1
Embaluwa eyaghandiikirwa Abayudaaya ab’omu Misiri
1“Ife Abayudaaya ab’omu Yerusalemu n’ab’omu Buyudaaya, tubalamwisa n’eisanhu imwe Abayudaaya ab’omu Misiri.
2“Tusaba Katonda abakolere ebirungi, era akuume endagaano ye yakola ni Aburahamu ni Isaaka era ni Yakobo, abagheereza be abeesigwa. 3Abateemu okwenda okumusinzanga nga muli bamalirivu, n’okukolanga by’ayenda n’omutima gwonagwona era n’omwoyo gwonagwona. 4Abaleetere okutegeeranga Amateeka ge n’ebiragiro bye, era n’okubanga mu miraala. 5Abaghenga bye mumusaba, abasonighenga ebibi byaimwe era alobenga kubalekulira agho nga muli mu buzibu. 6Ife eno mu Buyudaaya tuli kubasabira.
7“Mu mwaka ogwekikumi n’enkaaga n’omwenda (169)1:7 Mu mwaka ogwekikumi n’enkaaga n’omwenda (169): Ogwo nga n’omwaka ogwekikumi n’ana n’esatu (143) nga Kurisito akaali kwidha. nga kyabazinga Demetirio owokubiri n’afuga Siria, twabaghandiikira okubakobera ku kukirigibwa n’ebiseera ebizibu bye twalimu mu myaka egyairirira nga Yasoni ni baine bamaze okudheemera abafuzi mu nsi entukuvu. 8Yasoni oyo n’abasaadha be baakunaania omuliro ku miryango egy’eisinzizo, baatirimbula abantu abaziraku musango naire. Agho twasaba Musengwa era yaawulira okusaba kwaife. Kale twaghaayo ensolo ng’emisango, twaghaayo ebigheebwayo eby’emere ey’empeke, twakunaania amataala mu isinzizo era twataayo n’emigaati emitukuvu. 9Eyo n’ensonga lwaki tubakubiriza okukola embaga mu mwezi gwa Kisilevu olw’okukuza Ekibinuko eky’Entindi. Tughandiise embaluwa eno mu mwaka ogwekikumi n’ekinaana n’omunaana (188).”1:9 mu mwaka ogwekikumi n’ekinaana n’omunaana (188): Ogwo nga n’omwaka ogwekikumi n’abiri n’ena (124) nga Kurisito akaali kwidha.
Embaluwa eyaghandiikirwa Arisitobulo
Okufa kwa kyabazinga Antioko
10“Ife Abayudaaya ab’omu Yerusalemu n’ab’omu Buyudaaya, n’olwekobaano olw’Abayudaaya, aghalala ni Yuda, tukughandiikiire iwe Arisitobulo ow’oku nda ya bakabona era omwegeresa wa kyabazinga Putolemi. Era tughandiikiire n’imwe Abayudaaya abali mu Misiri. Tubalamwisa inho era twabendeza obulamu obukalamu.
11“Twebaza Katonda kuba yatuwonia akabi akanene, bwe yaira ku luuyi lwaife okulwanisa kyabazinga, 12yaabinga abazigu mu kibuga kyaife ekitukuvu. 13Omukulembeze w’abazigu abo, kyabazinga Antioko, bwe yatuuka mu Perusia, eigye lye lyaboneka ng’oti tirisoboka kughangulwa. Aye baasalwasalwa bulere bulere mu isabo lya Nanea omusambwa gwaibwe omukazi, nga bakabona baagwo bamaze okubalyamu olukwe.1:13-16: 1 Bamak 6:1-4; 2 Bamak 9:1-10 14Kyabazinga Antioko oyo yangira mu isabo eryo n’abandi ku bakungu be, yeetulinkiriza ng’ali kwenda abayize omusambwa ogwo, atwale n’eby’obukombe ebisinga bungi ebyali mu iterekero ery’eisabo eryo, bibe ng’ekirabo ekigheebwa abagole. 15Bakabona b’omu isabo ly’omusambwa ogwo bwe baamala okutegeka eby’obukombe ebyo, Antioko ng’ali n’abandi ku basaadha be batonotono baingira mu isabo okubinona. Agho bakabona abo baabaigalizaamu, 16era bakabona beene abo baatoolera okubakuba amabaale nga beegisiisa ghaigulu ku lubani, ng’amabaale bagabisa mu bituli ebyali ghaigulu eyo, aye nga abali ghansi tibaghanga kubibona. Bwe baamala baabatematema, emitwe gyaibwe baagisuulira abantu abaali basigaire kuliya. 17Katonda eyabonereza ababi abo asaakibwe olwa byonabyona.
Omuliro gwokya omusengo gwa Nehemia okugumaliriragho
18“Ku lunaku olwamakumi abiri n’eitaanu mu mwezi ogwetebwa Kisilevu tuja kukola omukolo ogw’okwiramu okutukuza eisinzizo, ng’oti bwe tukolanga embaga ey’Ekibinuko eky’Entindi. Kale tuboine nga kikulu okubaidhusa ekintu ekyo, mwena mukole embaga eyo. Era mukole n’omukolo ogw’okwidhukira omuliro ogwaboneka nga Nehemia ali kughaayo emisengo, bwe yali ng’amaze okwiramu okuzimba obuyaaka eisinzizo ni alutaari.
