2
Eibaale eiramu, n’eighanga eitukuvu
1Kale ni mwetoolemu emize gyonagyona emibi, obuguya, okwewoomya ku ngulu, ensaalwa n’okuvuma. 2Ng’abaana abaghere bwe balirira amata amakalamu buli kiseera, mwena buliidho mwegombenga emere enkalamu ey’omwoyo. Bwe mulya emere eyo mwidha kukula era mulokolwe. 3Kuba: “Mwamala okubona Musengwa nga bw’asaasira.”2:3: Zab 34:8
4Mwidhe y’ali. Oyo n’eibaale eiramu abantu lye baaloba bati lizira mugaso, aye eryalondebwa Katonda era ery’omughendo einho. 5Mwidhe y’ali nga muli ng’oti n’amabaale amalamu, abazimbemu endhu ey’omwoyo. Mube bakabona abatukuvu abagheereza emisengo egy’omwoyo egisiimibwa Katonda, nga mubita mu Yesu Kurisito. 6Kuba ebyaghandiikibwa bikoba biti:
“Bona, ndi kuta mu Sioni eibaale,
eibaale ery’oku nsonda lye nalonda era ery’omughendo einho,
era oyo amwikiriza taliswazibwa.”
7Kyava n’aba ow’omughendo einho ye imwe abamwikiriza, aye y’abo abatamwikiriza, ebyaghandiikibwa bikoba biti:2:7: Zab 118:22
“Eibaale abazimbi lye baasuula bati lizira mugaso,
n’eryafuuka empango ey’omusingi mu nsonda.”
8Era biti:2:8: Isa 8:14-15
“Lino n’eibaale abantu kwe beekontola ni bagangalima,
olubaale lwe beeguunhaku ni bagwa.”
Bagangalima kuba tibaikiriza kibono, kye kikoba era atyo Katonda bwe yabategekera.
9Aye imwe muli lulyo lulonde, bakabona aba Kyabazinga, muli ighanga itukuvu era abantu ba Katonda beene. Katonda oyo n’eyabeeta okuva mu nzikiiza okwira mu butangaavu bwe obwewuunhisa einho, yaabalonda okukobera abantu ebyewuninkiriza bye yakola.2:9: Kuv 19:5-6; Isa 43:20, 21; Ma 4:20; 7:6; 14:2; Tit 2:14; Isa 9:2 10Eira timwali bantu ba Katonda, aye buti muli bantu be. Eira mwali timusaasirwa Katonda, aye buti musaasirwa.2:10: Hos 2:23
Mubenga bagheereza ba Katonda
11Aboluganda, nga bwe muli ababise era abanoonia obubudamo mu nsi muno, mbeeghembye mulobere irala kujiira ku mubiri bye gwegomba ebirwanisa omwoyo. 12Mwebisenga bukalamu nga muli mu bamaghanga agandi. Olwo balobe kuboogeraku bati muli bakozi ba bibi, aye babone nga bye mukola bikalamu era basaake Katonda ku lunaku lw’aliidha.
13Ku lwa Musengwa muwulirenga kiisi mufuzi ow’oku nsi, leka abe kyabazinga, 14oba babe abafuzi b’asindika okubonereza abo abakola obubi n’okusaaka abo abakola obukalamu. 15Katonda ayenda inho musirise obutamanha obw’abasiru, nga mukola ebikalamu. 16Mubenga ba idembe, aye mulobe kweyambisa idembe eryo mu kukola bubi. Mubenga bagheereza ba Katonda. 17Buli muntu mumutengamu ekinhagansi. Mugonzenga aboluganda. Mutyenga Katonda, era ni Kyabazinga mumutengamu ekinhagansi.
Okudaazibwadaazibwa kwa Kurisito ng’eky’okuboneraku
18Abagheereza mubenga bawulize ye basengwa baimwe nga mubataamu inho ekinhagansi ti abo ab’ekisa era ababatwala obukalamu bonka, aye n’abo abakambwe. 19Wa nkabi agumira okudaazibwadaazibwa aghazira musango gw’aiziiza olw’okwenda okukola nga Katonda bw’ayenda. 20Naani abasaaka bwe muguminkiriza nga mubonerezeibwa olw’okukola obubi? Aye bwe muguminkiriza nga mudaazibwadaazibwa olw’okukola obukalamu, musiimibwa Katonda. 21Ekyo kye mwayeterwa. Kuba Kurisito yeena yadaazibwadaazibwa ku lwaimwe, yaabalekera eky’okuboneraku kye mube mujiireku. 22Mpaagho kibi kye yakola, waire ekibono kyonakyona eky’obuguya okumuva mu kanwa.2:22: Isa 53:9 23Bwe yavumibwa, mwene tiyavuma. Bwe yadaazibwadaazibwa, tiyeesoomera abo abaamudaazadaaza. Aye yata obwesige mu Katonda oyo asala omusango nga tasaliriza.2:23: Isa 53:7 24Yaganha okwetwika ebibi byaife ng’akomererwa ku musalaba, tube abafu eri ekibi, aye tube balamu eri obutuufu. Okudaazibwadaazibwa kwe n’okwabawonia imwe.2:24: Isa 53:5 25Mwali ng’oti n’entaama edhibuze, aye mperaano mwiziibwa y’Omwayi era Omukuumi w’emyoyo gyaimwe.2:25: Isa 53:6