12
Batemula Abayudaaya ab’e Yoppa
1Bwe baamala okukola endagaano eyo, Lisia yairayo ye kyabazinga n’Abayudaaya bairayo ku gwaibwe ogw’okulima. 2Aye abandi ku bafuzi ab’ebiketezo nga Timotheo, Apollonio mutabane wa Gennao, Hieronimo, ni Demofoni, nga tibabaganha kuba na miraala. Ni Nikanori yeena eyali omuduumizi w’eigye ery’abaisirukale abapangise okuva e Kupuro, yeena nga tabaganha kuba na miraala.
3Mu kiseera ekyo abantu ab’e Yoppa baakola ku Bayudaaya abaali mu kibuga kyaibwe ekyo, ekikolwa eky’obukambwe. Beefuula okuba ng’oti bakagwa baibwe. Baabeeta baje baseeyeeyeeku ku maadhi mu maato beene ab’e Yoppa ge baataagho, era baabakoba baje n’ab’omu maka gaibwe boonaboona. 4Olw’okuba abantu boonaboona ab’omu kibuga baasalagho okukola ekyo, Abayudaaya boona tibeekengeeramu naire. Kale baaganha okuja olw’okulaga omwoyo omulungi. Aye bwe baatuuka eyo ghagati mu nhandha, abantu ab’e Yoppa baadimiza Abayudaaya boonaboona ebikumi ebibiri (200) mu maadhi, baafa.
5Yuda olwawulira ekikolwa ekyo eky’obukambwe nga bakikoze Bayudaaya baine, yaakimanhisaaku abasaadha be. 6Agho baasaba Katonda omulamuzi omutuufu atasaliriza, era olwamala baaja baalumba abatemo abo. Obwire mu nzikiiza, baaja baakunaania omuliro ku mwalo ogwo, baayokya amaato goonagoona era baita kiisi ye baayagaana nga yeegisiisa eyo. 7Olw’okuba emiryango gy’ekibuga gyali misibe, Yuda yaakoma agho yairayo eka, aye ng’amaliriire okwirayo omukuzi ogundi okweyeragho irala abantu boonaboona abaali baba mu kibuga ekyo.
8Yuda era yaawulira ng’abantu ab’e Yamonia boona, baali bali kutegeka kwita Bayudaaya abaali baba mu kibuga ekyo. 9Kale yaaja obwire yaalumba ekibuga Yamonia, yaakunaania omuliro ku mwalo gwakyo n’amaato agaaliyo. Omuliro gwabbeibbera gwaja ghaigulu inho nga n’ab’e Yerusalemu bagubona, waire ng’okuva agho okutuukayo ghaaligho kilomita amakumi ataanu.
Obughanguzi bwa Yuda mu kiketezo eky’e Gileadi
(1 Bamak 5:9-54)
10Yuda n’abasaadha be bwe baali nga bakaabuzaayo kilomita oti ibiri okutuuka e Yamonia nga baja okulwanisa Timotheo, baalumbibwa Abawarabu abaali basinga mu nkumi eitaanu (5,000), nga bali n’abalwani ab’oku mbalaasi ebikumi bitaanu (500). 11Okulwana kwali kwa maani, aye Katonda yaababeera baghangula eighanga eryo ery’omu irungu. Abawarabu bwe baaghangulwa, baasaba ghabeegho enkolagana ey’omukwano ghagati ghaibwe n’Abayudaaya. Baasuubiza okubagha ku byayo byaibwe n’okubayambanga mu ngeri edhindi. 12Yuda yaadhuuba ng’omukwano n’Abawarabu abo gusobola okubaganhula mu nsambo kamaala, kale yaaganha okukola endagaano y’emiraala nabo. Olwamala, abawarabu bairayo mu weema dhaibwe.
13Yuda era yaalumba ekibuga Kasipini ekyali kyezungulwirwa ebimante ebigumu einho, era nga kiri n’ebifo eby’okwewogomamu eby’amaani. Abantu baamu baali batabule nga bamaghanga gandi, 14nga beesiga inho obugumu obw’ebimante ebyali ku kibuga kyaibwe ekyo. Era baali n’emere emala ni bwe baba nga babazingiiza. Kale ekyo kyabaleetera okudheedha n’okusekerera Yuda n’abasaadha be, baabaghereekereza n’ebivumo ebigheebuula ekitiisa kya Katonda waibwe. 15Aye Yuda n’abasaadha be baasaba Musengwa Aghanga Ebintu Byonabyona, eyakandulagho ebimante ebyali byezungulwire ekibuga Yeriko mu biseera bya Yoshua, nga tasoose kubizimbaku bintu bya kuniiniraku, waire okukozesa ebintu ebibibbomola. Bwe baamala okusaba baalumba ebimante ebyo n’obukambwe obungi einho. 16Era olw’okwenda kwa Katonda baaghamba ekibuga ekyo, baatirimbula abantu kyodoodo, n’enhandha eyali okumpi n’ekibuga agho ng’egheza obugazi ng’oti bwa kitundu kya kilomita, yaaboneka ng’oti ebanze yaataayaaya olw’omusaayi ogwajaamu.
