14
Alikimo ayogera bubi ku Yuda
(1 Bamak 7:1-21)
1Nga ghabiseegho emyaka esatu, amawulire gaatuuka ku Yuda n’abasaadha be nga gakoba gati Demetirio, mutabane wa Seleuko, atuuse ku mwalo gw’e Turipoli ng’ali n’eigye ery’amaani n’olugololiro olw’amaato. 2Amawulire ago era gaayongera okukoba gati, Demetirio oyo yali amaze okwita kyabazinga Antioko ni Lisia eyakuza Antioko oyo. Olwo nga mwene n’ali kufuga nga kyabazinga.
3Ghaaligho omusaadha ye baayetanga Alikimo nga yaliiku Omukulu wa Bakabona, aye yeereetera okuba omwonoonefu bwe yasalagho okujiira ku mpisa edh’Abagureki mu biseera ghe baagerezaaku okudhingiza mu bantu b’omu Buyudaaya. Alikimo oyo yabona ng’azira ngeri ya kwirayo kuba Mukulu wa Bakabona, era ng’atya n’Abayudaaya okumukola akabi. 4Kyeyava n’aja ye kyabazinga Demetirio mu mwaka ogwekikumi n’ataanu n’omulala (151),14:4 mu mwaka ogwekikumi n’ataanu n’omulala (151): Ogwo nga n’omwaka ogwekikumi n’enkaaga n’omulala (161) nga Kurisito akaali kwidha. yaamutwalira engule eya zaabu, n’olusaga olw’ensansa, n’ensaga edh’omuti omwoliva, ebyagheebwangayo mu isinzizo ng’empisa bwe yali. Aye tiyayogera kintu kyonakyona kigema ku kye yagenderera mu kukola atyo. 5Aye nga ghabiseeghooku ekiseera, Demetirio yaamweta abeegho mu lwekobaano olw’abakungu be abaamughanga ku magezi, era yaamubuuza Abayudaaya kye baali balowooza ni kye baali bategeike okukola. Olwo Alikimo yaaba ng’afunie akaghagaanhia ak’okutuukiriza ekigendererwa kye eky’ekiralu.
Agho yaakoba ati: 6“Abantu Yuda Makkabeo b’akulembera, baava mu kikunsu eky’Abayudaaya abalumirwa einho eighanga lyaibwe n’ensinza yaalyo, aghazira kukyuka naire. Benda inho okusiikuula entalo n’okudheemesa abantu, era tibaja kuganha bwakyabazinga kuba mu miraala. 7Era zeena beene abo n’abantoolaku ekitiibwa kyange eky’obuzaaliranwa eky’okuba Omukulu wa Bakabona. Kale n’okwidha ghano, 8nga ndi n’ensonga ibiri: Esooka, lwa kulumirwa inho ebyo iwe kyabazinga by’oyenda, n’eyokubiri, lwa kufaayo inho ku bantu b’eighanga lyange kuba eighanga lyange lyonalyona lidaazedaaze inho olw’obusiru bwa Yuda n’obw’abo abali ku luuyi lwe. 9Isebantu kyabazinga, bw’onaamala okwetegereza mu bwidhuvu ensonga edho dhoonadhoona nga bwe dhiri, nkweghembye kozesa ekivunika kyo ekimanhiibwa woonawoona, oyambe eighanga lyaife n’abantu baalyo tuwone okutulugunhizibwanga; 10kuba Yuda ng’akaali mulamu, eighanga lyaife tirija kuba na miraala naire.”
Demetirio atuma Nikanori okulumba Yuda
11Alikimo olwamala okwogera ebyo ati, bakagwa ba kyabazinga Demetirio abandi abaali nga baakyagha ira Yuda, boona baayongera okusiikuula Demetirio oyo asungughalire Yuda. 12Era amangu n’embiro, nga Demetirio oyo alonda Nikanori eyaduumiranga eigye lya kyabazinga ery’endhovu, ng’amutuma aje abe omufuzi wa Buyudaaya. 13Yaamugha n’ebiragiro okwita Yuda, n’okusansaania abali ku luuyi lwe, n’okutaagho Alikimo abe Omukulu wa Bakabona mu isinzizo erisinga bukologho mu nsi yoonayoona. 14Olwo abantu abamaghanga agandi boonaboona abaali mu Buyudaaya, abaali balumwikeyo olw’okulumbibwa Yuda, beesoloza mangu okweyimba ku Nikanori kuba baadhuuba bati ebizibu n’okudaagadaaga ebinaatuuka ku Bayudaaya, beene bija kubaviiramu birungi byereere.
