22
Olwembo lwa Daudi olw’obughanguzi
(Zab 18)
1Agho Daudi yaayembera Musengwa Katonda olwembo luno, ku lunaku Musengwa Katonda oyo lwe yamuwonia omuzigu we Saulo n’abazigu be abandi boonaboona:
2Musengwa Katonda n’olubaale mwe neegisa,
era n’ekifo kyange eky’okwewogomamu, antoola mu bizibu.
3Musengwa Katonda ni Katonda wange,
n’olubaale lwe numukiramu okwewonia,
era n’engabo mwe neewoma;
n’omulwanirizi wange amponia byonabyona.
Musengwa Katonda n’obulumukiro bwange, era n’ekifo kyange eky’okwewogomamu,
oyo n’amponia abakambwe.
4Ndirira Musengwa Katonda okumbeera,
yamponia abazigu bange,
era agwaniire okusaakibwanga.
5Olumbe lwanzingiza,
omuzigu ng’ayenda kunsaaniagho ng’oti mataba. 22:5: Yud 1:13
6Emigugha egy’emagombe gyaneezungulula,
era okufa kwantega olutuula.
7Bwenali ndi mu buzibu, nasaba Musengwa Katonda,
naalirira Katonda wange ambeere;
yaawulira amamiro gange ng’ali mu isinzizo lye,
era okulira kwange kwamutuuka mu kutu.
8Olwo ensi yaayuuga, yeesunda,
emisingi egy’eigulu gyatengeeta era gyadhugumira;
kuba agho Musengwa Katonda yali asungughaire.
9Omwosi gwamuva mu nhindo,
ate enimi edh’omuliro n’amanda agaaka, byamuva mu kanwa.
10Yaigulagho eigulu yaika ku nsi
nga ghansi gh’ebigere bye ghaligho ekire ekiirugavu bezigizigi.
11Yaika ng’ali ku kitonde ekiri n’amaghagha ekyetebwa kerubi,
era nga kiri kuguluka naye,
baamubona ng’ali kuziinhuukira mu mpewo.
12Yeeghemberera enzikiiza,
era yeegisa mu bire eby’amaadhi agazigwire.
13Mu bimyanso ebyali agho, mwavaamu amanda agaliku enimi edh’omuliro.
14Musengwa Katonda yaatyabuka oti lukuba mu igulu,
oyo Ali Ghaigulu Yeene yaayogera n’amamiro ge.
15Yaalasa obulaso bwe yaasansaania abazigu be,
yaamyansa olukuba yaababingagho.
16Musengwa Katonda bwe yabakaabukira,
n’empiriito ey’omuuka ogw’omu nhindo dhe n’ewulirwa,
emisingi egy’ensi gyayerulwa,
n’entobo y’enhandha yaaboneka.
17Okuva ghaigulu eyo, yagolola omukono gwe yantoola,
yaanhinhulula mu maadhi agenda okuumira.
18Yamponia abazigu bange ab’amaani n’abo abankyagha;
kuba baali ba maani inho okunsinga.
19Baanumba ku lunaku lwe nali mu buzibu obutaloodheka,
aye Musengwa Katonda yambeera.
20Yantuusa mu kifo ekigazi
yaabamponia, kuba nali nga nkola by’ayenda.
21Musengwa Katonda yansasula ng’ajiira ku butuufu bwange
yampa enkabi dhe, kuba nziraku musango.
22Nze njiira ku biragiro bya Musengwa Katonda,
era tigwangaku mu kibi kya kudaaliima kuva ku Katonda wange.
23Ebiragiro bye byonabyona mbigema butiribiri,
era mu mateeka ge ghazira lye ngayaalirira.
24Mu maiso ge nzira musango,
era neekuuma ndobe kugwa mu kibi.
25Musengwa Katonda kyava n’ansasula ng’ajiira ku butuufu bwange,
era ng’ajiira ku ky’okuba nti nzira musango mu maiso ge.
26Oli mwesigwa eri abeesigwa,
era waaba wa mazima eri ab’amazima.
27Oli mutukuvu eri abo ab’emyoyo emitukuvu,
olabukira mangu abo abakozi b’ebibi.
28Olokola abo abagonvu
aye olingirira abo abeetwala nga ba ghaigulu, waabaisa ghansi.
29Wo Musengwa Katonda, bwenebwene oli itaala lyange,
era niiwe Katonda wange amuliikirira mu nzikiiza.
30Ku lulwo nsobola okughangula eigye eiramba;
iwe Katonda wange ombeera naaghalampa ebisenge mwe beegisa.
31Katonda ono, kiisi ky’akola kiba kituufu,
kiisi ky’asuubiza akituukiriza,
era yaaba ng’oti ngabo
eri abo abamweyuna okubawonia.
32Ghazira Katonda wundi okutoolaku Musengwa Katonda;
ghazira lubaale lundi lwa kwewogomamu okutoolaku Katonda waife oyo.
33Katonda oyo n’ekifo ekigumu eky’okwewogomamu,
era yantoolera mu ngira ebizibu.
34Yangumya ebigere ku itaka ng’oti bya mpongo22:34: Hab 3:19
era yangumiza irala eyo ghaigulu mu nsozi.
35Andhegeresa okulwana olutalo,
naasobola okukozesa akalaso kale keene ak’ekyuma eky’ekikomo.
36Iwe Musengwa Katonda, onkuuma era wandokola
era olw’okumbeera kwo ndi mukologho.
37Ogha ebigere byange okwetaaya nga ghazira angemaku,
byaloba kutyerera ni ngwa.
38Nabingirira abazigu bange naabatuukaku, naabazikiriza,
era tyakyusa kwira okutuusa nga mmaze okubamulungula.
39Nabamulungula naabafumitafumita baaba nga tibaghanga kusituka,
baagwa ku itaka naabaniinaniinaku.
40Niiwe owampa amaani ag’okulwana olutalo olwo,
abo abaanumba waabasuula ku itaka naabaniinaniinaku.
41Waleetera abazigu bange okukyuka baalumuka naababona bwa nkoone,
naazikiriza abo abankyagha.
42Baakanula amaiso aye nga tibabona wa kubawonia,
baalirira Musengwa Katonda aye yaaloba kubavugira.
43Nabasekula, naabasa baaba ng’oti nkungu;
naabatyankirira ng’oti bityanka eby’omu nguudo, naabasansaania.
44Wamponia abantu abadheemu,
wanfuula omufuzi ow’amaghanga kamaala
abantu be nali tiidhi waabafuula bagheereza bange.
45Abamaghanga agandi baidha ye ndi nga baavula bwavule;
olwampuliraku bati, baatoolera okugondera ebiragiro byange.
46Emyoyo gyabawaamu ira,
era baavaayo mu bufo bwaibwe obugumu obw’okwegisaamu nga badhugumira.
47“Musengwa Katonda mulamu! Oyo olubaale mwe neewogoma asaakibwenga;
Katonda oyo obulokozi bwange agulumizibwenga!
48Katonda oyo, anwaniragho abazigu bange,
n’ampangulira amaghanga ni ngafuga,
49yamponia abazigu bange.
Bwenebwene ombeedie, abaanumbagana baasigala ghansi;
omponiiza abo abakola eby’obukambwe.
50Kale ni nnaakusaakanga mu maghanga goonagoona,
era naayembanga nga nsaaka eriina lyo.22:50: Rom 15:9
51Katonda agha kyabazinga y’agonza obughanguzi,
oyo ye yalonda amwoleka nga bw’amugonza einho,
era oyo nga ni Daudi ni baidhukulu be ebyanda n’ebyanda.”