11
Yuda Makkabeo aghangula Lisia
(1 Bamak 4:26-35)
1Nga ghabiseeghooku ekiseera kitono, Lisia yaawulira ebyaligho. Lisia oyo n’eyali omukuza wa kyabazinga ate ng’amuliku oluganda, era nga n’alabirira obwakyabazinga. Bwe yabiwulira yaasungughala inho, 2era yaakulemberamu eigye lya bantu emitwalo munaana (80,000) ab’oku bigere n’abandi ab’oku mbalaasi boonaboona be yali nabo. Baayolekera Buyudaaya ng’ekigendererwa kye kya kufuula Yerusalemu kibe kibuga kya Bagureki. 3Olwo eisinzizo litoolebwengaku omusolo ng’oti n’ebifo ebindi byonabyona eby’abamaghanga agandi eby’okusinzibwamu. N’ekifo eky’Obukulu bwa Bakabona kibe kya kugulibwanga bugulibwe buli mwaka. 4Lisia oyo yeekudumbaza inho olw’emitwalo n’emitwalo egy’abalwani ab’oku bigere, n’enkumi n’enkumi edh’ab’oku mbalaasi, aghalala n’endhovu dhe ekinaana (80). Yaaloba kufaayo ku buyinza bwa Katonda. 5Agho yatuuka mu Buyudaaya yaalumba ekifo eky’okwewogomamu eky’e Bethizuri, ekyali kilomita ng’oti makumi asatu (30) okuva e Yerusalemu.
6Yuda n’abasaadha be bwe baawulira nga Lisia azingiiza ebifo byaibwe eby’okwewogomamu, beene n’abantu abandi boonaboona baalira amaziga era baawowoola, nga beeghemba Musengwa abagheereze malaika omulungi abawonie. 7Yuda mwene n’eyasooka, yaagema eby’okulwanisa ebibye era yaakubiriza n’abandi okumweyimbaku, beegheeyo oba kufa bafe aye nga balwaniriire Bayudaaya banaibwe. Agho boonaboona baaja nga bamalirivu. 8Aye baali baakatambulaku katono okuva e Yerusalemu, mangu ago ghaabonekagho omuntu ng’ali ku mbalaasi era ng’abakulembeiremu. Yali ng’avaire byeru era ng’agemye eby’okulwanisa bya zaabu. 9Mu kaseera keene ako boonaboona beebaza Katonda olw’okusaasira kwe kuba yabaleetera okuguma omwoyo, ti kulumba bantu bonka, aye n’ensolo enkambwe era waire ebimante eby’ekyuma ekigumu einho. 10Kale beeyongerayo okuja okulwana nga bali mu nhiriri. Nga n’omuntu oyo, Musengwa ow’ekisa ye yabagheereza okulwanira ku luuyi lwaibwe, yeena ali kuja nabo. 11Agho baaziinhuuka, baaja baaghalalira omuzigu ng’oti mpologoma, baita abalwani ab’oku bigere mutwalo mulamba na lukumi (11,000) n’ab’oku mbalaasi lukumi na lukaaga (1,600). Baaghaliriza abaasigalagho okulumukagho bawonie obulamu bwaibwe. 12Abasinga obungi ku abo abaalumuka baaja nga bafumitiibwa ebibwa era nga baswire n’eby’okulwanisa byaibwe. Ni Lisia yeena yalumuka bulumuke ng’omutiitiizi, okusobola okwewonia.
Lisia akola endagaano y’emiraala n’Abayudaaya
(1 Bamak 6:56-61)
13Lisia tiyali musiru kuba bwe yalowooza ku kughangulwa okwamutuukaku, yaakimanha nga Katonda ow’amaani n’eyalwanirira Abayudaaya era nga n’olw’ekyo tibasoboka kughangulwa naire. Kale yaagheereza Abayudaaya abo obukwenda, 14ng’ali kugezaaku okubaikirizisa ensonga dhoonadhoona dhikolebweku mu butuufu, ng’endhuyi dhoonadhoona dhiri kwisania bukalamu. Era ng’ali kubasuubiza n’okwikirizisa kyabazinga abe n’omukwano nabo. 15Yuda Makkabeo bwe yeefumintiriza mule n’abona ng’ekyo kiidha kugasa abantu be, yaaganha ebyo Lisia bye yata mu bukwenda, kuba ni kyabazinga yaganha byonabyona Yuda bye yasaba Lisia oyo mu bughandiike.11:15 kuba … Lisia oba era ni kyabazinga yaganha byonabyona Yuda bye yasaba Lisia oyo mu bughandiike.
