15
Nikanori akola entegeka ey’ekikambwe
1Agho Nikanori baamukobera bati Yuda n’abasaadha be bali mu kiketezo ky’e Samaria. Kale yaategeka okubalumba ku lunaku lwa Sabbato lwe batasobola kumukoleraku kabi koonakoona. 2Abayudaaya be yakaka okumugherekeraku baamweghemba alobe kukola kikolwa ekyaga agho eky’ekikambwe era eky’ekitemo. Mu kifo eky’okukola ekyo, baamweghemba ate ekinhagansi mu lunaku Katonda oyo abona buli kintu lwe yagha ekitiisa era n’alutukuza okuwula enaku edhindi dhoonadhoona. 3Aye omusaadha oyo omubi eyakolimirwa, yaabuuza oba nga mu igulu eriyo ow’obuyinza eyabalagira okukuzanga Sabbato. 4Abayudaaya bairamu bati: “Yii, aliyo. Oyo ni Musengwa mwene omulamu ali mu igulu, era n’eya tulagira okukuzanga Sabbato.”
5Aye Nikanori yaabairamu ati: “Zeena ndi wa buyinza ku nsi, era ndi kubalagira mugeme eby’okulwanisa byaimwe, mukole ekyo kyabazinga ky’alagiire.” Aye era tiyasobola kutuukiriza ntegeka ye eyo embi.
Yuda ategeka abaisirukale be okulwana olutalo
6Nikanori olw’okwekuluntaza n’olw’okwebona nga wa ghaigulu, yali mumalirivu okuzimba ekiidhukizo abantu kwe banaategeereranga nti yaghangula Yuda. 7Aye Yuda Makkabeo yali mugumu mule nga Musengwa aja kumuyamba. 8Kale yaiza mu basaadha be amaani balobe kutya bazigu baibwe. Yaabakoba baidhukire Katonda Aghanga Ebintu Byonabyona bwe yabayambanga mu biseera ebyabita, ekyo kibaleetere okuba abagumu nga ni ku mukuzi guno aidha kubasobozesa okughangula. 9Yaayongera okubaizaamu amaani ng’abasomera ebyaghandiikibwa mu kitabo eky’Amateeka n’eky’Abalanzi, nga bw’abaidhusa n’entalo beene dhe baamala okughangula. 10Bwe yamala okubagumya atyo, yaabagha ebiragiro bye banaajiiraku, era yaabaidhusa ng’abamaghanga agandi bwe batasobola kwesigika olw’obutakuuma ndagaano dhe bakola. 11Agho yaabagha eky’okulwanisa ekisinga ng’abaizaamu amaani n’ebibono ebibagumya, mu kifo eky’okubakoba beesige engabo n’amafumo. Yaamala yaabakoberaku ni bye yabonekerwa mu kirooto kye ebyali byesigika, era ebyabaleetera boonaboona okwiramu omwoyo.
12Yaabakobera bye yabona mu kubonekerwa okwo: Nga bwe yabona Oniasi, eira eyaliiku Omukulu wa Bakabona era eyali omusaadha omukologho, ow’ekisa, omuwombeefu, omwogezi omulungi, ye baayegeresa empisa enungi okuviira irala mu buto. Yamubona ng’ayandhulwiza emikono, ng’ali kusabira eighanga lyonalyona ery’Abayudaaya. 13Yuda era yaabona omusaadha owundi ng’omutwe gwe gwidhwire nvu ndhereere, ng’ali n’ekitiibwa eky’amaani n’obuyinza. 14Oniasi yaakoba ati: “Ono ni Yeremia omulanzi wa Katonda agonza einho Bayudaaya baine, n’asabira einho abantu era n’ekibuga Yerusalemu.”
15Agho Yeremia yaagolola omukono gwe omusaadha, yaagha Yuda empiima ya zaabu, nga bw’akoba ati: 16“Gema empiima eno entukuvu, nga n’ekirabo ekiviire eri Katonda ky’onaakozesa okuzikiriza abazigu bo.”
17Olw’ebibono bya Yuda ebyo ebyali ebirungi einho, buli muntu yairamu amaani era yaaba mugumu, era ebibono ebyo byasiikuula n’abaisuka abato byabendesa okulwana ng’oti bantu bakulu beene. Baasalagho obutamala biseera byaibwe, aye baje balumbe abazigu, balwane muntu ku muntu nga bali kirala era nga baziramu ntete naire kuba ekibuga ekitukuvu n’eisinzizo byali mu kabi. 18Olwo nga kye baali bali kulumirwa einho ti bakazi baibwe na baana na baluganda, aye eisinzizo. 19N’abo abaasigala mu kibuga boona baali beeraliikirivu olwa bale abaali bali kukifuluma okuja okulwana olutalo mu nsiko.
