9
Musengwa abonereza Antioko
(1 Bamak 6:1-7; 2 Bamak 1:11-17)
1Agho mu kiseera kumpi n’ekirala ekyo, Antioko yali ali kwesenda kwira inhuma ng’ava mu Perusia, ng’ali kughaba bughabe. 2Eyo yali ajiireyo, yaingira mu kibuga Perisepoli, yaagezaaku okunhaga eby’omu isinzizo n’okughamba ekibuga ekyo. Aye abantu baayo baagema eby’okulwanisa baamulumba, ekyo kyaghaliriza eigye lye okukyusa okwirayo einhuma nga baswaire. 3Bwe yatuuka mu Ekubatana baamukobera ebyatuuka ku magye ga Nikanori ni Timotheo. 4Agho yaasungughala ebitaloodheka, era yaasalagho aje yeesasuulize ku Bayudaaya olw’okumughangula. Kale yaalagira omuvuzi w’ekigaali kye eky’omu lutalo obuteemerera okutuusa nga batuuse mu Yerusalemu. Yaakoba nga yeenayeena aidhwire olukudumo ati: “Nja kufuula Yerusalemu lwambiidhi, nga lwidhwire magombe ga Bayudaaya.”
Aye yali taidhi nga yali ali kuja ye Katonda kumusalira musango. 5Era olwamala okwogera ebibono ebyo, Musengwa Katonda wa Isiraeli, oyo abona woonawoona, yaamulwaza endwaire etaboneka era etawonezeka. Yaatoolera okuwulira obulumi obungi einho mu byenda nga tibusalaku naire. 6Ekyo nga n’ekibonerezo ekyamugwanira, kuba yeena yakola bantu baine ebikolwa eby’obukambwe ebitali bya nsambo ndala. 7Aye ate ekyo tikyamulekeza kuba na lukudumo, aye kyamwongeramu bwa kwekuluntaza na kwesoomera Bayudaaya mu busungu obwali ng’oti bwa muliro. Agho yaalagira omuvuzi ayongere bwa ku mbiro dhe yali ali kuvugiraku ekigaali. Era ekyavaamu, mwene yaava mu kigaali kye ekyo eky’omu lutalo, yeefuntula ekigwo kyenekyene ekyamuviiramu buli igumba okumuluma. 8Okwekuluntaza n’olukudumo bye yali nabyo, byamuleetera okwerowooza nti yali n’obuyinza obusinga obw’abantu obuntu, obwandimusobozeisa okufuga okwefuukuula okw’enhandha n’okupima ensozi endeeyiriri ku minzaani. Aye mu kaseera buseera, yaja yeeyala ghansi ekigwo, baamutoolagho nga bamubbeedeire bwa ku kintu. Ako kaaba akamanhiso akaboneekerera ak’obuyinza bwa Katonda eri buli muntu. 9Okumanha nga bwenebwene omusaadha oyo eyali atatya Katonda yabonerezebwa, omubiri gwe gwonagwona gwaidhula enhengere gwavunda. Yaaba mu nnaku ey’obulumi obutoogerekeka. Ekiwunha kyaleetera eigye lyonalyona okwegoga, 10era abantu nga tibakaaseeta gh’ali okumuginga bamutoole ghano bamwize ghale. Ate nga mu kaseera akatono akaali kaakabitagho yali yaakamala okwerowooza nga bw’asobola okugemerera emuunienie edh’oku igulu.
