6
Abayudaaya bakirigibwa olw’endhikiriza yaibwe
1Ebyo nga biwoire era nga ghakaali na kubita kiseera kireeyi, kyabazinga yaatuma omukiise ku lwekobaano olw’e Athene, aidhe akake Abayudaaya okuva ku ndhikiriza yaibwe n’okuleka empisa dha badhaadha baibwe. 2Yamutuma n’okwonoona eisinzizo lyaibwe e Yerusalemu, ng’alifuula libe lya Zeo omusambwa ogw’e Olimpia.6:2 Zeo: Guno nga n’omusambwa omukulu ogw’Abagureki, era nga kyalowoozebwanga nti gwabanga ku lusozi Olimpo. Ate eisinzizo eryalinga ku lusozi Gerizimu alituume eriina “Eisinzizo lya Zeo omusambwa ogusangaalira abageni”, ng’abatyamye b’eyo bwe baasaba.
3Okutuntuzibwa okw’Abayudaaya okwo kwali kwa bukambwe ekibitiriire, nga tikuguminkirizika. 4Abamaghanga agandi nga bakolera mu isinzizo ebinhumo eby’okunhwa omwenge n’ebikolwa ebindi eby’obwonoonefu bw’empisa, baatuuka n’okulitendukangamu ni bamalaaya, n’okulireetangamu ebintu ebitaikirizibwa. 5Nga bagheerayo ku alutaari emisengo egyenhinhalwa egitaikirizibwa mu Mateeka. 6Abantu nga tibakaasobola kukuuma lunaku lwa Sabbato, oba okukuza ebibinuko ebyalagirwa, waire n’omuntu okwikiriza obwikirize ati Muyudaaya. 7Buli mwezi abantu bwe baakuzanga olunaku kyabazinga lwe yazaalibwaku, Abayudaaya nga bakakibwa bya ntaka okulya ebyenda eby’ensolo edhaagheebwangayo ng’emisengo. Era ku kibinuko eky’okwidhukira Dioniso omusambwa ogw’omwenge ogw’emizabbibu, Abayudaaya nga bateekwa buteekwe okwedholiga ku mitwe gyaibwe n’amakaba g’emiti, memale baakumbanga mu nhiriri. 8Putolemi6:8 Putolemi ( 4:45) mu bighandiiko ebindi mulimu nti abantu ab’e Putolemai. yaaleeta amagezi ag’okutaagho ekiragiro ni mu bibuga ebindi eby’Abagureki ebyali biriinaine agho, Abayudaaya abaabirimu babe nga bateekwa okulya ku mamba ey’ensolo edhaagheebwangayo okwitibwa ng’emisengo. 9Era ng’Omuyudaaya yeenayeena aloba okujiira ku mpisa edh’Abagureki, aitibwa bwitibwe. Agho kyaba nti baali boolekeire ebiseera ebizibu einho. 10Ghaligho eky’okuboneraku nga kino ekyaligho: Olwatuuka ghaabaagho abakazi babiri be baagema lwa kubaagaana nga batwaire abaana baibwe baabaghaayo okubakeketa. Kale baatambuza abakazi abo nga bagemereire abaana baibwe mu bifuba, baabeezunguluza ekibuga. Oluvainhuma baabaniinisa ghaigulu ku kimante ekyezungululanga ekibuga, baabasuula ghansi.6:10: 1 Bamak 1:60-61 11Ate olundi abantu baaseeghera Filipo bati ghaligho Abayudaaya abeesololeza mu mpuku eyali okumpikumpi agho bakuze olunaku lwa Sabbato mu ngiso. Filipo oyo yaabajiira era yaabookya boonaboona nga balamu. Olw’okuba baali bata ekitiibwa kinene inho mu lunaku lwa Sabbato, baaloba kwerwanaku kuwonia bulamu bwaibwe.6:11: 1 Bamak 2:32-38
Musengwa abonereza era yaasaasira
12Mbeeghembye imwe abali kusoma ebintu bino ebitiisa ebyaligho, mulobe kuwaamu maani. Mukitwale muti ebyo byabaagho ti lwa kuzikiriza ighanga lyaife, aye lwa kulibonereza bubonereze. 13Mu butuufu okubonereza omuntu nga yaakamalanga okukola ekibi kaba kamanhiso ka busaasizi, okusinga lw’alekebwa agho okumala ekiseera ekinene. 14Musengwa tatubisa nga bw’abisa abamaghanga agandi. Abamaghanga agandi abaguminkiriza, yaateegerera ebibi byaibwe byabitirira obungi ng’akaali kubabonereza. 15Aye ife atubonereza nga tukaali kwona inho kibitiriire. 16Kale buliidho ayoleka okusaasira kwe eri ife abantu be. Waire nga ghaligho lw’atuleka ni tugwa mu buzibu obw’amaani ng’ayenda atubonereze, aye era tatulekulira agho. 17Ebyo bye mpandiise biri ng’eky’okweidhukizangaku obweidhukize. Buti ka tuje mu maiso ni bye tubaireku.