Yuda aghangula eigye lya Timotheo
(1 Bamak 5:37-44)
17Yuda n’abasaadha be bwe baava mu kibuga ekyo Kasipini, baatambula kilomita oti kikumi n’ataamu (150), baatuuka ku kyalo Karakisi ekyali nga kyasengamu Abayudaaya, nga kiri kumpi n’ekibuga Tobu. 18Aye Tibaayagaanayo Timotheo, kuba baaja okutuuka ng’amaze okuva mu kiketezo ekyo ng’azira inho ky’asoboire kukolayo, okutoolaku okutaayo obw’enkambi ey’abaisirukale enene einho mu kifo ekirala obulala kiti. 19Agho babiri ku basaadha ba Yuda, Dositheo ni Sosipateri abaakuliranga amagye, baaja baalumba enkambi eyo, baita abaisirukale boonaboona omutwalo omulamba (10,000) Timotheo be yalekayo. 20Ebyo nga biwoire, Yuda yaayawula mu eigye lye ebikunsu ebikunsu. Buli kikunsu yaakitaaku akiduumira, memale baayangughaku nga balumuukirira Timotheo eyali n’eigye ery’abaisirukale emitwalo eikumi n’ebiri (120,000) nga ba ku bigere, n’enkumi eibiri n’ebitaanu (2,500) nga ba ku mbalaasi. 21Timotheo bwe yakimanha nga Yuda ali kumwidhira, yaakulembezaamu abakazi n’abaana n’emigugu, baajanga emberi batuuke mu kibuga Karanaimu. Ekibuga ekyo ekyali nga kizibu inho okukizingiza oba n’okukituukaku obutuuke, kuba obugira obwatuukangayo bwalinga bwa kwesugeenhereza bwesugeenhereze. 22Aye abalwani ba Timotheo oyo olwalengera ekikunsu eky’eigye lya Yuda ekyasooka, entiisa yaabagema era baasoberwa olw’okubonekerwa okwasindikibwa Katonda, oyo abona byonabyona. Kale baalumukiralumukira eyo batyo, era bangi baafumitibwa ebibwa aye nga banaibwe beene n’ababafumita. 23Yuda n’abasaadha be baababingirira n’amaani nga bwe kisoboka, baabaitamu abantu abaghera emitwalo esatu (30,000). 24Timotheo mwene, abaisirukale ba Dositheo ni Sosipateri baamugema. Aye yaabeegayirira n’olugezigezi inho balobe kumwita, ng’abakoba nga bwe yali ng’agemye abantu bangi abaabaliku oluganda era nga baali baja kwitibwa boonaboona singa atuukibwaku ekintu kyonakyona. 25Bwe yamala okubasuubiza ati aja kubabairiza nga tibatuusiibwaku kabi koonakoona, baamulekula yaaja olw’okuwonia baganda baibwe.
Yuda aghangula entalo edhindi
(1 Bamak 5:45-54)
26Agho Yuda yaalumba ekibuga Karanaimu n’eisabo ery’omusambwa omukazi gwe baayetanga Ataragati. Ku olwo yaita abantu emitwalo ebiri na kitundu (25,000), 27era yaasaanizaagho irala ekibuga ekyo n’eisabo eryo. Bwe yava agho, yaaja yaalumba ekibuga Efuroni ekyaliku ekimante ekigumu ekikyezungulwire, era ng’omwo Lisia mwe yali n’abantu abandi abamaghanga ag’endhawulo kamaala. Abaisuka baayo ab’amaani baakana beetaagho emberi gh’ebimante era baalwana okwekutula. Munda mu kibuga ekyo baali baaterekamu ebintu ebikozesebwa mu ntalo n’eby’okulwanisa kamaala. 28Aye Abayudaaya baasaba Musengwa Aghanga Ebintu Byonabyona abayambe, aniantule obuyinza obw’abazigu be. Kale baagema ekibuga ekyo, baita n’abantu ng’oti mitwalo ebiri na kitundu (25,000). 29Bwe baava agho baayangugha okuja mu kibuga Sikithopoli, ekyali mu lugendo lwa kilomita kikumi n’abiri (120) okuva e Yerusalemu. 30Abayudaaya abaaliyo baakobera Yuda, ng’abantu ab’omu kibuga ekyo bwe baababisa obukalamu einho n’ekisa mu biseera ebizibu. 31Kale Yuda n’abasaadha be beebaza abantu abo era baabakubiriza babenga ba kisa batyo eri Abayudaaya ni ye bwidha. Agho baavaagho baaniinaniina okuja e Yerusalemu, ye baatuuka ng’ebulayo akaseera katono okutuuka ku Kibinuko eky’Amakungula.