15Agho Abayudaaya baawulira bati Nikanori ali kwidha okubalumba, era nga n’abantu abamaghanga agandi mu Buyudaaya bamweyimbyeku.14:15-25: 1 Bamak 7:27-28 Kale beefuka enkungu mu mitwe olw’enaku, baasaba Katonda eyalondamu eighanga lyaibwe okuba erirye ku bubwe ebyanda n’ebyanda, era atalobangaku kubayamba nga bali mu buzibu bwonabwona. 16Agho Yuda omukulembeze waibwe yaagha ekiragiro, era amangu n’embiro baava ghe baali, baaja okulwanisa omuzigu ku kyalo ekyayetebwanga Adasa.14:16 Mu bighandiiko ebindi kiri nti Adasa Mu Lugureki kiri nti Dessau. 17Simoni muganda wa Yuda yaalwanisa Nikanori n’abalwani be, aye abazigu abo baamala baatoolera okumusinza amaani olw’okumuzinduukiriza nga takitegeire. 18Aye waire ebyo byali bityo, Nikanori bwe yakiwuliraku ati Yuda n’abasaadha be bali kulwanirira ensi yaibwe n’amaani nga baziramu ntete naire, olwo eby’okumaliriza ensonga ng’abita mu kulwana olutalo yaabivaaku. 19Kale yaatuma Posidonio ni Theodoto ni Mattathia, baje bakole endagaano n’Abayudaaya. 20Bwe baamala okwisania obukalamu ku bye banaata mu ndagaano, Yuda n’abikoberaku ku bantu be, ni Nikanori yeena n’abikoberaku ku balwani be, olwo boonaboona baisa kirala okuta endagaano eyo mu nkola. 21Baataagho n’olunaku abakulembeze ab’oku ndhuyi dhombi lwe banaayagaananiraku beene na beene mu kifo ekyekusifu, n’ebityamo eby’emikolo eby’ab’ebitiibwa kwe banaatyama baabitaagho. 22Yuda yaata abaisirukale abagemye eby’okulwanisa mu bifo ebikulu ebyekusifu, olw’okwekuuma abazigu bwe baba nga bamusaliire lukwe. Aye olwekobaano lwaja bukalamu, lwawa mu miraala.
23Ebyo nga biwoire, Nikanori yaaba eyo mu Yerusalemu okumala entangama. Yaatuuka n’okulagira ab’oku luuyi lwe abaali beesololeiza eyo baveeyo baje. Era eyo tiyakolayo kintu kyonakyona kibi ku Bayudaaya. 24Nikanori yaafuukira irala mukagwa wa Yuda inho, nga tayenda Yuda oyo na kuva gh’ali. 25Yaamugha amagezi afumbirwe azaale n’abaana. Yuda yeena yaaganha yaafumbirwa, yaatyamisa ng’ali n’emiraala.
Nikanori yeefuula ku Yuda
26Aye Alikimo bwe yabona nga Nikanori ni Yuda bafuuse ba mukwano, yaatoola endagaano ye baakola yaaja nayo ye kyabazinga Demetirio. Bwe yatuukayo, yaakoba kyabazinga ati Nikanori takaali mwesigwa eri bwakyabazinga, kuba yatoola Yuda eyalya mu bwakyabazinga olukwe, yaamutaagho okuba omusika we. 27Ebibono ebyo eby’okughaamiriza Alikimo bye yayogera olw’omwoyo omubi, byaleetera kyabazinga okusungughala. Yaaghandiikira Nikanori ng’amukobera nga bw’ataasiima ndagaano eyo naire, era yaamugha ekiragiro ageme mangu Yuda Makkabeo amugheereze mu Antiokia nga musibe.
28Nikanori bweyafuna obukwenda obwo yaatya era yaatabulwa, olw’okuba yali ali n’okumenhagho endagaano ye yakola n’omuntu aziraku kisobyo kyonakyona. 29Ate yali tasobola kutakania kyabazinga, kale kyeyava n’atoolera okunoonia akaghagaanhia ak’okugema Yuda. 30Aye Yuda yaja okubona nga Nikanori atooleire okumukambughaliranga era nga bwebaagaanana amudhuukagania budhuukaganie, ekintu kye yali takolanga. Kyeyava n’asoloza abantu be kamaala abaamwikiririzangamu, yaaja yeegisa.
