9
Yuda afa
1Demetirio bwe yawulira nga Nikanori n’eigye lye baafiira mu lutalo, yaagheereza kabiri Bakkide ni Alikimo e Buyudaaya omukuzi ogwokubiri, aye nga ku luno bali n’eigye eryava ku luuyi lwa Siria. 2Baabitira mu ngira y’e Giligali, baazingiza Mesalothi eky’omu Aribela baakigema, era baita abantu kamaala. 3Mu mwezi ogusooka mu mwaka ogwekikumi n’ataanu n’ebiri (152),9:3 mu mwaka ogwekikumi n’ataanu n’ebiri (152): Ogwo nga n’omwaka ogwekikumi n’enkaaga (160) nga Kurisito akaali kwidha. baasimba weema dhaibwe nga badhirinzagainia ni Yerusalemu. 4Olwava agho baatambula baaja e Berea, nga bali n’abaisirukale emitwalo ebiri (20,000) ab’oku bigere n’ab’oku mbalaasi enkumi ibiri (2,000).
5Mu kiseera ekyo Yuda yali asimbye weema dhe mu Elasa, ng’ali n’abaisirukale enkumi isatu (3,000) abaali basingamu okulwana. 6Aye abaisirukale be bwe baabona eigye ery’abazigu einene einho, baatya inho. Bangi ku abo beiba mu nkambi, ghaasigalagho bwa baisirukale batono abataswika mu lunaana (800) bonka. 7Yuda bwe yabona ng’eigye lye lyenuuniegho ate ng’olutalo luja kutoolera, yeeraliikirira inho kuba yali takaali na kiseera kya kusoloza igye lye. 8Kale amaani gaamuwaamu. Aye yaakoba abo abaali bakaali naye, ati: “Ka tuje tulumbe abazigu, tomanha bwe tubaghangula. 9Bale baagezaaku okumupikiriza abiveeku, nga bakoba bati, ‘Titwidha kusobola. Mpegaano ka tusooke tulumuke tuwonie obulamu bwaife, kuba tuli batono inho. Twidha kumala twire nga tuli ni banaife, tusobole okulwanisa abazigu.’ 10Aye Yuda yairamu ati, ‘Ekyo tikiribaagho naire, ife okulumuka olutalo. Ekiseera kyaife bwe kiba nga kituuse, ekiba kibe. Twidha kulwana okwekutula ku lwa Bayudaaya banaife, aye tutaswaziibwa.’ ”
11Agho ab’eigye lya Bakkide baafuluma enkambi, beetegeka mu nhiriri okulwanisa Abayudaaya. Baagabamu abaisirukale ab’oku mbalaasi ghabiri. Ate ab’ensuumulo n’ab’obulaso n’abalwani abakugu baakulemberamu. 12Bakkide yali ku luuyi olw’omukono omusaadha. Abaisirukale ab’oku bigere baatambula, ng’ab’oku mbalaasi babali ku ndhuyi dhombi. Baafuuwa amagwala agalaalika olutalo. N’ab’oku luuyi lwa Yuda boona baafuuwa agaibwe. 13Eitaka lyatengeeta olw’empindo n’okwasiikana ebyava ku magye gombi. Baalwana okuva ku nkyo okutuusa eigulo.
14Yuda yaakizuula nga Bakkide n’ekitundu ku igye lye ekyali kisingamu amaani, baali ku luuyi lwa ku mukono musaadha. Agho abalwani be abaziramu ntete baaja naye, 15baafuntulira irala abazigu abaali ku luuyi olwo, era baababingirira okubatuusa mu biketezo eby’omu biiko.9:15 Mu bighandiiko ebindi kiri nti mu biketezo eby’omu biiko Mu Lugureki kiri nti ku lusozi Azoto. 16Abaali ku luuyi olw’omukono omugooda bwebaabona nga banaibwe ab’oku luuyi olw’omukono omusaadha babafuntwire, baalumba Yuda n’abasaadha be nga babava einhuma. 17Olutalo lweyongera okutaama, era bangi baabaita okuva ku buli luuyi. 18Ni Yuda yeena baamwita, abaasigalagho baalumuka. 19Yonathani ni Simoni baatwala omulambo gwa muganda waibwe oyo, baaguziika mu lwambiidhi lwa badhaadha baibwe e Modeini, 20era baamulira inho. N’Abaisiraeli boonaboona baamulira inho, okumala enaku kamaala. Baakoba bati: 21“Kisoboka kitya omusaadha aziramu ntete ow’amaani era omununuzi wa Isiraeli, okuba ng’afiire!”