Nikanori bamughangula era yaitibwa
20Buli muntu yali ali kuteegerera okubona naani anaaghangula olutalo. Ab’eigye ery’omuzigu baali bamaze okuseeta nga beetegeike bukalamu: ng’abaisirukale ab’oku mbalaasi bali ku ndhuyi dhombi edh’eigye, ate endhovu dhaaba mu bifo ebyekusifu. 21Makkabeo yaalingirira abaisirukale ab’omuzigu, yaabona eby’okulwanisa ebya buli nsambo bye baali nabyo n’obukambwe bw’endhovu dhaibwe. Agho yaayandhululiza emikono eri eigulu, yaasaba Musengwa akola ebyewuunhio kuba yali aidhi ng’oyo n’aleetera obughanguzi abo ababa bagwaniire, se ti abo ababa n’eigye ery’amaani. 22Yaasaba ati: “Wo Musengwa, mu biseera Hezekia bye yabeereramu kyabazinga wa Buyudaaya, watuma malaika wo yaita abantu emitwalo ikumi na munaana n’enkumi itaanu (185,000) mu igye lya kyabazinga Sennakeribu eyali ow’e Assiria. 15:22: 2 Bakyab 19:35 23Wo Musengwa Aghanga Ebintu Byonabyona, ni mpegaano ganha otume malaika wo omulungi, aidhe aleetere abazigu baife okutya era abadhagadhize. 24Kozesa obuyinza bwo obungi ozikirize abantu bano abakuvuma era buti abaidhie okulumba abantu bo be walondamu.” Agho Yuda Makkabeo oyo yaakanza agho okusaba kwe n’ebibono ebyo.
25Nikanori n’eigye lye baaseeta emberi okulwana nga bali kufuuwa amagwala era nga bali kwemba enhembo edh’omu lutalo.15:25-35: 1 Bamak 7:43-50 26Aye Yuda n’abasaadha be baajanga okulwana n’abazigu nga bwe basaba Katonda abayambe. 27Kale baalwanisa emikono aye nga mu myoyo bali kusaba Katonda. Ekyo kyabaleetera okwita abantu abawula mu mitwalo esatu n’enkumi eitaanu (35,000). Era basangaala inho olwa Musengwa okuba aghalala nabo ng’abayamba. 28Bwe baali bali kwirayo eka nga bali kusagamba olw’olutalo okuwa, baabona Nikanori ng’agalaamiriire agho mu bivaalo eby’omu lutalo era nga mufu. 29Agho baaleekaana eno nga bwe bawowoigana mu lulimi lwaibwe, era baasaaka Musengwa Aghanga Ebintu Byonabyona.
30Yuda Makkabeo oyo omusaadha eyabanga omwetegefu buli kiseera mu mwoyo ni mu mubiri okulwanirira Bayudaaya baine, era eyayendanga eighanga lye okuviira irala mu buto, yaalagira bateme ku Nikanori omutwe n’omukono gwe omusaadha, babitwale e Yerusalemu. 31Bwe yatuukayo yaayeta abantu boonaboona beesoloze. Bakabona baaja mu maiso g’alutaari, era yaayetesa n’abasaadha abaali mu kifo eky’okwewogomamu. 32Yaabooleka omutwe gwa Nikanori era n’omukono gwe omukozi ogw’ebibi gwe yasonkesa ku isinzizo lya Katonda Aghanga Ebintu Byonabyona. 33Agho yaasalamu olulimi lwa Nikanori oyo atatya Katonda, era yaakakasa nga bw’aidha okulukutulamu obukutukutu abughe enhonhi dhibulye. Yaalagira baghanike omutwe gwe gulengeedhe nga gulingiriire eisinzizo, eyo ebe nga n’empeera y’ebibi bye yakola. 34Boonaboona abaaligho baalinga ghaigulu era baasaaka Musengwa ow’omu igulu nga bakoba bati: “Asaakibwe oyo eyakuuma eisinzizo lye ni batalyonoona.” 35Agho Yuda yaghanika omutwe gwa Nikanori ku kimante eky’ekifo eky’okwewogomamu gulengeedhere okwo, ng’ako n’akamanhiso akaboneekerera okumanhisa abantu boonaboona nga Musengwa bweyabayamba. 36Abantu boonaboona baisa kirala okukuzanga olunaku olwo buli mwaka aghazira kwosaamu. Nga lwa kukuzibwanga ku lunaku olukulembera Olunaku olwa Morodekai,15:36 Olunaku olwa Morodekai: ekyo nga n’Ekibinuko ekyetebwa Purimu ( Esit 9:17-22). olwo nga n’olunaku olweikumi n’eisatu, mu mwezi ogweikumi n’ebiri ogwetebwa Adari mu lulimi Oluaramaika.15:36: 1 Bamak 7:49
Ebisembayo
37Mbeeni ebintu bityo bwe byajiira Nikanori. Okuva olwo ekibuga Yerusalemu kyasigala nga kya Baheburayi. Kale zeena ka nkanze ghano bye mbaire ndi kughaya. 38Bwe biba nga bighandiikibwa bukalamu nga bwe bigwaine bibe, ekyo zeena kye nhenda. Bwe biba nga bighandiikibwa bubi nga biziramu na muganhulo, era mbo ekyo kye nsoboire okukolaku. 39Okunhwa omwenge ogw’emizabbibu gwonka oba okunhwa amaadhi gonka kisobola okukuviiramu akabi, ate ng’omwenge ogwo bw’ogutabulamu amaadhi guwooma inho. Kityo ni bwekiri ni mu kughandiika ebinaanhumira abasomi. Nkanze agho.