19“Mu kiseera badhaadha baife ghe baatwalibwa mu bunhage mu Perusia, bakabona abatonotono abaali nga batya Katonda, baatoola amanda ag’omuliro ku alutaari eyo, beibirira baaja baagagisa ku ntobo y’ekidiba ekiziramu maadhi. Baagagisa bulungi inho, ghaabulagho omuntu yeenayeena amanha ghe gali. 20Agho ng’emyaka gibiseeghooku era nga n’okwali okusiima kwa Katonda, kyabazinga w’e Perusia yaatuma Nehemia aireyooku e Yerusalemu. Bwe yatuuka, yaakoba baidhukulu ba bakabona abo baagale omuliro ogwo ghe gwali. Baamala baiza amawulire bati tibaboine ku manda ga muliro, aye bati baboine bwa biidhi bigemu ng’oti nkonge. Nehemia yaabakoba basene ku ebyo bamuleetere. 21Byonabyona ebyali bija okugheebwayo ng’emisengo bwe byamala okuteebwa ku alutaari, Nehemia yaakoba bakabona okumansira ku nku ni ku misengo ebiidhi ebyo ebyali ebigemu ng’oti nkonge. 22Ekyo nga kiwoire era nga ghabiseeghooku entangama, endhuba eyali ekingiriziibwa ebire yaaboneka. Agho okuja okubona ng’ebintu byonabyona ku alutaari bitumbuka omuliro. Buli muntu yaalingirira yeewuunhia. 23Omuliro bwe gwali nga guli kusenkeenha omusengo, Yonathani Omukulu wa Bakabona yaakulembera abantu mu kusaba, eno nga Nehemia n’abantu boonaboona bwe bairangamu.
Nehemia asaba Katonda
24“Nehemia Yaasaba ati, ‘Wo Musengwa Katonda iwe owatonda ebintu byonabyona, by’okola bya maani era bitiisa, ate ng’oli musaasizi era osala ensonga mu butuufu. Niiwe kyabazinga wenka, niiwe ow’ekivunika wenka, 25niiwe omusaasizi wenka, niiwe osala ensonga mu butuufu wenka. Niiwe aghanga ebintu byonabyona, era ow’okubaagho ebyanda n’ebyanda. Oli mwetegefu okununula Isiraeli mu buzibu bwonabwona. Niiwe walonda badhaadha baife babe abantu ababo ku bubwo. 26Ganha osiime omusengo guno gwe tuli kughaayo ku lw’Abaisiraeli boonaboona, okuume ife abantu bo be walondamu era otutukuze. 27Abo abaatwalibwa ng’abairu mu maghanga baleetere okulekulwa babe ba idembe, osoloze abantu baife abaasansaana. Saasira abantu baife ababisibwa obubi era abanhoomebwa, olwo abamaghanga agandi boonaboona bategeere nga niiwe Katonda waife. 28Bonereza abantu abatutuntuza era abeekuluntaza ni batunhooma. 29Oleetere abantu bo okukakata mu nsi yo entukuvu, nga Musa bwe yakoba ati bw’oja okukola.’
Bakobera kyabazinga ow’e Perusia ku muliro ogwo
30“Agho bakabona baayemba enhembo edhisaaka Katonda. 31Omuliro bwe gwamala okusenkeenha emisengo, Nehemia yaalagira ebiidhi bire ebyali ebigemu ng’oti nkonge ebyali bisigairegho babiyughe ku mabaale amanene. 32Olwabiyugha bati ng’omuliro gutoolera okubbeibbera, aye omuliro ogwali ku alutaari gwamala gwaguzikiza.
33“Amawulire ag’ekyo ekyaligho gaasansaanira buli ghantu. Kyabazinga ow’e Perusia yaawulira nga bakyogeraku bati ghaligho ebiidhi ebyali ebigemu ng’oti nkonge ebyayagaanibwa nga biri mu kifo bakabona ghe baagisa amanda ag’omuliro agaava ku alutaari, memale batwalibwe mu bunhage. Era yaawulira nga bakoba bati Nehemia ni baine baakozesa ebiidhi ebyo okwokya emisengo ku alutaari. 34Kyabazinga bwe yanoonereza n’akizuula ng’ebintu ebyo bye yawulira byali bituufu, yaalagira ekifo baakisitaku olukomera okukyezunguluza era kyafuulibwa kitukuvu. 35Ekifo ekyo kyabeera irala nsako ya kyabazinga oyo mwe yafunanga ebirungi kamaala. Era yaatoolanga ebindi ku bintu ebyo yaabighangayo ng’ebirabo eri abantu abaamusiimyanga. 36Nehemia ni baine baayeta ebiidhi ebyo ebyali ebigemu ng’oti nkonge bati ‘Nefutari’ ekitegeeza ‘Okutukuzibwa’, aye abantu abasinga obungi nga babyeta ‘Nafutha.’