22Ebindi byonabyona Yuda bye yakola, entalo dhe yalwana, n’ebikolwa bye yakola ng’aziramu ntete naire, tibyaghandiikibwa kuba byali kamaala inho.
Yonathani aira mu kifo kya Yuda
23Yuda ng’amaze okufa, ghaasitukagho abantu ababi ab’enkwe mu biketezo byonabyona ebya Isiraeli, olwo abakozi b’ebibi bairamu okuba mu nsi eyo. 24Era mu kiseera ekyo endhala ey’amaani einho yaagwa mu nsi eyo. Ekyo kyaleetera ensi eyo yoonayoona okwira mu buyinza obw’abantu ababi ab’enkwe. 25Bakkide yaatoola abantu abatatya Katonda yaabafuula abafuzi b’ensi eyo. 26Abantu abo baayagaazanga buli ghantu okunoonia bakagwa ba Yuda, era baabagemanga baabaleeta ye Bakkide. Bakkide yaababonerezanga okubeesasuulizaaku. 27Kale ghaabaagho okudaagadaaga okw’amaani mu Isiraeli, nga kusingira irala okundi kwonakwona okwali kubaireghooku kasookanga abalanzi balekera agho okuboneka mu Isiraeli.
28Agho bakagwa ba Yuda beesoloza, baakoba Yonathani bati: 29“Kasookanga muganda wo Yuda afa tighabangaghooku wundi ng’oti niye, asobola kutukulembera kulwanisa bazigu baife na kulwanisa Bakkide n’ab’eighanga lyaife abatutakania. 30Kale olwaleero tukulonze oire mu kifo kye, obenga mufuzi waife era otukulemberenga mu lutalo lwe tulimu.” 31Agho Yonathani yaaganha obukulembeze obwo, yaira mu kifo kya Yuda muganda we.
Entalo Yonathani dhe yalwana
32Bakkide bwe yakitegeera, yaasalagho nga mumalirivu okwita Yonathani. 33Aye Yonathani ni muganda we Simoni ni be yali nabo boonaboona bwe baakimanha, baalumukira mu irungu ly’e Tekoa, baasimba weema dhaibwe kumpi n’ensulo y’e Asifari. 34Ekyo Bakkide yaakitegeera ku lunaku lwa Sabbato, yaasitula n’eigye lye lyonalyona yaasomoka omwiga Yorudani.9:34 Akanhiriri kano 34 kaboneka okuba nga ghano ghe kali tikatuukaaniragho bukalamu. Kaboneka okuba nga katuukaanira aghali akanhiriri 43. 35Agho Yonathani yaatuma muganda we Yoanne okukulemberamu abantu baje basabe bakagwa baibwe Abanabateo, baganhe babaterekere emigugu kamaala gye baali nagyo. 36Aye Abayamburi ab’e Medeba baidha baagema Yoanne oyo, baamutwala n’ebintu bye yali nabyo byonabyona.
