EKITABO KYA
SAMUELI
EKYOKUBIRI
Enhandhula
Ekitabo kya Samueli Ekyokubiri ekiva mu kitabo kya Samueli Ekisooka, kyogera ku byafaayo eby’okufuga kwa Daudi nga kyabazinga: ng’okusooka yafuga Yuda, nga kino n’ekiketezo ekiri ku luuyi olw’omukono omusaadha olw’e buvandhuba olwa Isiraeli (Enkenga 1–4), aye nga yamala yaafuga eighanga lya Isiraeli lyonalyona okutwalizaamu n’ekiketezo ekiri ku luuyi olw’omukono omugooda olw’e buvandhuba olwa Isiraeli (Enkenga 5–24). Ekitabo kino kyoleka bukalamu nga Daudi, olw’okwenda okugaziya obwakyabazinga bwe n’okwenhweza mu kifo kye ng’omukulembeze asembayo okuba owa ghaigulu, yali n’okuniobana n’abazigu abaali munda mwene omw’eighanga lye aghalala n’abo abaali kuliya kwalyo. Ekitabo kino kimwoleka ng’omuntu eyali n’okwikiriza okw’amaani mu Musengwa Katonda era eyeeghaayo okuba omuntu wa Katonda. Era kimwoleka ng’omuntu eyasobolanga okwikirizisa abantu be okuba abeesigwa n’okumugonza nga kyabazinga waibwe. Aye ate era kimwoleka ng’omuntu olwisi eyalinga nga tasaasira era eyalinga omwetegefu okukola ebibi ebitiisa olw’okutuukiriza ekyo omubiri gwe oba omwoyo gwe kye gwalinga gwenda saawa eyo. Aye Nathani omulanzi wa Musengwa Katonda bweyayanika ebibi bya Daudi mu maiso ga Daudi mwene oyo, Daudi oyo yaikiriza yaabyenenia era yaikiriza ekibonerezo Katonda kye yamugha.
Obulamu bwa Daudi ni bye yasobola okufuna n’okutuukaku byaleetera inho Abaisiraeli boonaboona okumutaamu ekinhagansi n’okumubona ng’eyeesiimye, kuba mu biseera ebyairirira eighanga lyaibwe bwe lyatuuka ni liba mu buzibu, beegomba inho okufunayo kyabazinga owundi nga mwidhukulu wa Daudi era ng’ali ng’oti ni Daudi mwene.
Ebirimu nga bwe biiraganwaku
Daudi afuga Yuda 1:1—4:12
Daudi afuga Isiraeli yoonayoona 5:1—24:25
a. Emyaka egyasooka 5:1—10:19
b. Ebya Daudi ni Bathisheba 11:1—12:25
c. Emitawaana n’ebizibu 12:26—20:26
d. Emyaka egyasembayo 21:1—24:25