Antioko yeeyama eri Katonda
(1 Bamak 6:8-17)
11Antioko enaku yaamugema inho era yaadaagadaaga n’obulumi obutasalaku, olw’ekibonerezo Katonda kye yamugha. Okutuusa lwe yairamu amagezi n’alekayo okwekuluntaza n’olukudumo. 12Era bwe yabona nga ni mwene yeena takaaghanga kugumira kiwunha kye mwene, yaakoba ati: “Bwenebwene abantu boonaboona bagwaine okugondera Katonda, n’obuteerowooza bati basobola okwagayaga naye.” 13Agho omusaadha oyo omwonoonefu yaamala yeeyama eri Musengwa, waire ng’ekiseera kya Musengwa oyo eky’okumusaasira kyali kiwoireku. 14Yaamusuubiza ati ekibuga Yerusalemu kye yali ali kweyuna akifuule olwambiidhi olwidhwire amagombe g’Abayudaaya, buti aja kukigha eidembe. 15Antioko oyo yalowoozanga ati emirambo gy’Abayudaaya tigigwaniire na kuziikibwa, okutoolaku okusuulibwa obusuulibwe aghalala n’egy’abaana baibwe, ensolo edh’omu nsiko n’enhonhi dhigirye. Aye buti yali ali kusuubiza ati baidha kutwalibwanga nga mu buntu baagayaga n’abatyamye ab’omu Athene. 16Eisinzizo yali alinhagulwiremu ebintu byamu ebitukuvu ebikozesebwa. Aye buti yali ali kusuubiza okuliidhuza ebirabo ebirungi einho, aliteemu n’ebikozesebwa ebirungi einho okusinga n’ebyalimu. Era atoolenga ku misolo egigye gy’aghooza, asasulirenga byonabyona ebinaabanga byetaagibwa mu kughaayo emisengo. 17Okwongereza ku ebyo byonabyona, yaasuubiza okufuuka Omuyudaaya, ajenga kiisi aghaba abantu ng’abakobera ku buyinza bwa Katonda.
Embaluwa Antioko ye yaghandiikira Abayudaaya
18Agho Antioko ng’amaze okuwaamu eisuubi era nga tali kubona ngeri yaawona bulumi bwe yalimu olw’okubonerezebwa Katonda nga bwe yali agwaine, yaaghandiikira Abayudaaya embaluwa eno:
19“Nze kyabazinga Antioko mbalamwisa imwe Abayudaaya abatyamye ab’omu bwakyabazinga bwange. Era mbendeza mube balamu, n’ebintu bibajiirenga bukalamu.
20“Mba musangaavu imwe n’ab’omu maka gaimwe bwe muba obulungi n’ebintu ni bibajiira obukalamu. Nze eisuubi lyange liri mu Katonda, 21era bwe ndidhukira ekitiibwa kye mumpa n’omwoyo omulala, mbagonza inho.
“Bwe nali ndi mu ngira nga ndi kuva e Perusia okwirayo eka, obulwaire obw’amaani bwangema. Kale naabona ng’ekisinga bukulu n’okukola entegeka enaaleetera abantu boonaboona okuba obulungi. 22Nkaali kuwaamu isuubi lya kuwona bulwaire buno mu butuufu ndi n’obwesige bwonabwona nti nja kuwona. 23Aye ndidhukira nti lata wange yatangagho ow’okumusikira buli lwe yajanga mu ntalo mu biketezo eby’eitale mu buvandhuba. 24Yakolanga atyo nga bweghabaagho ekigwiregho amangumangu, oba ni ghabaagho amawulire amabi agaviireyo, ng’abantu ab’omu bwakyabazinga bwe tibaba na kutya inho nga baidhi oyo eyasigalagho okubakulembera. 25Ate era ndidhi ng’abafuzi abali ku nsalosalo edh’obwakyabazinga bwange baguniriire okukozesa akakisa koonakoona akaba nga kaidhiegho. Kyenviire ntaagho mutabane wange Antioko okunsikira ku bwa kyabazinga. Emikuzi kamaala mbairenga nga mmuleka mu mikono gyaimwe okumulabirira era nga mmubooleka buli lwe najanga okulambuula ebiketezo eby’eitale mu buvandhuba. Ebyo ebiri mu mbaluwa eno, yeena mbimughandiikiire naabimugheereza. 26Kale ndi kubasaba era naabeegayirira obuteerabira ebirungi bye nabakoleranga buli muntu ku lulwe, ni bye nabakoleranga eby’aghalala ng’eighanga. Muje mu maiso mutyo n’okundaga omwoyo omulungi, nze mwene era ni mutabane wange. 27Nkakasa nti aja kubafugiranga ku mateeka nga tasaliriza, era abenga wa kisa nga nze bwe mbairenga nga nkola.”
28Kale, omutemo oyo eyavuma Katonda, atyo bwe yadaazibwadaazibwa ebiinoino ebitoogerekeka nga bye yatuusa ku bandi. Era yaamala yaafa ng’omughafu mwene, ng’afiira eyo mu nsozi mu nsi etali yiye. 29Mukagwa we mulala ye baayetanga Filipo, yaizaayo omulambo gwe eka. Aye olw’okuba yatya mutabane wa Antioko oyo, yaamala yeeyongerayo, yaaja ewa kyabazinga eyali ow’e Misiri mu kiseera ekyo, nga bamweta Putolemi Filometori.