1
Elukana n’ab’omu ndhu ye nga bali e Shilo
1Ghaaligho omusaadha ye baayetanga Elukana eyabanga mu Ramathaimu Zofimu mu biketezo bya Efuraimu eby’ensozi. Elukana oyo yali mutabane wa Yerohamu. Yerohamu oyo yali mutabane wa Elihu. Elihu oyo yali mutabane wa Tohu. Ate Tohu oyo yaaba mutabane wa Zufa Omuefuraimu. 2Elukana yali n’abakazi babiri: owundi nga ni Hanna ate owundi nga ni Pennina. Pennina yaliku abaana, aye nga Hanna aziraku.
3Buli mwaka Elukana yavanga mu kibuga ky’ewaibwe, yaaja e Shilo okusinza n’okughaayo emisengo eri Musengwa Katonda Afuga Amagye. Eyo n’eyali batabane ba Eli ababiri, Hofuni ni Finehasi, abaali bakabona ba Musengwa Katonda. 4Ku lunaku Elukana lwe yagheerangayo omusengo, yatoolanga ku mamba y’omusengo ogwo yaaghaaku Pennina omugabo, era yaagha buli mwana owa Pennina oyo omugabo, k’abe omughala oba omulenzi. 5Aye waire Elukana yagonzanga inho Hanna, yamughanga omugabo mulala gwonka, kuba Musengwa Katonda yamusiba yaaba nga tazaala. 6Era mughalikwa we Pennina yamuyeeyerezanga inho olwa Musengwa Katonda okumusiba n’atazaala, yaamuleeteranga okunakughala. 7Kityo bwe kyalinga buli mwaka. Buli lwe baajanga mu ndhu ya Musengwa Katonda, nga Pennina oyo amuyeeyereza. Olw’ekyo Hanna yaaliranga bwa bulire, nga n’okulya emere talya. 8Agho Elukana, iba, yaamubuuza ati: “Hanna, lwaki oliranga otyo, n’oloba n’okulya emere? Lwaki onakughala okwaga agho? Nze tikusingira baana balenzi ikumi?”
Hanna ni Eli
9Lwali lulala, nga bamaze okulya n’okunhwa e Shilo, Hanna yaasituka. Mu kiseera ekyo Eli kabona yali atyaime ku kityamo kye kumpi n’omwango ogw’omulyango gw’eisinzizo lya Musengwa Katonda. 10Hanna yaaja yaasaba Musengwa Katonda nga munakughavu inho, era ng’ali kulira amaziga inho. 111:11: Kub 6:5Yeeyama ng’akoba ati: “Wo Musengwa Katonda Afuga Amagye, bw’onaalingirira okudaazibwadaazibwa kwange nze omwiru wo omukazi, n’ondidhukira n’otaneerabira, n’ompa omwana omulenzi, nja kumukugha iwe Musengwa Katonda enaku dhoonadhoona edh’obulamu bwe, era taasalengaku nviiri.” 1:11 “Taasalengaku nviiri” Kitegeeza nti baamugheerayo irala abe wa Musengwa Katonda.
12Bwe yali ng’akaaja mu maiso n’okusaba Musengwa Katonda, Eli yeetegereza omunwa gwe. 13Hanna yali ali kwogera mule mu mwoyo gwe ng’amamiro tigali kuwulikika, aye ng’omunwa gwe n’oguli kutengeeta gwonka. Agho Eli yaadhuuba ati katyo omukazi atamiire. 14Kale yaamukoba ati: “Olituusa li okuba omutamiivu? Lekera agho okunhwanga omwenge.”
15Aye Hanna yaamwiramu ati: “Busa, musengwa wange. Nkaali kunhwa ku mwenge gwa mizabbibu oba ekitamiiza kyonakyona. Nze ndi mukazi aidhwire enaku, era mbaire ndi kufukumula ebiri ku mwoyo gwange mu maiso ga Musengwa Katonda. 16Nze omwiru wo omukazi otantwala ng’omukazi aziramu makulu, kuba agho woonawoona mbaire ndi kukobanga ebindeeteire enaku n’okweraliikirira.”
17Agho Eli yaamwiramu ati: “Ja n’emiraala! Nsaba Katonda wa Isiraeli akughe ekyo ky’omusabye.”
18Hanna yaakoba ati: “Nkweghemba nze omwiru wo omukazi, ondeeterenga okusiimibwanga.” Agho yaaja yaalya emere, era yaalekera agho okunakughala.
Samueli azaalibwa era yaagheebwayo okuba owa Musengwa Katonda
19Bwe bwakya enkyo Elukana n’ab’omu ndhu ye baasinza Musengwa Katonda. Bwe baamala bairayo mu maka gaibwe e Rama. Agho Elukana yaaba ni mukazi we Hanna mu buliri, era Musengwa Katonda yaidhukira Hanna oyo. 20Hanna oyo yaatoola enda, yaazaala omwana mulenzi, yaamutuuma eriina Samueli, 1:20 Samueli: eriina lino mu Luheburayi litegeeza “Eriina lya Katonda.” Mu kulyatula, envuga yaalyo yeefaanaanirizaaku ku nvuga y’ekibono ky’Oluheburayi ekitegeeza “okusaba.” kuba yakoba ati: “Namusaba Musengwa Katonda”.
21Agho Elukana oyo yaaja kabiri n’ab’endhu ye okughaayo eri Musengwa Katonda omusengo ogwa buli mwaka, era n’okutuukiriza kye yeeyama. 22Aye ku mukuzi ogwo Hanna tiyaja nabo, kuba yakoba iba ati: “Omwana bw’alikula n’ava ku mabeere, ndimutwala naamwandhulayo ye Musengwa Katonda era yaaba eyo enaku dhoonadhoona edh’obulamu bwe.” 23Elukana yaamwiramu ati: “Kale kola ky’obona nga n’ekigwaine, okutuusa lw’alikula n’ava ku mabeere. Aye nsaba Musengwa Katonda akakase ekibono kye.” Kale Hanna yaasigala ghaka ng’alera omwana we okutuusa bwe yakula naava ku mabeere.
24Omwana bwe yakula n’ava ku mabeere, Hanna yaamutwala ghalala n’ente ey’emyaka esatu, 1:24 Ebighandiiko ebindi eby’eira bikoba “ente enume isatu.” ni kilo ikumi edh’obuwunga obw’engaano, n’ensawo ey’oluwu eidhwire omwenge ogw’emizabbibu. Yaamutwala mu ndhu ya Musengwa Katonda e Shilo, waire ng’era omwana yali akaali muto. 25Agho baita ente eyo, era baatwala omwana ye Eli. 26Hanna yaakoba Eli ati: “Musengwa Katonda ghangaala! Ninze omukazi ole eyali ghano mu maiso go ng’ali kusaba Musengwa Katonda. 27Namusaba omwana ono, era yampa kye namusaba. 28Kale buti ndi kumughaayo abe wa Musengwa Katonda enaku dhoonadhoona edh’obulamu bwe.” Era baasinza 1:28 Ebighandiiko ebindi eby’eira bikoba “yaasinza.” Musengwa Katonda nga bali eyo.