2
Solomoni ategeka okuzimba eisinzizo
(1 Bakyab 5:1-18)
1Agho Solomoni yaategeka okuzimba eisinzizo ery’okusinzizangamu Musengwa Katonda, era ni mwene okwezimbira ekisaagaati eky’obwakyabazinga. 2Yaataagho abantu emitwalo musanvu (70,000) ab’okubbeedanga ebintu eby’okuzimbisa, n’abandi emitwalo munaana (80,000) ab’okubaadhanga amabaale mu biketezo eby’oku nsozi. Era yaataagho n’abandi enkumi isatu na lukaaga (3,600) ab’okubalabiriranga.
3Solomoni yaagheereza Hiramu kyabazinga w’e Tiro obukwenda obukoba buti: “Ka ghabeegho enkolagana ninze nga ye wali nayo ni lata wange Daudi, bwe wamugheerezanga emivule gye yazimbisa ekisaagaati kye eky’obwakyabazinga. 4Bona, ndi kutegeka okuzimbira Musengwa Katonda wange eisinzizo, okumugheesa ekitiisa. Ndidha kughaayo eisinzizo eryo libe lya Musengwa Katonda oyo olw’okumuniokezangamu obubbaani obuwunha akawoowo, n’okumuteerangamu emigaati egigheereibwayo y’ali, n’okumugheerangamu ebigheebwayo eby’enkyo n’eigulo ebya buli lunaku, n’eby’oku Sabbato, n’eby’oku mbaga edh’Ebibinuko eby’Okuboneka kw’Omwezi, n’eby’oku mbaga edh’ebibinuko ebindi ebyateebwagho, nga Musengwa Katonda waife oyo bwe yalagira Abaisiraeli okukolanga olubeerera. 5Era eisinzizo lye nja okuzimba lija kuba ikologho, kuba Katonda waife mukologho okusinga bakatonda boonaboona. 6Aye naani asobola okumuzimbira eisinzizo, ate nga n’eigulu lyene erisingayo okuba ghaigulu tirisobola kumumala kubaamu, waire nga inene okwaga agho? Ninze ani asobola okumuzimbira eisinzizo, okutoolaku okumuteeragho ekifo obufo eky’okumuniokezaamu obubbaani? 7Kale ni mpeereza omuntu omukugu mu kugheesa ebintu ebya zaabu, n’ebya feeza, n’eby’ekikomo, n’eby’ekyuma ekigumu einho, n’okukola engoye edha langi ya bbululu, n’edh’eya nakasooma, n’edh’eya kasaayisaayi. Era nga mukugu mu kubaadha amabaale, asobole okukoleranga ghalala n’abakozi bange abakugu ghano mu Buyudaaya ni mu Yerusalemu, lata wange be yataagho. 8Mpeereza emiti emivule, n’emisipuressi, n’emyalumugi, okuva mu Lebanoni, kuba ndidhi ng’abantu bo bwe baidhi einho okutema emiti eyo mu Lebanoni. Era abantu bange baidha kukolera ghalala n’ababo, 9bantegekere emiti kamaala, kuba eisinzizo lye nja okuzimba lija kuba ikologho era nga irungi ebitaloodheka. 10Abantu bo abatema emiti ndidha kubafunira kilo dh’engaano ye bamaze okukuba edhigheza obukaire bubiri n’emitwalo amakumi ana (2,400,000), n’edha sayiri dhoona nga dhigheza kilo obukaire bubiri n’emitwalo amakumi ana (2,400,000), n’elita dh’omwenge ogw’emizabbibu emitwalo amakumi ana (400,000), n’omuzigo ogw’ebibala eby’emiti emyoliva nga gwona gugheza lita emitwalo amakumi ana (400,000).”
11Agho Hiramu kyabazinga w’e Tiro yaaghandiikira Solomoni embaluwa emwiramu ng’ekoba eti: “Musengwa Katonda akufiire kyabazinga w’abantu be, lwa kuba agonza inho abantu be abo. 12Agho ni Musengwa Katonda, oyo Katonda wa Isiraeli asaakibwe, eyatonda eigulu n’ensi, era aghaire Daudi omwana ategeera era ow’amagezi amangi, aidha okuzimbira Musengwa Katonda oyo eisinzizo, ni mwene yeezimbire ekisaagaati eky’obwakyabazinga. 13Mperaano ndi kukugheereza omuntu omugezi ayetebwa Huramu. 14Inhina wa mu kika kya Dani, ate lata we yaaba omutyamye w’e Tiro. Huramu oyo mukugu mu kugheesa ebintu bya zaabu, n’ebya feeza, n’eby’ekyuma eky’ekikomo, n’eby’ekyuma ekigumu einho. Era mukugu mu kubaadha amabaale n’emiti, ni mu kukola ebintu mu ngoye edh’erangi ya bbululu, n’edh’eya nakasooma, n’edh’eya kasaayisaayi, n’empegheevu. Era mukugu mu kukola ogw’okutona ku bintu, n’okukola omusono gwonagwona gwe baba bamughaire. Wuuyo mmukugheereiza akolere ghalala n’abantu bo abakugu, abaakoleranga musengwa wange, lata wo Daudi. 15Kale ni tugheereze engaano, ni sayiri, n’omuzigo ogw’ebibala eby’emiti emyoliva, n’omwenge ogw’emizabbibu, bye wasuubiza. 16Twidha kutema emiti gyonagyona gye weetaaga okuva mu Lebanoni, tugisibe mu binhwa, tugite ku nhandha giseeyeeye okutuuka e Yoppa. Eyo y’oligitoolera okugitwala e Yerusalemu.”
Solomoni atoolera okuzimba eisinzizo
(1 Bakyab 6:1-38)
17Agho Solomoni yaalagira okubala abasenze boonaboona abaali mu Isiraeli, ng’oti ni lata we Daudi bwe yakola. Abasenze abo baagheramu emitwalo ikumi n’etaanu n’enkumi isatu na lukaaga (153,600). 18Ku abo, yaatoolaku emitwalo musanvu (70,000) yaabata ku gw’okubbeedanga ebintu eby’okuzimbisa, n’abandi emitwalo munaana (80,000) yaabata ku gw’okubaadhanga amabaale mu biketezo eby’oku nsozi. Ate abandi enkumi isatu na lukaaga (3,600) yaabata ku gw’okulabiriranga abantu abo.