4
Ebintu eby’omu isinzizo
(1 Bakyab 7:23-51)
1Kyabazinga Solomoni yaakola alutaari ey’ekyuma ky’ekikomo, ng’endhuyi dhaayo eina dhaagayaga, era nga dhigheza mita mwenda buli luuyi, ate obugungumavu ng’egheza mita ina n’ekitundu. 2Era yaasaanuusa ekyuma eky’ekikomo, yaakolamu tanka ey’amaadhi eneetooloovu. Yali egheza mita ina n’obutundu buna mu bukiika, okuva ku mugo gwayo ogw’oluuyi olundi okutuuka ku gw’olundi. Era nga mu bugungumavu egheza mita ibiri n’obutundu bubiri, ate yaagheza mita ikumi na isatu n’obutundu bubiri okugyezunguluza. 3Ghansi gh’omugo ogw’etanka eyo okugyezunguluza, ghaaligho enhiriri ibiri edhaakolerwa aghalala nayo, nga dhiriku ebifaananie eby’amabuga, era nga dhigheza mita ikumi na isatu n’ekitundu okwezunguluza tanka eyo. 4Etanka eyo yatyamizibwa ku bifaananie by’ente enume ikumi na ibiri ebyakolebwa mu kyuma eky’ekikomo. Ebifaananie ebyo byali biti: ebisatu nga biringiriire ku luuyi olw’omukono omugooda olw’e buvandhuba, n’ebisatu ebindi ku luuyi olw’e bugwandhuba, n’ebisatu ebindi ku luuyi olw’omukono omusaadha olw’e buvandhuba, ate ebisatu ebisigairegho byalingirira ku luuyi olw’e buvandhuba, nga birinzagainia emikira. 5Omubiri ogw’etanka eyo gwali gugheza milimita nsanvu na itaanu obunene. Omugo gwayo gwakolebwa ng’ogw’ekibya era ng’oti n’ekimuli ekyetebwa liri. Etanka eyo yali ejaamu lita emitwalo ng’oti mukaaga (60,000). 6Era yaakola ebenseni ikumi: eitaanu yaadhita ku luuyi olw’omukono omusaadha olw’e buvandhuba w’eisinzizo, ate eitaanu edhisigairegho yaadhita ku luuyi olw’omukono omugooda olw’e buvandhuba waalyo. Ebenseni edho nga dha kunaakizangamu bye bakozesa mu bigheebwayo ebyokebwa. Amaadhi agaabanga mu tanka, nga ga bakabona ga kunaabisa.
7Yaakola ebikondo by’entaala ikumi mu zaabu, mu nsambo ye byali nga biri n’okukolebwa, yaabita mu isinzizo: ebitaanu ku luuyi olw’omukono omusaadha olw’e buvandhuba w’eisinzizo eryo, n’ebitaanu ebindi ku luuyi olw’omukono omugooda olw’e buvandhuba waalyo. 8Yaakola n’emeeza ikumi yaadhita mu isinzizo: eitaanu ku luuyi olw’omukono omusaadha olw’e buvandhuba w’eisinzizo eryo, n’eitaanu edhindi ku luuyi olw’omukono omugooda olw’e buvandhuba waalyo. Yaakola n’ebibya kikumi mu zaabu.
9Yaakola oluya olwa bakabona, era n’oluya olukologho. Endhigi edh’oku mulyango ogwali ghagati gh’empya edho dhombi yaadhirimbyaku ekyuma eky’ekikomo. 10Etanka yaagita mu nsonda ku luuyi olw’omukono omusaadha olw’e buvandhuba w’eisinzizo, aye nga weekubiireku e buvandhuba.
11Huramu era yaakola ensugha, n’ebitiiyo, n’ebenseni. Mu nsambo eyo, yaamaliriza omulimo gwonagwona gwe yakolera kyabazinga Solomoni mu isinzizo, ogwalimu bino: 12empango eibiri, emitwe ebiri egyakolebwa ng’oti bibya ku mpango edho eibiri, ebifaananie ebyalukibwa ng’oti katimba ni babitimba ku buli mpango, 13ebifaananie eby’emikomamawanga ebikumi ebina (400) bye baata mu nhiriri eibiri okwezungulula ebifaananie bire ebyalukibwa ng’oti katimba ebyali ku mutwe ogwa buli mpango, 14n’ebenseni eikumi n’ebityamo byadho, 15etanka, n’ebifaananie by’ente enume eikumi n’eibiri tanka eyo kwe baagitengeka, 16ensugha, ebitiiyo, n’ebenseni.
Ebintu ebyo byonabyona Huramu bye yakolera kyabazinga Solomoni okukozesebwanga mu isinzizo, byali bya kyuma kya kikomo ekizigule.
17Kyabazinga yakola ebintu ebyo mu kyuma ekisaanuusiibwa, ere mu kiketezo eky’oku museetwe gwa Yorudani, aghali eitaka ery’eitosi, ghagati gh’ebibuga Sukkothi ni Zereda. 18Ebintu ebyo byonabyona Solomoni tiyabipima buzito bwabyo, kuba byali kamaala inho. Kale obuzito obw’ekyuma eky’ekikomo kye baakozesa tibwamanhika.
19Solomoni yaakola mu zaabu omukenenule ebintu ebyo byonabyona eby’okukozesebwanga mu isinzizo: alutaari, ni meeza kwe bata emigaati egigheereibwayo eri Katonda, 20ebikondo by’entaala nga biriku n’entaala dhaaku edh’okwakiranga mu maiso ag’Ekifo Ekitukuvu Einho, ng’entegeka bwe yalinga, 21ebimuli, entaala, entooleso, 22makansu edhisala ebisiriiza ku ntambi, ebibya, ebintu bye bataaku obubbaani, ebintu eby’okutwaliraku amanda agaliku omuliro, pata edh’endhigi edh’omu Kifo Ekitukuvu Einho n’edh’endhigi edh’eisinzizo edh’okuliya. Ebintu ebyo byonabyona byali bya zaabu mukenenule.