Eleazari aitibwa olw’endhikiriza ye
18Ghaaligho munamateeka mulala eyayetebwanga Eleazari, nga mukulu mu myaka era ng’ateebwamu inho ekinhagansi. Omusaadha oyo baali bali kumwasamia bya ntaka bamute emamba ey’embiidhi mu kanwa.6:18: Lev 11:7-8; Heb 11:35 19Aye mwene yaasalagho kasinga okufa ng’ali n’ekitiibwa, okusinga okuba omulamu aye nga mwonoonefu. Kale yaafuudha ere emamba era mwene yaatambula aghazira kukakibwa, yaaja mu kifo ghe baadaakizadaakizanga abantu mu bulumi obutaloodheka. 20Olwo yaaba ng’ayoleike nti abantu bagwaine okugumanga, balobenga kulya bintu bitali birongoofu, waire ng’okukola ekyo kubatuusa ku kufiirwa obulamu bwaibwe. 21Abantu abaategeka omukolo ogw’okulya emamba eyo ogumenha amateeka ag’Ekiyudaaya, baali bakagwa ba Eleazari okumala entangama ndeeyi. Kyebaava bamwiza gha mbali baamukoba mu kyama mwene aleete emamba y’aikirizibwa okulya, olwo yeefuule abe ng’oti ali kulya emamba ey’embiidhi ere kyabazinga ye yalagira. 22Ekyo kimuwonie okwitibwa era ni beene bamubise bukalamu olw’omukwano gwaibwe naye ogwali gulwiregho.
23Aye Eleazari yali amaze okusalagho ekyo omuntu ow’emyaka ng’egigye n’ow’envu nga dhe yali nadho kye yali agwaniire okukola, kuba yali wa mpisa obulamu bwe bwonabwona era ng’agondera Amateeka ga Katonda amatukuvu. Kale yaabairamu ati: “Mundhite nje e magombe. 24Obuguya obw’ekika ekyo tibugwaniire muntu wa myaka gyange, kuba abakaali abato basobola okudhuuba bati neegaana endhikiriza yange ku myaka gino ekyenda (90) gye ndiku. 25Bwe neefuula okuba ng’oti ndi kulya emamba eyo olw’okwenda okusigalaghooku akaseera nga nkaali mulamu, ekyo kireetera nze kuswala na kunhoomebwa era kyaleetera n’abakaali abato okudaaliima. 26Buti nsobola okwewonia ekibonerezo abantu obuntu kye bampa. Aye ni bwe mba omulamu oba ni bwe nfa, tisobola kwetoola mu buyinza bwa Katonda Aghanga Ebintu Byonabyona. 27Bwe nfa nga nziramu kutya naire, ndidha kwoleka nga kyangwanira okughangaala. 28Era ndidha kuba kya kuboneraku kirungi eri abakaali abato, ku ngeri ye bagwaine okuba abasangaavu mu kweghaayo okufiiririra amateeka gaife amatukuvu era agateebwamu ekitiisa.”
Olwamala okwogera ebibono ebyo ati, ng’aja6:28 ng’aja mu bighandiiko ebindi mulimu nti baamukwekwebya okumutwala. mu kifo ghe baadaakizadaakizanga abantu mu bulumi obutaloodheka. 29Era abantu beene abo abaali baakamala okwogera naye n’omwoyo ogw’ekisa, baamwefuulira baamukambughalira, kuba baabona nga bye yayogera byali bya kiralu. 30Agho nga bamaze okumukuba einho ng’atuuse na kufa bufe, yeekaka mu bulumi yaakoba ati: “Musengwa omutukuvu n’aidhi byonabyona. Aidhi nga nandisoboire okuwona okudaazibwadaazibwa n’obukambwe obutaloodheka nti, era naawona n’okwitibwa. Era aidhi nti ndi kudaazibwadaazibwa nga ndi musangaavu olw’okuba mmutya.”
31Kale atyo Eleazari yaafa. Aye engeri ye yafaamu nga talaga kutya naire, era yamala yaidhukirwanga ng’eky’okuboneraku eky’ekitiisa eri abakaali abato n’eri eighanga lyonalyona.