3
Olutalo ghagati gha Isiraeli ni Moabu
1Mu mwaka ogweikumi n’omunaana nga kyabazinga Yehoshafati n’afuga Buyudaaya, Yehoramu mutabane wa Ahabu yaafuuka kyabazinga wa Isiraeli, era yaafugira mu Samaria okumala entangama ya myaka ikumi n’ebiri. 2Yaakola ebibi eri Musengwa Katonda, aye tibyatuuka ku bya lata we na bya inhina kuba yamenhagho empango y’omusambwa Baali, lata we ye yakola. 3Aye era Yehoramu oyo yaakola ebibi ebyaleetera Isiraeli okwonoona ng’oti ni kyabazinga Yeroboamu mutabane wa Nebati bwe yakola. Era Yehoramu oyo yaaloba kuva mu bibi ebyo.
4Ghaabaagho Mesha kyabazinga wa Moabu eyali omwayi w’entaama. Buli mwaka ng’ali n’okugha kyabazinga wa Isiraeli entaama ento emitwalo ikumi (100,000), n’obuviiri obwavanga ku ntaama emitwalo ikumi (100,000) enume. 5Aye kyabazinga Ahabu owa Isiraeli bwe yafa, Mesha oyo yaadheemera kyabazinga wa Isiraeli. 6Kyabazinga Yehoramu kyeyava n’ava mu Samaria, n’asoloza eigye lye mu Isiraeli yoonayoona, 7era n’agheereza obukwenda ye Yehoshafati kyabazinga wa Buyudaaya, ng’akoba ati: “Kyabazinga wa Moabu andheemeire. Onaaneeyimbaku mu lutalo twaja okumulwanisa?”
Kyabazinga Yehoshafati yairamu ati: “Yii, ndidha kukweyimbaku tuje. Nze n’iwe twisa kirala, abantu bange babo, n’embalaasi dhange dhidho.” 8Agho yaabuuza ati: “Tunaagema ngira ki okulumba?”
Yehoramu yairamu ati: “Twidha kugema engira ey’omu irungu lya Edomu.”
9Agho kyabazinga wa Isiraeli, n’owa wa Buyudaaya, n’owa Edomu baajiira ghalala. Bwe baamala okutambula olugendo olw’enaku omusanvu nga lwa kwezungulula, baaba nga tibakaali na maadhi ga kugha igye waire ensolo dhe baali nadho. 10Kyabazinga wa Isiraeli yaakoba ati: “Tukagwireku! Musengwa Katonda atusoloiza ife bakyabazinga abasatu, atute mu ngalo dha Moabu.”
11Yehoshafati kyabazinga wa Buyudaaya yaabuuza ati: “Ghano ghaziraghooku mulanzi wa Musengwa Katonda, ye tusobola okubitamu ni twebuuzaaku ku Musengwa Katonda?”
Agho owundi ku bagheereza ba kyabazinga wa Isiraeli yairamu ati: “Elisha mutabane wa Shafati eyali omugheereza wa Eliya, aligho ghano.”
12Kyabazinga Yehoshafati yaakoba ati: “Musengwa Katonda ayogera ng’abita mu oyo.” Kale kyabazinga owa Isiraeli, ni kyabazinga Yehoshafati owa Buyudaaya, ni kyabazinga wa Edomu, baaja eri Elisha.
13Elisha yaakoba kyabazinga wa Isiraeli ati: “Nze ndi na nkolagana ki n’iwe? Ja y’abalanzi ba lata wo ni y’abalanzi ba inhoko.”
Aye kyabazinga wa Isiraeli yairamu ati: “Busa, Musengwa Katonda n’atwese ife bakyabazinga abasatu okututa mu ngalo dha Moabu.”
14Elisha yaakoba ati: “Ndayira mu Musengwa Katonda omulamu Afuga Amagye ye mpeereza, nti ngoli ti kugemerwa nsoni Yehoshafati kyabazinga wa Buyudaaya, tyandikufiireku naire, waire okukulingaku obulinge. 15Aye mpegaano ndeetera omukubi w’entongooli.”
Omukubi w’entongooli bwe yakuba, amaani ga Musengwa Katonda gaidha ku Elisha, 16yaakoba ati: “Musengwa Katonda akoba ati, ‘Ekiiko kino ekikalu ndidha kukiidhuza ensulo dh’amaadhi.’ 17Musengwa Katonda oyo era akoba ati, ‘Ti mwidha kubona mpewo ng’efuuwa, waire okubona amaadhi nga gagwa. Aye ekiiko ekyo kiidha kwidhula amaadhi, imwe munhwe era n’ensolo dhaimwe dhoona dhinhwe.’ ” 18Elisha yaayongera okukoba ati: “Ate ekyo kitono na inho mu maiso ga Musengwa Katonda, kuba era aidha kuta n’Abamoabu mu ngalo dhaimwe. 19Mwidha kumenha buli kibuga ekyezungulwirwa ekimante ekigumu, na buli kibuga ekiboneka obulungi, muteme buli muti omulungi, musembe ensulo dhoonadhoona edh’amaadhi, era mubunge amabaale mu buli bulime obulungi, mubwonoone.”
20Olunaku olwairirira, agho nga mu kiseera eky’okugheerayo emisengo, amaadhi gaidha nga gava ku luuyi lwa Edomu, okutuusa lwe gaidhula mu kiketezo ekyo kyonakyona.
21Abamoabu boonaboona bwe baawulira nga bakyabazinga abasatu baidhie okubalwanisa, baasoloza abantu boonaboona abato n’abakulu abaali nga basobola okugema eby’okulwanisa, baabaleeta ku nsalosalo. 22Abamoabu bwe baasitukagho enkyo ku nkyo, endhuba yaayaka ku maadhi agaboolekeire, baagabona nga gamyuse ng’oti musaayi. 23Baakoba bati: “Guno musaayi! Bwenebwene bakyabazinga balwanagaine beene na beene, baitagana. Imwe Abamoabu, mukole tuje ku munhago!” 24Aye bwe baatuuka Abaisiraeli ghe baasimba weema dhaibwe, Abaisiraeli baasituka baalumba Abamoabu abo, baabatwaliriza embiro. Abamoabu baalumuka, aye Abaisiraeli baababingirira nga baja bwe babaita. 25Abaisiraeli baazikiriza ebibuga, buli mulala yaasuula eibaale mu bulime obulungi, okutuusa nga babwidhwiza amabaale. Baasemba ensulo dhoonadhoona edh’amaadhi, era baatema emiti gyonagyona emirungi. Mu kibuga Kiriharesethi mwonka mwe baaleka amabaale gaamu, ab’ensuumulo baakyezunguluza baakighangula.
26Kyabazinga wa Moabu bwe yabona ng’olutalo luli kumunhigiriza, yaatwala abasaadha lusanvu abalwanisa empiima, baje baghaguze batuuke ku kyabazinga wa Edomu, aye baalemwa. 27Agho yaatoola mutabane we asinga obukulu eyali ow’okumusikira ku bwakyabazinga, yaamugheerayo ku kimante ekyezungulwire ekibuga, ng’ekigheebwayo ekyokebwa. Abaisiraeli baatya inho, baalekera agho okumulwanisa, bairayo mu nsi y’ewaibwe.