37Nga ghabiseegho ekiseera, baakobera Yonathani ni muganda we Simoni bati Abayamburi bali n’embaga ey’obugole enene, ng’omugole ni mughala w’owundi ku bakungu abakologho ab’e Kanaani, era nga baja kumutoola mu kibuga Nadabathi ng’agherekerwa abantu kamaala. 38Yonathani ni muganda we Simoni baayenda beesasuuze olwa muganda waibwe Yoanne eyaitibwa. Kale baaja n’abasaadha baibwe beegisa mu nsozi. 39Baaja okulinga bati nga babona eikuukuubira ly’abantu abali kwasiikana, nga bali n’emigugu kamaala. N’omugole omusaadha ng’ali kwidha ni bakagwa be ni baganda be, nga bali n’obugoma n’abembi, era n’eby’okulwanisa kamaala. 40Bano baaziinhuuka okuva ghe baali babwaime, baabalumba era baabaitamu abantu kamaala. Abaawonagho baalumukira mu nsozi. Yonathani ni muganda we Simoni baanhaga ebintu byaibwe byonabyona. 41Olwo eyandibaire embaga y’obugole yaafuuka mukolo gwa kulira, n’edhandibaire enhembo dhaibwe edh’okusagamba dhaafuuka kugegenga. 42Yonathani ni muganda we Simoni bwe baamala okwesasuuza olwa muganda waibwe Yoanne eyaitibwa, bairayo mu bibali ku mbali okw’omwiga Yorudani. 43Ekyo Bakkide bwe yakitegeera yaidha ku mbali okw’omwiga Yorudani ku lwa Sabbato, ng’ali n’eigye einene. 44Yonathani yaakoba abasaadha be ati: “Tusitukiremu twerwaneku, kuba ebintu biri kutujiira bubi inho okusingaku bwe bibairenga bitujiira einhuma ere. 45Mubone, abazigu baabano batuli emberi waife, n’einhuma waife eriyo omwiga, ate mu mbali mwaife mwabaamu ebitoogo n’ebisaka. Tuzira gha kulumukira naire. 46Kale mperaano ka tusabe Katonda atuwonie abazigu baife.”
47Agho olutalo lwatoolera. Yonathani yali ali kumpi okwita Bakkide, aye Bakkide oyo yaamwewoma yaira einhuma. 48Yonathani n’abasaadha be beesuula mu mwiga Yorudani beewuga, baasomoka. Aye abazigu tibaasomoka mwiga ogwo kubabingirira. 49Ku lunaku olwo Bakkide yaafiirwa abantu abaghera ng’oti lukumi (1,000) lulamba.
50Agho Bakkide yairayo e Yerusalemu, yaazimba ebimante ebigulumivu okwezunguluza ebibuga by’omu Buyudaaya ebigheraku, yaabitaaku n’emiryango n’endhigi n’eminhololo egisiba. Ebibuga ebyo nga ni bino: Emmao, ni Bethi Horoni, ni Betheli, ni Timunathi, ni Pirathoni, ni Tefoni, n’ekifo eky’okwewogomamu eky’e Yeriko. 51Ebibuga ebyo byonabyona yaabitaamu enkambi edh’abalwani, bakirige Abaisiraeli. 52Yaayongera ku bugumu obw’ebimante ebyezungululanga ebibuga Bethizuri ni Gezeri, n’ekifo eky’okwewogomamu eky’omu Yerusalemu. Yaamala yaabitaamu abaisirukale n’amaterekero g’eby’okulya. 53Yaagema batabane b’abakungu ab’omu nsi eyo ng’omusingo, yaabatwala yaabasibira mu kifo eky’okwewogomamu e Yerusalemu.
54Mu mwezi ogwokubiri mu mwaka ogwekikumi n’ataanu n’esatu (153), 9:54: mu mwaka ogwekikumi n’ataanu n’esatu (153): Ogwo nga n’omwaka ogwekikumi n’ataanu n’omwenda (159) nga Kurisito akaali kwidha. Alikimo eyali Omukulu wa Bakabona yaalagira bamenhegho ekimante ekyezungululanga oluya olw’omunda olw’eisinzizo, azikirize omulimo abalanzi gwe baakola. 55Aye bwe baali baakatoolera bati okumenha, Alikimo ekintu kyamutema yaasaanhalala, omulimo gwe gwayemerera. Yaagongobala, n’olulimi lwamwesiba nga takaasobola kwogera waire okulaamira ab’omu maka ge. 56Era yaamala yaafiira mu bulumi obutaloodheka. 57Bakkide bwe yawulira ati Alikimo afiire, y’airayo ye kyabazinga Demetirio. Olwo ensi Buyudaaya yaawoleeraku okumala emyaka ebiri.
