7
Omukazi ni batabane be baitibwa olw’endhikiriza yaibwe
1Ghaligho olundi, omukazi Omuyudaaya ni batabane be omusanvu bwe baagemwa ni bateebwa mu ikomera. Baaba eyo nga kyabazinga alagiire babakube, babakake okulya emamba ey’embiidhi etaikirizibwa mu mateeka g’endhikiriza yaibwe.7:1-32: Heb 11:35-36 2Agho owundi ku baisuka abo yaakoba ati: “Kino kye muli kutukola musuubira kukifunamu ki? Ife kasinga tufa, aye tutaviire ku mateeka ga badhaadha baife.”
3Kino kyaleetera kyabazinga okusungughala ebitaloodheka, era yaalagira baleete seepiki n’entamu badhite ku muliro dhisuughe dhengerere. 4Era ekyo kyakolebwa amangu n’embiro. Agho yaalagira abasaadha be basale mu mwisuka eyayogera olulimi, baamubaageku n’oluwu ku mutwe gwe, bamutemeku n’emikono n’amagulu, nga inhina ni baganda be omukaaga balingiriire. 5Omwisuka oyo bwe baamala okumufuula ekintuntu ekitaghanga kweyamba, kyabazinga yaalagira bamubbeede ng’akaagheera bamusuule mu seepiki eyindi ku dhire edhaali ku muliro. Ekikoomi eky’omwosi bwe kyasituka mu seepiki eyo ni kigema agho woonawoona, baganda be n’inhina buli muntu yaagumya baine bafe nga tibatya. 6Baakoba bati: “Musengwa Katonda ali kubona era ategeera bukalamu okudaagadaaga kwaife. Era ekyo Musa yakirambika bukalamu bwe yaghandiika olwembo oluvumirira abo abava ku Musengwa, ati, ‘Musengwa aja kusaasira abo abamugheereza.’ ”7:6: Ma 32:36
7Omwisuka oyo eyasooka bwe yamala okufa atyo, abaisirukale beesanhukiza ku wokubiri. Baamusisibula ku mutwe gwe oluwu n’enviiri dhaaku. Baamala baamubuuza bati: “Buti onaalya emamba y’embiidhi, oba oyenda tukutemeku emikono n’ebigere kirala kirala?”
8Yaabairamu mu lulimi lwe oluzaaliranwa ati: “Tija kugirya.” Kale abaisirukale baamukola eby’obukambwe nga bwe baali bamaze okukola muganda we eyasooka. 9Bwe yali aja okufa yaakoba kyabazinga ati: “Omulaame iwe! Osobola okutwita buti, aye Kyabazinga ow’eigulu n’ensi aja kutuzuukiza tuve mu bafu atughe obulamu obutawaagho, kuba tufiire lwa kugondera mateeka ge.”
10Oyo bwe yavaagho, abaisirukale beesanhukiza ku wokusatu. Bwe baamulagira okutoolayo olulimi lwe, yaakikola mangu inho. Yaamala yaayandhuluza n’emikono gye n’obugumu. 11Era yaakoba ng’aziramu kutya naire, ati: “Katonda n’eyampa emikono gino. Aye amateeka ge gali n’amakulu mangi ye ndi okusinga emikono gyange, era ndidhi nti Katonda oyo aligindhiriza kabiri ye bwidha.” 12Kyabazinga ni be yali nabo agho beewuunhia obugumu bwe, olw’obutatya kudaazibwadaazibwa mu bukambwe.
13Ng’amaze okufa, abaisirukale baagema owokuna, yeena baamukola eby’obukambwe mu nsambo n’endala eyo. 14Bwe yali afa yaakoba ati: “Ndi musangaavu okuba nga ndi kwitibwa bantu, kuba tuli n’obukakafu nti Katonda aja kutuzuukiza. Aye iwe kyabazinga toja kuzuukirira bulamu naire.”
15Abaisirukale bwe baagema omwisuka owokutaanu ni batoolera okumukola eby’obukambwe, 16yaalingirira kyabazinga mu maiso butereevu, yaamukoba ati: “Oli n’obuyinza okukola kyonakyona ky’oyenda waire nga weena oli muntu buntu alifa. Aye otadhuuba oti Katonda alekuliire bw’agho abantu ab’eighanga lyaife. 17Kale Iwe teega bwa buteege. Oidha kubona nga bw’akozesa obuyinza bwe obutaloodheka, akukole eby’obukambwe iwe n’abaana bo n’abaidhukulu.”
18Oyo bwe yavaagho, abaisirukale baagema omwisuka owomukaaga baamukola birala ebyo. Oyo ng’aja okufa yaakoba ati: “Loba kwerimba biziramu, kuba ife tuli kudaazibwadaazibwa nga bwe tugwaniire olw’ebibi bye twakola eri Katonda waife. Eyo n’ensonga lwaki ebintu bino ebitiisa biri kutukolwaku. 19Aye iwe ali kugezaaku okulwanisa Katonda, otadhuuba naire oti oja kuwona okubonerezebwa.”