Yuda aghangula Gorigia
32Olunaku olwa Pentekote12:32 Pentekote Ekyo era nga n’ekibinuko eky’Amakungula. nga luwoire, Yuda n’abasaadha be baayangugha okuja okulumba Gorigia eyali omufuzi mu Idumea.12:32: Kuv 23:16 33Ono yaidha okwagaanana nabo ng’ali n’abaisirukale enkumi isatu (3,000) ab’oku bigere n’abandi ebikumi bina (400) ab’oku mbalaasi. 34Amagye ag’oku ndhuyi dhombi bwe gaagumbulana, Abayudaaya batono bati abaitibwa. 35Aye ghaabaagho Omuyudaaya ng’ava mu kibuga Tobu12:35 Omuyudaaya ng’ava mu kibuga Tobu mu bighandiiko ebindi mulimu nti owundi ku basaadha ba Bakenori. ye baayetanga Dositheo era nga mulwani wa ku mbalaasi wa maani. Yaagema Gorigia olugoye era yaatoolera okumukwekwebya n’amaani mangi inho, ng’ayenda atwale atyo omusaadha oyo azira mugaso nga mulamu. Aye mangu ago ghaidhagho mulala ku basaadha ab’oku mbalaasi abaava e Tharaki, yeeyuna Dositheo yaamutemaku omukono gwene ogwali gugemye Gorigia. Agho yaaba ng’ayambye Gorigia oyo okumwenhunhunkuzaaku, era yaamala yaalumukira mu kibuga Marisa.
36Ebyo okubangagho, ng’Abayudaaya abaali bali kuduumirwa Esiduria balwaniire ekiseera kireeyi era nga gabawoire. Kale Yuda yaasaba Musengwa abe ku luuyi lwaibwe nga n’omuduumizi ow’amagye gaibwe ago. 37Era yaayemba mu lulimi lwe olwembo olusaaka Katonda n’amaani mangi, lwawulikika ng’oti n’okwasiikana okw’omu lutalo. Agho Abayudaaya baazinduukiriza Gorigia n’amaani ng’ali n’abasaadha be era baabalumusaagho.
Okusabira abaitirwa mu lutalo
38Olutalo olwo bwe lwawa, Yuda yaatwala abasaadha be mu kibuga Adullamu. Lwali lunaku olukulembera Sabbato, kale baakola omukolo ogw’okwetukuza ng’empisa edh’Ekiyudaaya bwe dhiragira. Memale baakuza olunaku olwo olutukuvu olwa Sabbato. 39Olunaku olwairirira baali n’okukola obwangu okusoloza emirambo egy’abo abaitirwa mu lutalo, buli mulambo baje baguziike ab’endhu yaagwo ghe baaziikibwa. 40Aye mu ngoye dha buli muntu ku abo abaitibwa, baayagaanamu akafaananie ak’omusambwa ogusinzibwa e Yamonia, akataikirizibwanga mu mateeka kuvaalibwa Muyudaaya yeenayeena. Agho buli muntu yaamanha ng’eyo n’ensonga lwaki abantu abo baitibwa.12:40: Ma 7:25 41Kale baasaaka Musengwa omulamuzi omutuufu atasaliriza, ayoleka ebyo ebigisiibwa. 42Baamweghemba asaseegho ekibi ekyo obutairayo kuwulirwaku kabiri. Agho Yuda omusaadha oyo omukologho, yaakubiriza abantu boonaboona okwesamba ebibi, nga bwe baabona ebyatuuka ku abo abaakola ekibi ekyo. 43Era yaasoloza ku basaadha be boonaboona empiiya edhaaghera ng’oti durakama enkumi ibiri (2,000)12:43 durakama enkumi ibiri (2,000): Edho nga ni kilo ng’oti ibiri edha feeza. yaadhigheereza e Yerusalemu badhigulemu ekigheebwayo olw’ekibi. Yuda yakola ekikolwa ekyo ekirungi kuba yali aikiriza nti eriyo okuzuukira okw’abafu. 44Nguli yali taikiriza ng’abafu balizuukira, kyandibaire kya busiru era ekiziramu mugaso okubasabira. 45Yuda yali n’okwikiriza kugumu inho okukoba nti abantu abatya Katonda baja kusasulwa mu nsambo eyeewuunhisa, era ekidhuubo ekyo kyali kirungi nga kigha Katonda ekitiisa. Kale Yuda oyo kyeyava n’agheerezaayo eby’okusasulira ekigheebwayo ekyo olw’okutoola ku abo abaitibwa ekibi kye baakola.