye iwe banga mwetegefu buliidho, gumiranga okudaagadaaga, kolanga omulimo ogw’okukobera abantu Amawulire Amalungi ng’omugheereza wa Katonda.
6Kuba nze ndi kumpi okugheebwayo ku alutaari ng’omusengo, esaawa yange ey’okuva mu bulamu buno teri ghala. 7Nwaine bukalamu olutalo, embiro ndhimaliriiza, ngumiire ku kwikiriza. 8Era mperaano Katonda ambiikiire eyo obutuufu ng’ekirabo eky’obughanguzi, Musengwa era omulamuzi omutuufu ky’alimpa ku Lunaku lule. Taligha nze zenka aye aligha abo boonaboona abeesunga okwira kwe.
Paulo by’asembyayo
9Kola kyonakyona ky’oghanga oidhe eno mangu 10kuba Dema olw’okugonza einho eby’oku nsi kuno yandekulira agho, yaaja e Thessalonika. Kuresike yaja Galatia ate Tito yaaja e Dalumatia.4:10: Kol 4:14; Filem 24; 2 Kor 8:23; Gal 2:3; Tit 1:4 11Ghano ndigho ni Luka yenka. Yagala Mariko gh’ali oidhe naye kuba anhamba inho mu kugheereza.4:11: Kol 4:14; Filem 24; Bik 12:12, 25; 13:13; 15:37-39; Kol 4:10 12Tukiko namutuma mu Efeso.4:12: Bik 20:4; Efe 6:21-22; Kol 4:7-8 13Bw’oba ng’oidha ondeetera ekivaalo kyange kye nalekera Karupo e Turoa, n’ebitabo, okusingira irala ebyo eby’empu.4:13: Bik 20:6 14Alekisandero omugheesi yankola bubi inho, aye Musengwa alimwesasuulizaaku olw’ebyo bye yankola.4:14: 1 Tim 1:20; Zab 62:12; Rom 2:6 15Weena mwegendereze inho kuba yatakania inho obukwenda bwaife.
16Lwe neewozaaku olwasooka ghazira yali ku luuyi lwange, boonaboona bandekulira agho. Aye Katonda mmusaba alobe kubalanga ekyo! 17Aye Musengwa yali ninze, era yampa amaani naakobera mu bwidhuvu abamaghanga agandi ekibono kya Katonda, baakiwulira. Olwo yamponia okunsalira ogw’okufa. 18Era Musengwa oyo aidha kumponia kiisi kibi kyonakyona, antuuse bukalamu mu Bwakyabazinga bwe obw’omu igulu. Agheebwenga ekitiisa ebyanda n’ebyanda. Amiina.
Okusiibula
19Namukiza Purisikilla ni Akwila n’ab’omu ndhu ya Onesiforo.4:19: Bik 18:2; 2 Tim 1:16-17 20Erasito yasigala mu Korintho, ate Turofimo naamuleka e Mileto nga mugodhe.4:20: Bik 19:22; Rom 16:23; Bik 20:4; 21:29 21Fuba nga bw’osobola oidhe ng’ebiseera eby’ekiinhogogo bikaali kutuuka.
Eubulo, Pudente, Lino, Kilaudia n’Abakurisito abandi boonaboona bakulamwisa.
22Musengwa abe n’omwoyo gwo. Enkabi dha Katonda dhibe n’imwe mwenamwena.