5
Okubonekerwa olutalo
1Mu kiseera kumpi n’ekirala ekyo Antioko Owokuna yaalumba Misiri omukuzi ogwokubiri. 2Okumalira irala enaku ng’oti makumi ana (40) ng’abantu ab’omu Yerusalemu mwonamwona babonekerwa abaisirukale ab’oku mbalaasi abali mu bivaalo eby’omu lutalo ebya zaabu. Nga bali kulwanira ku igulu era nga bagemye amafumo, baasowola n’empiima dhaibwe mu biruutu byadho. 3Baali basimbye enhiriri nga balingagaine, nga bano bali kulumba bale ate bale boona bwe balumba bano. Engabo nga dhiri kukontagana, amafumo gaamagalika ng’oti kire kya maadhi, n’obulaso bwaziinhuuka mu ibbanga. Ebivaalo eby’omu lutalo ebya buli nsambo, n’enkoba dha zaabu edhisibwa mu nkoto y’embalaasi okugivuga, nga biri kumesunkana mu kasana. 4Buli muntu eyali mu kibuga yaasaba ati okubonekerwa okwo kugwananga kwaba akamanhiso ak’ebirungi.
Yasoni alumba Yerusalemu
5Amawulire ag’obuguya bwe gaasansaana nga gakoba gati Antioko yafa, Yasoni yaatwala amangu ago abantu abaswika olukumi (1,000), baaja okulumba Yerusalemu. Baabingagho abaisirukale abaali bateereibwagho okukuuma ebimante ebyezungululanga ekibuga, era baamala baagema ekibuga ekyo. Menelao yaalumukagho olw’okwewonia, yaaja mu kifo eky’okwewogomamu ekyali okumpi n’olusozi olwaliku eisinzizo. 6Yasoni yaatirimbula Bayudaaya baine aghazira kusaasira naire. Yali takiidhi nga okulwanisa abantu be beene namala n’abaghangula kuba kulemererwa kwene okusingayo bubi. Yalowooza n’okulowooza ati okwo kwali kughangula bazigu, ate nga bwenebwene kwali kughangulwa kwa bantu be beene. 7Aye waire Yasoni yakola atyo, tiyasobola kutwala bufuzi. Yamala yaakakibwa kabiri okulumukira mu kiketezo eky’Abammoni. Era ku nkomerero olukwe olwo lwe yakola ghazira kalungi ke ya lufunamu, okutoolaku okuswala n’okunhoomebwa, 8era yaamala yaafa nga mughafu mwene. Yasoni oyo baamughaghabira eri omufuzi ow’Abawarabu eyayetebwanga Areta, ekyo kyamughaliriza okulumukanga okuva mu kibuga ekindi okwira mu kindi. Abantu boonaboona baamukyagha nga bamubona ng’omwizi w’emisango. Baamunhooma olw’okulya mu bantu be beene olukwe, era baamuyiiganianga yaatuuka n’okulumukiraku e Misiri okwewonia. 9Kabiri yaalumukiraku e Bugureki ng’asuubira okufuna obubudamo mu Basiparita abaali n’oluganda ku Bayudaaya. Oluvainhuma lwa byonabyona, omusaadha oyo eyaleetera abantu kamaala okulumuka mu nsi yaibwe, yaafiira mu nsi etali yiye. 10Yasoni oyo eyaitanga abantu kamaala n’abalekanga agho nga tibaziikiibwa, yeena bwe yafa ghazira yamulira naire. Ghazira yamukumira lumbe lwe, waire okumuziika mu lwambiidhi lwa badhaadha be.
Antioko alumba Yerusalemu
(1 Bamak 1:20-63)
11Kyabazinga Antioko bwe yawulira ebyali mu Yerusalemu, yaalowooza ati ensi Buyudaaya yoonayoona egwiremu akeediimo. Kale yaava e Misiri ng’aliku ekiruyi ekitakobeka, yaazinduukiriza ekibuga Yerusalemu ng’akigwaku bugwe. 12Yaagha abaisirukale be ebiragiro okutematema buli ye baagaana aghazira kusaasira naire, n’okutirimbula buli ye baagaana nga yeegisiisa mu ndhu. 13Kale baatemula buli muntu k’abe musaadha oba mukazi, abe mulenzi oba mughala, waire abe mwana mughere. 14Mu nnaku isatu busatu Yerusalemu kyali kimaze okufiirwa abantu abaghera emitwalo munaana (80,000), ng’emitwalo ena (40,000) baitibwa ate abandi abaaga batyo baatwalibwa okutundibwa ng’abairu.