31Nikanori bwe yakitegeera nga Yuda omweibyeku, yaateega ekiseera bakabona ghe bagheerayo emisengo, memale yaaja mu isinzizo eikologho era eitukuvu yaalagira bakabona abo bamumugemye.14:31: 1 Bamak 7:29-30 32Aye bakabona baamukoba nga balayira bati tibaidhi Yuda y’ali. 33Agho Nikanori yaagolola omukono gwe omusaadha ng’agusonse ku isinzizo, yaalayira ng’akoba ati: “Bwe mutampe Yuda nga musibe, nja kusaaniagho eisinzizo lya Katonda lino, mmenhegho n’alutaari, olwo nzimbe mu kifo kyene kino eisabo lya Dioniso ery’ekitiisa.” 34Olwamala okwogera ebyo yaaja. Agho bakabona baagololera emikono eri eigulu, baasaba Katonda Omukuumi waibwe omwesigwa, nga bakoba bati: 35“Wo Musengwa afuga ebintu byonabyona, iwe ozira kye weetaaga. Aye wasiima okuta eisinzizo lyo ghano, obenga mu ife. 36Niiwe Omutukuvu, mwene butukuvu bwonabwona. Mpegaano tukusaba okuume eisinzizo lyo lino lye baali baakamala okutukuza, lirobe kwonoonebwa ebyanda n’ebyanda.”
Razi afiirira eighanga lye
37Agho ghaabaagho omusaadha nga bamweta Razi, eyali owundi ku bakulembeze b’omu Yerusalemu. Abantu baamuseeghayo eri Nikanori bati agonza inho abantu b’eighanga lye, era bati abantu b’eighanga lye bamutaamu inho ekinhagansi, baatuuka n’okumutuuma eriina “Lata w’Abayudaaya”, olw’okuba yabayambanga mu bintu kamaala. 38Mu biseera ebyabita, Abayudaaya bwe beediima ni baaloba okwetabikanga mu bamaghanga agandi, ekyo kyamuviiramu okuvunaanibwa omusango ogw’okuba ow’endhikiriza ey’Ekiyudaaya, era yaata obulamu bwe mu kabi olw’okulumirwa einho ensinza eyo ey’Ekiyudaaya. 39Nikanori olw’okwenda okwoleka nga bw’akyagha Abayudaaya, yatuma abaisirukale abaswika mu bikumi ebitaanu (500), baje bageme Razi oyo 40kuba yadhuuba ati bw’anaamugema, ekyo kiidha kutengamya inho Abayudaaya. 41Abaisirukale bwe baali bali kumpi okuzingiza endhu Razi mwe yali, nga bali kuguumula endhigi edh’oku luya dhiigukegho era nga bali kulagira okudhikunaaniaku omuliro dhiye, Razi yaabona ng’azira gh’anaawonera. Kyeyava ni yeetunga ku mpiima ye mwene 42ng’ayenda kasinga afe n’ekitiibwa, okusinga okugwa mu ngalo dh’ababi n’aswazibwa ng’adaazibwadaazibwa.
43Mu kabuguutano akaaligho ng’abazigu bali kusindikagana mu miryango okwingira, Razi tiyeetunga ku mpiima bukalamu kusobola kweita. Agho yaaziinhuuka ng’aziramu ntete naire yaaja ghaigulu ku kimante, memale yeesuula ghansi mu ikuukuubira ly’abantu. 44Aye eikuukuubira ly’abantu eryo lyesasa mangu okuva mu kifo gh’ali kuja okugwa, kale yaagwa agheereere. 45Era yaamala yaaguma yaasitukiramu ng’akaali mulamu, ng’omusaayi guli kutiiriika mu bibwa bye ebyali ebinene, yaabita mu ikuukuubira ly’abantu embiro, yaaniina ghaigulu ku lubaale olugulumivu. 46Agho nga n’omusaayi gwamuwoiremu ira, yeekanulamu ebyenda mu mabunda n’emikono gyombi, yaabiwoloba eri eikuukuubira ly’abantu, eno nga bw’asaba Musengwa mwene bulamu n’omwoyo abimwirize kabiri eyo ye bwidha. Eyo n’ensambo ye yafaamu.