20Inhaibwe n’eyasinga okwewuunhisa abantu era agwaniire okwidhukirwanga. Waire nga yabona abaana be boonaboona omusanvu nga bazikirira mu lunaku lulala luti, yakiguminkiriza n’obugumu obw’amaani olw’okwesiga inho Musengwa. 21Yayimbira okulumirwa omwoyo okw’ekikazi n’okuguma omwoyo okw’ekisaadha, yaakoba buli mulala ku batabane be ebibono ebimugumya mu lulimi lwaibwe, 22ati: “Tiidhi nsambo ye watondebwamu mu nda yange. Ti ninze eyakugha obulamu, waire okukutaamu omuuka gw’ogheera. Era ti ninze nayungayunga ebitundu byo eby’omubiri. 23Katonda mwene n’eyatonda ensi n’eigulu, yaawumba abantu baazaalibwa, era mwene oyo n’ensimuko ya buli kintu. Olw’okusaasira kwe aja kukwiriza obulamu bwo n’omuuka ogw’okugheera, kuba ogonza amateeka ge okusinga bwe weegonza iwe mwene.”
24Kyabazinga Antioko yaawulira mule nga inhina w’abaisuka abo yali ali kumunhoomoola era nga by’ali kwogera biri kumuvumirira. Kale yaagezaaku okwikirizisa omwisuka asembayo obuto eyali nga n’akaasigairegho, ave ku mpisa dha badhaadha be. Tiyakoma ku kumusuubiza kya kumufuula mukombe na kumanhikana inho kyonka, aye yalayira n’okulayira nga bw’aja n’okumufuula omufuzi, amughe n’ekitiibwa okwetebwanga “Mukagwa wa Kyabazinga.” 25Aye omwisuka tiyamulaadha naire. Kale kyabazinga Antioko yaayeta inhina w’omwisuka oyo, yaamupikiriza aikirizise omwana we asobole okuwonia obulamu bwe. 26Bwe yamupikiriza einho, inhina w’omwisuka yaaganha. 27Aye bwe yakutamira ye mutabane we, yaasirughaza kyabazinga oyo kalibukambwe, yaakoba omwisuka mu lulimi lwe ati: “Mwana wange, nsaasira. Idhukira nga namala emyezi mwenda ng’oli mu nda yange, naakwonseza emyaka esatu. Naakulera era naakulabirira okukutuusa ku myaka gy’oliku. 28Kale ndi kukweghemba mwana wange, olinge ku igulu ni ku nsi obone ebintu byonabyona ebibiriku. Okitegeere ng’ebyo byonabyona Katonda n’eyabikola nga ghaziragho bindi mw’abitoola era nga bwe yatonda abantu. 29Otatya mutemo ono. Ghaayo obulamu bwo kyeyendere, okakase nti bwene ogwaine okuba aghalala ni baganda bo abo. Olwo Katonda, olw’ekisa kye, asobole okukwiza ye ndi ghalala nabo mu kuzuukira.”
30Yali akaayogera, ng’omwisuka akoba ati: “Kyabazinga Antioko okaateega ki? Nze tija kugondera biragiro byo. Nze ngondera biragiro biri mu Mateeka Musa ge yagha badhaadha baife byonka. 31Iwe ojiire ng’oyiiya ebintu kamaala eby’okukola obukambwe ku Bayudaaya banaife, aye toja kuwona kibonerezo Katonda ky’akutegekeire. 32Ife tuli kubonerezebwa lwa bibi byaife byene. 33Era waire nga Musengwa waife omulamu atusungughaliire okumala akaseera yaatunenia ng’atukangaivula, aja kumala atusonighe era atughe okwisania naye, kuba era tukaali bagheereza be. 34Aye iwe asinga kuba mubi era asinga kuba mwonoonefu mu bantu boonaboona, leka kwesuuta na kwekudumbaza biziramu, ng’ate oli kutuntuza abantu ba Katonda. 35Ghazira ngeri y’onaawonamu kubonerezebwa Katonda Aghanga Ebintu Byonabyona era abona woonawoona. 36Baganda bange bamaze okugumira obulumi obw’akaseera obuseera, era buti baingiire mu bulamu obutawaagho Katonda bwe yabalagaania. Aye iwe Katonda aja kukusalira omusango, era akubonereze nga bw’ogwaine olw’okwekuluntaza kwo. 37Zeena ndi kughaayo obulamu bwange n’omubiri gwange ku lw’amateeka ga badhaadha baife nga baganda bange bwe bakoze. Aye era nsaba Katonda atezeeku okugemerwa abantu be ekivunika. N’iwe akuleetere okudaazibwadaazibwa, okutuusa lw’olighalirizibwa okwatula oti mwene yenka ni Katonda. 38Nze ni baganda bange tugwananga twaba nga niife otunaasembayo okudaazibwadaazibwa obusungu bwa Katonda Aghanga Ebintu Byonabyona, kwe yaleeta ku ighanga lyaife lyonalyona nga bwe kyaligwanira.”
39Ebyo omwisuka bye yakoba byaleetera kyabazinga Antioko okusungughala ebitoogerekeka, yaalagira bamukole eby’obukambwe einho okusinga ku baine boonaboona olw’obunhoomi bwe obwo. 40Kale omwisuka oyo yaafa nga mwesigwa era nga mwesimbu ye Musengwa n’omwoyo mulala.
41Oluvainhuma lwa boonaboona, inhaibwe yeena baamwita.
42Ebyo bye nkobye ebigema ku bukambwe obwakolebwanga ku Bayudaaya, n’engeri ye baakakibwangamu okulya emamba ey’ensolo edhaagheebwangayo ng’emisengo, biidha kumala.