EMBALUWA ESOOKA PAULO YE YAGHANDIIKIRA
AB’E THESSALONIKA
Enhandhula
Thessalonika n’ekyali ekibuga ekikulu ekyatyamangamu omufuzi omukulu ow’eisaza ery’Abaroma ery’e Makedonia. Paulo yatandiikayo Ekikunsu eky’Abaikiriza mu Kurisito ng’amaze okuva e Filippi. Aye ghaabitagho entangama ntono, ghaabaagho Abayudaaya abaidha okumutakania abaamugemerwa ensaalwa olw’ensambo ye yakoberangamu abantu abataali Bayudaaya obukwenda obw’Ekikurisito, abaali batooleire okunhoonhebwa okusoma Ekiyudaaya ni baira ku Kurisito. Paulo yakakibwa okuva e Thessalonika n’okweyongerayo okutuuka e Berea. Bwe yatuuka e Korintho, Timotheo ye yali atambwireku naye era nga mukozi mwine, yaamusengeedhera ebyali biri mu Kikunsu eky’Abaikiriza mu Kurisito eky’e Thessalonika.
Embaluwa esooka Paulo ye yaghandiikira ab’e Thessalonika, yagighandiika olw’okwizaamu amaani n’okugumya Abakurisito abaali nga baba eyo. Yeeyanza olw’amawulire ge yafuna agagema ku kwikiriza kwaibwe n’okugonza kwaibwe, era yaabaidhusa ensambo ye yeebisangamu ng’akaali nabo. Olwo yaabairamu ebibuuzo ebyaitukagho mu Kikunsu eky’Abaikiriza mu Kurisito nga bigema ku biribaagho Kurisito bw’aliira, nga bino: Oyo eyaikiriza Kurisito aye n’afa nga Kurisito akaali kwira, yeena aligheebwa obulamu obutawaagho obuliidha n’okwira kwa Kurisito? Kurisito aliira li? Ghano Paulo gh’abakoberera bawoleere bakole emirimo gyaibwe, nga bwe bateegerera n’okusuubira, okwira kwa Kurisito.
Ebirimu nga bwe biiraganwaku
Enhandhula 1:1
Okusiima n’okusaaka 1:2—3:13
Okulamba okugema ku nneebisa y’Ekikurisito 4:1-12
Okugalaga okugema ku kwidha kwa Kurisito 4:13—5:11
Okulamba okusembayo 5:12-22
Okufundikira embaluwa eno 5:23-28