2
Okusaba mu Kikunsu eky’Abaikiriza mu Kurisito
1Ekisookera irala kye mbakubiriza ni kino: Mweghembenga Katonda mumusabenga, mwewolerezenga era mweyanzenga ku lw’abantu boonaboona. 2Era musabirenga abafuzi ni boonaboona abali mu buyinza, olwo tube bukalamu nga tuli miraala, nga tutya Katonda era nga twebisa bukalamu. 3Ekyo kikalamu, ni Katonda Omulokozi waife akisiima 4era ayenda abantu boonaboona balokolebwe bamanhe amazima; 5kuba ghaligho Katonda mulala ati, era oyo agemagania abantu ni Katonda ali mulala, n’oyo Omuntu Kurisito Yesu. 6Oyo yeeghaayo olw’okununula abantu boonaboona. Ekyo kyakakasibwa mu kiseera kyakyo ekituufu. 7Era ekyo n’ekyanteesaagho mbe omutume era omwegeresa ow’abamaghanga agandi, mbakobere eby’okwikiriza n’eby’amazima. Ndi kwogera mazima, tiri kuguya.2:7: 2 Tim 1:11
8Kale, nhenda abasaadha, buli ghantu woonawoona beeghembenga Katonda, nga baghanika emikono gyaibwe emitukuvu, nga bazira busungu oba ntaka. 9Era nhenda abakazi bavaalenga ebivaalo ebigwaniire, balobe kwemalira ku misono gya nviiri, na ku kwewoomya nga bavaala ebya zaabu oba amabaale ag’omughendo, oba ebivaalo eby’omughendo einho.2:9: 1 Pet 3:3 10Mu kifo ky’ebyo, bakole ebikolwa ebikalamu, nga bwe kigwanira abakazi abaisa mu Katonda ekitiisa. 11Mu kwegeresebwa, omukazi ayegenga kasirise nga yewombeese. 12Tiganha mukazi yeenayeena kwegeresa, oba okulagira omusaadha, okutoolaku okuba agho ng’asiriike busirike. 13Kuba Adamu n’eyasooka okutondebwa, memale kwairaku Eva.2:13: Mainh 2:7, 21-22 14Era Adamu ti n’eyasendebwasendebwa, aye omukazi n’eyasendebwasendebwa, n’agwa mu kibi.2:14: Mainh 3:1-6 15Aye omukazi alilokolerwa mu kuzaala, kasita akalangukira mu kwikiriza, ni mu kugonza, ni mu butuukirivu, ni mu kwebisa obukalamu.