2
Yeremia agisa Weema ey’Okwagaananirangamu ni Musengwa
1“Mu bighandiiko ebirigho twagaanamu ekikoba kiti Yeremia omulanzi yakoba abantu abaali nga bali kutwalibwa mu bunhage, batoole agandi ku manda ag’omuliro ku alutaari ey’emisengo bagagise, nga bwe twakamala okukighayaku. 2Twagaanamu n’ekikoba kiti Yeremia oyo yabeegeresa Amateeka ga Katonda. Era yaabalabula ati ebisinzibwa ebitali Katonda ebidholige ni zaabu ni feeza, bye baali baja okwagaana mu nsi ye baali bali kutwalibwamu mu bunhage, bitabalimbirizanga. 3Era yaabakubiriza obutavanga ku Mateeka ga Katonda ago.
4“Ebighandiiko byene ebyo era bitukobera biti Yeremia oyo ng’akulemberwa amaani ga Katonda, yalagira Weema ey’Okwagaananirangamu ni Musengwa n’Esanduuku ey’Endagaano, bimunonereze ng’ali kuniinaniina olusozi Musa lwe yaliku memale n’alinga ghansi ku nsi Katonda ye yasuubiza abantu be. 5Yeremia bwe yatuuka ku lusozi olwo yaayagaanayo empuku, yaagisa omwo Weema ey’Okwagaananirangamu ni Musengwa, n’Esanduuku ey’Endagaano, n’alutaari ey’okuniokezaaku obubbaani. Agho yaasemba omunwa ogw’empuku eyo.
6“Abandi ku bakagwa ba Yeremia oyo baagezaaku okumunonereza beetegereze engira bukalamu, aye empuku eyo yaabalema okuzuula. 7Yeremia bwe yategeera kye baakola, yaabanenia era yaakoba ati, ‘Ghatabangagho muntu yeenayeena amanha ku kifo ekyo, okutuusa Katonda lw’alisoloza abantu be aghalala kabiri, n’abagemerwa ekivunika. 8Mu kiseera ekyo mwene n’alyoleka gha ebintu ebyo ghe byagisibwa, era okumesunkana okw’ekitiisa kye kulibonekera mu kire nga bwe kwaboneka mu biseera bya Musa ni ku mukuzi gule Solomoni bwe yasaba ati eisinzizo litukuzibwe mu kitiisa.’2:8: Kuv 16:10; 24:16; 1 Bakyab 8:10-11
Ensambo Solomoni ye yakolamu embaga ey’okutukuza eisinzizo
9“Ebighandiiko ebyo era bitukobera nga kyabazinga Solomoni eyali omugezi bwe yaghaayo omusengo ogw’okutukuza eisinzizo nga liwoire okuzimbibwa. 10Era bikoba biti bwe yasaba Katonda, omuliro gwaghanuka mu igulu gwaika ku musengo, gwagusenkeenha okugumaliriragho mu nsambo yeeneyeene nga bwe gwakola einhuma ere nga Musa asabye Katonda. 11Musa oyo yainhonhola ati omuliro gwasenkeenha omusengo ogwo okugumaliriragho, kuba gwali ekigheebwayo ekitaliibwaku, ekigheebwayo olw’ekibi. 12Solomoni yakola embaga ey’ekibinuko ekyo okumala enaku munaana.
Eiterekero Nehemia mwe yakuumiranga ebighandiiko bye
13“Ebintu n’ebirala byene ebyo ebyogerwaku mu bighandiiko eby’ebyafaayo eby’obwakyabazinga, ni mu bighandiiko Nehemia bye yaghandiika ku ebyo ebyajanga nga bibaagho. Nehemia oyo yataagho eiterekero, yaasolokezaamu ebighandiiko bya Daudi, embaluwa dha bakyabazinga edhaagemanga ku bigheebwayo eri Katonda, n’ebitabo ebyagemanga ku bakyabazinga ni ku balanzi. 14Ni Yuda yeena atyo bwe yasoloza ebitabo ebyali bisansaaniziibwa olutalo, era ni ye buli eno tukaali nabyo. 15Bweghaba nga ghaligho ekitabo kyonakyona ku ebyo kye mwetaaga, mutume butume bantu baidhe bakinone, twidha kukibagha bakibaleetere.
