EKITABO KYA
BAKYABAZINGA
EKYOKUBIRI
Enhandhula
Ekitabo kya Bakyabazinga Ekyokubiri, kyongera okulomboodha ebyafaayo eby’obwakyabazinga obubiri obwali mu Isiraeli, nga kiinhamira agho Ekitabo kya Bakyabazinga Ekisooka ghe kikoma. Obwakyabazinga obwo obwa Isiraeli obubiri obwogerwaku, ni buno: obw’oku luuyi olw’omukono omugooda olw’e buvandhuba obwayetebwanga Isiraeli, n’obw’oku luuyi olw’omukono omusaadha olw’e buvandhuba obwayetebwanga Buyudaaya.
Ekitabo kino kisobola okwawulwamu ebimega bibiri: 1. Ebyafaayo eby’obwakyabazinga obwo bwombi, okuva eyo mu myaka ng’egyolunaana n’ataanu (850) nga Kurisito akaali kwidha, okutuuka ku kughangulwa kw’ekibuga Samaria ni ku nkomerero y’obwakyabazinga bwa Isiraeli, mu mwaka ogwolusanvu n’abiri n’ebiri (722) nga Kurisito akaali kwidha.
2. Ebyafaayo eby’obwakyabazinga obwa Buyudaaya, okuva ku kugwa kw’obwakyabazinga bwa Isiraeli, okutuuka mu kiseera Nebukadinezzari kyabazinga owa Babilonia kye yagemeramu ekibuga Yerusalemu era n’akizikiriza, mu mwaka ogwebikumi ebitaanu n’ekinaana n’omukaaga (586) nga Kurisito akaali kwidha.
Ekitabo kino kifundikira n’ebyogera ku Gedalia eyali omufuzi w’e Buyudaaya mu biseera Abababilonia bye baafugiramu Isiraeli. Era kyafundikira n’ebigema ku kulekulwa okwa kyabazinga Yehoiakini owa Buyudaaya, n’ava mu ikomera mu Babilonia.
Akabi ako koonakoona kaagwagho, kuba bakyabazinga n’abantu ab’omu Isiraeli ni mu Buyudaaya tibaali beesigwa eri Musengwa Katonda. Eky’okuzikirizibwa kwa Yerusalemu n’eky’okutwalibwa mu bunhage okw’Abayudaaya abangi, n’ebyali ebindi ku bikulu ebyakyusa ebyafaayo eby’eighanga lya Isiraeli.
Omulanzi asinga okuba omumanhifu einho mu Kitabo kino Ekyokubiri ekya Bakyabazinga ni Elisha, eyaira mu kifo kya Eliya.
Ebirimu nga bwe biiraganwaku
Obwakyabazinga babugabaniamu aghabiri 1:1—17:41
a. Omulanzi Elisha 1:1—8:15
b. Bakyabazinga ba Buyudaaya n’aba Isiraeli 8:16—17:4
c. Ekibuga Samaria bakighangula 17:5-41
Obwakyabazinga bwa Buyudaaya 18:1—25:30
a. Okuva ku kyabazinga Hezekia okutuuka ku kyabazinga Yosia 18:1—21:26
b. Obufuzi bwa kyabazinga Yosia 22:1—23:30
c. Bakyabazinga ba Buyudaaya abaasembayo 23:31—24:20
d. Ekibuga Yerusalemu bakighangula 25:1-30