15Aye era Antioko ekyo tikyamumala. Yakana yangira ni mu isinzizo erisinga butukuvu mu nsi yoonayoona, ng’akulembeirwamu Menelao eyali amaze okulya mu idiini lye ni mu ighanga lye olukwe. 16Antioko oyo yaatoola ebintu ebitukuvu ebikozesebwa mu isinzizo, yaabigema n’engalo dhe enhonoonefu, yaabinhaga. Yaatwalizaamu n’ebirabo bakyabazinga abandi bye baaghangayo olw’okwongera ku kitiisa eky’e isinzizo. 17Obughanguzi bwe obwo bwamuleetera okwekudumbaza einho. Yaaloba na kukitegeera nti Musengwa yali alese eisinzizo lye eitukuvu lyonoonebwe lityo olw’ebibi abantu b’omu Yerusalemu bye baakolanga, ebyamusungughazaamu okumala akaseera. 18Abantu b’omu Yerusalemu ngoli tibeenhigira mu kukola bibi bingi bityo, Antioko yandibaire abonerezeibwa mu kaseera keene ke yaingiriramu mu isinzizo era yandiremereirwa okukola eby’ekisiru ebyo. Ekyatuuka ku Heliodoro eyatumibwa kyabazinga Seleuko okwidha okukebera eiterekero ery’omu isinzizo, yeena n’ekyandimutuuseeku. 19Aye Musengwa tiyalonda bantu be lwa isinzizo, aye yataagho eisinzizo eryo ku lw’abantu be. 20Kale eisinzizo lyagabana ku kudaazibwadaazibwa okwatuuka ku bantu. Aye era ebintu bwe byamala ni bijiira abantu abo obukalamu, lyona byamala byalijiira bukalamu, kuba Musengwa Aghanga Ebintu Byonabyona bwe yasungughala yalirekulira agho, ate yaamala yaizaagho ekitiisa kyalyo ng’obusungu bumuwoireku.
Yerusalemu bakirumba omukuzi ogundi
21Antioko bwe yamala okunhaga mu isinzizo empiiya dha feeza edhigheza talanta olukumi n’olunaana (1,800)5:21 talanta olukumi n’olunaana (1,800): Edho nga ni kilo emitwalo ng’oti mukaaga n’enkumi ibiri (62,000) edha feeza., yaayangugha okwirayo mu Antiokia. Era olw’okwekudumbaza einho kwe yali nakwo, yeewulira mule ng’asobola okuseeyeeya mu lyato ng’ali ku bukalu ate yaatambuza ebigere ku nhandha yaagisomoka. 22Yataagho abafuzi ab’okulumyanga abantu: Mu Yerusalemu yataamu Filipo eyali asimuka e Furugia era nga mukozi wa bibi inho okusingaku ni ku Antioko mwene. 23Ku lusozi Gerizimu yataayo Anduroniko. Era okwongereza ku abo, yaliyo Menelao eyakaluubirizanga einho Bayudaaya baine okusingaku ku bafuzi bale abandi. Antioko yakyagha Abayudaaya inho, 24yaatuuka n’okusindika amagye amapangise okuva e Misia nga gaghezaamu abaisirukale emitwalo ebiri n’enkumi ibiri (22,000), baaja e Yerusalemu nga baduumirwa omusaadha ye baayetanga Apollonio. Antioko yabalagira okwita kiisi musaadha ye baagaana mu kibuga, era n’okutunda abakazi n’abalenzi ng’abairu. 25Apollonio bwe yatuuka mu Yerusalemu yeefuula ng’oti ajiireyo lwa miraala. Aye ku lwa Sabbato bwe yabona Abayudaaya boonaboona nga baali bali kukuuma eiteeka ery’okuwuumula, yaidha n’abaisirukale be nga bagemye bulungi eby’okulwanisa, baakola enhiriri ku luya okw’ekibuga. 26Agho amangu geene yaalagira abaisirukale be okwita buli muntu yeenayeena eyafuluma mu kibuga okwidha okubabona. Bwe baamala baaziinhuuka baingira mu kibuga, baatemula abantu kyodoodo.
27Aye Yuda Makkabeo n’abantu abandi nga mwenda, beibagho baaja eyo mu irungu, baaba eyo ng’oti nsolo dha mu nsiko. Olw’obutenda kweyonoona, balyanga bimera bye baayagaana eyo byonka.