1
Kyabazinga Solomoni asaba Katonda amagezi
(1 Bakyab 3:1-15)
1Solomoni mutabane wa Daudi yaakakata mu bufuzi mu bwakyabazinga bwe, era Musengwa Katonda we yaabanga ghalala naye, yaamufuula omukologho einho. 2Agho Solomoni oyo yaalagira abaduumizi ab’ebikunsu eby’abaisirukale olukumi olukumi n’ekikumi ekikumi, n’abalamuzi, n’abakulembeze boonaboona mu Isiraeli, era n’Abaisiraeli boonaboona. 3Abantu abo boonaboona abeesoloza, yaaja nabo mu kifo ekigulumivu eky’okusinzizaamu ekyali e Gibeoni kuba mu kifo ekyo n’omwali Weema ey’Okwagaananirangamu ni Musengwa Katonda, Musa omugheereza wa Musengwa Katonda oyo gye yakolera mu irungu. 4Aye Esanduuku ey’Endagaano yali mu Yerusalemu, nga bagikuumira mu kifo Daudi kye yagitegekera, bwe yagitoola e Kiriathi Yearimu. 5Ate alutaari ey’ekyuma eky’ekikomo, Bezaleli mutabane wa Uri era mwidhukulu wa Huri ye yakola, yoona yali e Gibeoni emberi w’Eweema ey’Okwagaananirangamu ni Musengwa Katonda. Kyabazinga Solomoni n’abantu boonaboona baasinziza eyo Musengwa Katonda. 6Solomoni oyo yaaniinaniina, yaaja yaaghaayo ebigheebwayo ebyokebwa, nga buli kigheebwayo kyokebwa kyonakyona okuwaagho ku alutaari eyo ey’ekyuma eky’ekikomo. Yaaghaayo ensolo lukumi (1,000).
7Obwire obwo Katonda yaabonekera Solomoni, yaamukoba ati: “Saba ky’oyenda nkughe.” 8Solomoni yaakoba ati: “Buliidho obairenga ng’oyoleka nga bw’ogonza einho obutalekera lata wange Daudi, era mpegaano ondhikiriiza okumusikira ku bwakyabazinga. 9Wo Musengwa Katonda wange, tuukiriza kye wasuubiza lata wange. Nga bw’onfiire kyabazinga w’abantu abangi ng’oti n’enkungu eri ku nsi, 10nkusaba ompe amagezi n’okumanha, nsobole okukulembera abantu bano kuba naani asobola okufuga eighanga lyo lino eikologho liti?”
11Agho Katonda yaakoba Solomoni ati: “Nga bw’olowooziiza ku ekyo, n’oteesabira kufuna bukombe, oba ebintu, oba ekitiibwa, oba okuzikiriza abazigu bo, oba okughangaala, aye ni weesabira amagezi n’okumanha, osobole okufuganga abantu bange be nakugemya obe kyabazinga waibwe, 12kale amagezi n’okumanha by’osabye mbikughaire. Era ndidha kukugha obukombe, n’ebintu, n’ekitiibwa, nga tighabangaghooku kyabazinga owundi yeenayeena ku baakusooka eyaali abifunieku, waire okubaagho kyabazinga owundi yeenayeena alikwiririra alibifuna.”
Obuyinza n’obukombe Solomoni bye yali nabyo
(1 Bakyab 10:26-29)
13Agho Solomoni yaava e Gibeoni mu kifo eky’okusinzizaamu aghaali Weema ey’Okwagaananirangamu ni Musengwa Katonda, yaira e Yerusalemu yaafugira eyo Isiraeli. 14Yaasoloza ebigaali eby’omu lutalo n’abavuzi b’embalaasi. Yali n’ebigaali eby’omu lutalo lukumi na bina (1,400), n’abavuzi b’embalaasi omutwalo mulala n’enkumi ibiri (12,000) abandi yaabata mu bibuga ebikuumirwamu ebigaali eby’omu lutalo, ate abandi yaabata mu Yerusalemu, mwene ye yali. 15Mu biseera bye, feeza yayala mu Yerusalemu, yaaba mungi ng’oti bwa mabaale. N’emivule gyaba mingi ng’oti miti emisikamore egy’omu biketezo bya Buyudaaya eby’omu biiko. 16Embalaasi Solomoni dhe yali nadho, yadhiragirizanga kuva mu Misiri ni mu Kue, era abasuubuzi be baadhisasuliranga. 17Ekigaali eky’omu lutalo ekirala kyagulwanga mu Misiri ku bitundu lukaaga ebya feeza, n’embalaasi endala yaagulwanga ku bitundu kikumi n’ataanu ebya feeza. Bakyabazinga boonaboona ab’Abahitti n’ab’e Siria, baagulanga ebigaali eby’omu lutalo n’embalaasi, ku basuubuzi ba Solomoni abo.