Okwetebwa ku mbaga ey’okutukuza eisinzizo
16“Nga bwetuli okumpi okukola omukolo ogw’okwiramu okutukuza eisinzizo, tubaghandiikiire okubakubiriza mwena mukole omukolo ogwo.2:16: 1 Bamak 4:59 17Katonda alokoire abantu be boonaboona, yaatwiriza twenatwena ensi yaife entukuvu, n’obwakyabazinga, n’obwakabona, n’okutukuzibwa, 18nga bwe yatusuubiza mu Mateeka ge. Atununwire yaatutoola mu kabi akanene katyo, yaatukuza n’eisinzizo. Era tukakasa ng’aidha kutusaasira mangu inho, atusololeze mu isinzizo lye eitukuvu ng’atutoola mu maghanga goonagoona agali ku nsi.”
Enhandhula y’omughandiisi w’ekitabo kino
19Yasoni ow’e Kurene yaghandiika ebitabo bitaanu nga bigema ku Yuda Makkabeo, ni ku baganda be, ni ku kutukuzibwa okw’eisinzizo ery’ekitiibwa einho, ni ku kutukuzibwa okw’alutaari ey’omu isinzizo eryo. 20Yaghandiika ku ntalo Yuda dhe yalwana ni Antioko Epifane era ni mutabane we Eupatori. 21Yaaghandiika ni ku mikuzi emingi abo abaalwaniriranga ensinza ey’Ekiyudaaya aghazira kutya gye baabonekerwanga. Era yainhonhola ati waire abalwani baife tibaali kamaala, aye baasobola okughangula ekiketezo ekyo kyonakyona, era baasiguukululamu amagye ag’abamaghanga agandi. 22Bairamu okweiriza eisinzizo eryali nga limanhiibwa einho mu nsi yoonayoona, baanunula ekibuga Yerusalemu era bairamu okugumya amateeka agaali goolekeire okudibizibwa. Baasobola okukola ebyo byonabyona olw’okuba Musengwa yabasaasira yaabayamba.
23Buti ka ngezeeku okufunza ebyo byonabyona Yasoni bye yaghandiika mu bitabo ebitaanu, mbighandiike mu kitabo kirala. 24Olw’okuba ebyo byonabyona bye yaghandiikaku byali kamaala ate nga bighandiikiibwa mu bitabo bingi, ekyo kisobola okukaluubiriza omuntu yeenayeena eyandyenze okusoma ku byafaayo ebyo. 25Kyenviire ni ngezaaku okugonzaamuuku kyanguyire ababisoma boonaboona. Abo abanaabisomanga olw’okwesanhusa baidha kunhumirwanga, n’abo abanaabisomanga nga benda babigeme mu mutwe obutabyerabira boona kiidha kubanguyira. 26Omulimo guno ogw’okufunza ebintu ebyo mukalangafu, era gwetaagisa kukola n’amaani nga totenduka ndoolo. 27Kiri ng’oti kutegeka kugabula mbaga, ng’oli kwenda buli muntu awoomerwe nga bw’ayenda. Aye ndi musangaavu okubita mu buzibu oti n’obwo, nsobole okusiimya abaja okubisoma. 28Okwinhonhola ebyaligho byonabyona mu bwidhuvu ndidha kukirekera eyasooka okubighandiika, nze ngezeeku bwakubifunza mu bumpimpi. 29Tiri ng’oti n’omuntu omukugu azimba endhu empyaka, kuba oyo yeegendereza inho okubona ng’endhu eyo ezimbwa nga bw’eteekeirwa okuba. Aye ndi ng’oti n’asiiga obusiige langi, nga ky’ali nakyo kya kubona ng’endhu eyo eboneka bulungi. 30Eyaghandiika ebyafaayo ebyo mu kusooka, n’ateekwa okubyekebeedha n’okubitaanha obukalamu, era n’okubiinhonhola n’obwegendereza. 31Aye oyo yeenayeena aba ali kubighandiika mu bufunze, agwaine aikirizibwe okubighaya mu bumpimpi nga tamaliriireeyo byonabyona ebyaligho. 32Buti ka ndobe kwongera kuleeya nhandhula eno, aye ntoolere kughaya bughaye ebyafaayo ebyo, kuba kiba kya busiru okughandiika enhandhula n’eba ndeeyi inho, ate ebyafaayo byene ni bitawaayo.