58Agho ghaabaagho abantu ababi ab’enkwe beeyimba ghalala, baakola olukwe nga bakoba bati: “Bona, Yonathani n’abasaadha be bawoleire nga ghazira kibatiisa naire! Ka tukobe Bakkide aire, aidhe abaghambe mu bwire bulala buti bwonka.” 59Kale baaja beekobaana ni Bakkide, 60era Bakkide oyo yaasitukiramu yaidha n’eigye einene. Yaagheereza embaluwa mu nkweko eri be yakolagananga nabo mu Buyudaaya, baje bageme Yonathani n’abasaadha be. Aye baalemwa okukikola, kuba bale baamala baiguka mu lukwe olwo. 61Yonathani n’abasaadha be baagema abantu amakumi ataanu ab’omu kiketezo ekyo abaakulembera olukwe olwo, baabaita. 62Agho Yonathani n’abasaadha be ni Simoni, baalumukira mu kibuga Bethibasi mu irungu. Baazimba buyaaka ebifo byakyo eby’okwewogomamu ebyali bimenheibwa, baakizimbaku n’ekimante okukyezunguluza. 63Bakkide bwe yabiwulira, yaasoloza eigye lye lyonalyona era yaagheereza obukwenda y’abantu be ab’omu Buyudaaya abaamughagiranga, ng’abakoba beetegeke. 64Agho Bakkide oyo yaidha yaazingiza ekibuga Bethibasi. Yaakirwanisa okumala enaku kamaala, yaakizimbaku n’ebintu eby’okuniiniraku okukirwanisa.
65Aye Yonathani yaalekera muganda we Simoni okulabirira ekibuga ekyo Bethibasi, mwene yeibayo yaaja mu kyalo ng’ali n’abasaadha bwa batono bati. 66Yaalumba Odomera ni baganda be, ni batabane ba Fasironi, nga bali mu weema dhaibwe, yaabaghangula. 67Yeeyongera okulumba n’eigye lye, baalwanisa abazigu. Ni muganda we Simoni yeena ghalala ni be yali nabo baava mu kibuga, baaja baakunaania omuliro ku bintu Bakkide bye yakizimbaku okuniiniraku okukirwanisa. 68Baalwanisa Bakkide oyo baamuba bubi inho, okutuusa lwe baamughangula. Baamuleetera okulemwa okutuukiriza bye yali ategeike okukola. 69Ekyo kyamusungughaza inho ebitaloodheka olw’Abaisiraeli abo ababi ab’enkwe abaamupikiriza okwidha mu kiketezo kyaibwe, era yaabaita mu bungi.
Agho Bakkide oyo yaasalagho okwirayo ewaibwe ye yava. 70Aye Yonathani bwe yakiwulira, yaatuma abakwenda y’ali baleetegho emiraala naye, baize n’Abaisiraeli Bakkide oyo be yatwala nga basibe. 71Bakkide yaaganha okukola nga Yonathani bwe yamusaba. Yaayongeraku n’okumulayirira nga bw’atalimukolaku kabi koonakoona ekiseera kyonakyona ky’alimala nga mulamu. 72Yairiza Yonathani abaali abasibe, yaamala yairayo ewaibwe ye yava. Era tiyaira mukuzi gundi kabiri mu nsi Isiraeli.
73Kale olutalo lwalekera agho mu Isiraeli. Yonathani yaabanga e Mikamashi, yaatoolera okulamulanga abantu n’okumaliragho irala mu Isiraeli abantu ababi ab’enkwe.