Embaluwa Lisia ye yaghandiikira Abayudaaya
16Embaluwa Lisia ye yaghandiikira Abayudaaya ng’ekoba eti:
“Nze Lisia mbalamwisa imwe Abayudaaya. 17Yoanne ni Abusalomu be mwatuma okwidha ku lwaimwe, bampaire ekighandiiko kyaimwe kye mwabagha okuleeta, era bansaba ndhikirize ebikirimu. 18Mmaze okukobera kyabazinga ku nsonga edheetaagisa okumumanhisa, era aikiriiza okukola kyonakyona ekisoboka. 19Bwe munaaja mu maiso n’okuba abawulize eri obwakyabazinga, zeena mu biseera eby’omu maiso nja kufubanga okubakolera ebinaaganhulanga eighanga lyaimwe. 20Era buli ekigema ku ebyo, ndagiire abakwenda be mwatuma okwidha ku lwaimwe n’abange be ntumye, batyame ghalala n’imwe mubyogereku byonabyona mubiinhongoke bukalamu. 21Mubeeyo bwera. Mpandiise embaluwa eno ku lunaku olwamakumi abiri n’eina, mu mwezi Diosikorinthio, mu mwaka ogwekikumi n’ana n’omunaana (148).”11:21 mu mwaka ogwekikumi n’ana n’omunaana (148): Ogwo nga n’omwaka ogwekikumi n’enkaaga n’ena (164) nga Kurisito akaali kwidha.
Embaluwa kyabazinga ye yaghandiikira Lisia
22Embaluwa kyabazinga ye yaghandiisa ng’ekoba eti:
“Nze kyabazinga Antioko, nkughandiikiire iwe ow’ekitiisa Lisia. Era nkulamwisa inho. 23Nga bwekiri nti lata wange yafa, yaaja eyo abenga ghalala n’emisambwa, nhenda abantu ab’omu bwakyabazinga bwange bakole ebyaibwe nga ghazira abatabula. 24Nkiidhi bukalamu nti Abayudaaya tibenda kujiira ku mpisa dha Kigureki nga lata wange bwe yali ayenze, aye benda kujiira ku mpisa dhaibwe beene. Era baatusaba tubaganhe bajiirenga ku mpisa edh’eighanga lyaibwe. 25Kale ni, nze nhenda inho abantu ab’eighanga eryo boona babeegho nga ghazira kibatabula, ng’oti ni bwekiri ku maghanga agandi agali mu bwakyabazinga bwange. Era nsazeegho nti eisinzizo lyaibwe balibairize era babaikirize bajiirenga ku mpisa dha badhaadha baibwe. 26Bw’onaabakobera ekyo kye nsazeegho era n’obakakasa oti mbatwala nga bakagwa bange onaaba okoze bukalamu, olwo ebyaibwe babikolenga mu miraala nga ghazira kibeeraliikiriza.”
27Era kyabazinga yaaghandiikira n’Abayudaaya ati:
“Nze Kyabazinga Antioko, mbaghandiikiire imwe ab’olwekobaano olw’eighanga ly’Abayudaaya aghalala n’Abayudaaya mwenamwena. Era mbalamwisa inho. 28Ka nsuubire nti ebintu byonabyona biri kubajiira bukalamu. Zeena ndiyo mulamu. 29Menelao yankobera nga bwe mwenda einho okwirayo eka ewaimwe mwekolerenga ku bibagemaku beene. 30Mbeeni, abo ku imwe abaliirayo ewaimwe eka ng’olunaku olwamakumi asatu olw’omwezi Kisanthiko lukaali kutuuka, ndi kubakakasa nti balobe kuba na kutya naire. 31Muli ba idembe okuja mu maiso n’okugema amateeka gaimwe ag’eby’emere n’ag’ebintu ebindi nga bwe mwakolanga. Era ezira Muyudaaya aja kubonerezebwa olw’ensobi dh’anaabanga akoze mu butamanha. 32Ntumye Menelao aidhe abagumye emyoyo. 33Mubeeyo bwera. Mpandiise embaluwa eno ku lunaku olweikumi n’eitaanu, mu mwezi Kisanthiko, mu mwaka ogwekikumi n’ana n’omunaana (148).”11:33 mu mwaka ogwekikumi n’ana n’omunaana (148): Ogwo nga n’omwaka ogwekikumi n’enkaaga n’ena (164) nga Kurisito akaali kwidha.
Embaluwa Abaroma ye baaghandiikira Abayudaaya
34Abaroma boona baagheereza Abayudaaya embaluwa ekoba eti:
“Nze Kwinto Memmio ni Tito Manio abaatumibwa Abaroma okwidha ye muli, tubaghandiikiire imwe Abayudaaya. Era tubalamwisa inho. 35Twena twisania bukalamu n’ebyo byonabyona omukungu Lisia bye yasuubiza okubakolera. 36Buti tuli mu ngira nga tuja mu Antiokia. Kale mwetegereze bukalamu ebintu ebyo Lisia bye yayenda okwogeraku ng’ali ni kyabazinga. Memale amangu n’embiro mututumire omuntu abituleetere, olwo ife tusobole okubandhulirayo ebintu byene ebisinga kuba birungi ye muli. Ekyo mukikole mu bwangu nga bwe musobola 37aghazira kugayaalamu naire, olwo ife tumanhe kye munaaba musazeegho. 38Mubeeyo bwera. Tughandiise embaluwa eno ku lunaku olweikumi n’eitaanu, mu mwezi Kisanthiko, mu mwaka ogwekikumi n’ana n’omunaana (148).”11:38 mu mwaka ogwekikumi n’ana n’omunaana (148): Ogwo nga n’omwaka ogwekikumi n’enkaaga n’ena (164) nga Kurisito akaali kwidha.