8
Endagaano n’Abaroma
1Agho Yuda yaawulira ati Abaroma baali bamanhikaine inho, nti baali ba maani mu ntalo, nga beetegefu okusangaalira abo boonaboona abenda okubeeyungaku bakolagane nabo, era nga beetegefu n’okukola nabo omukwano. 2Abantu baamughayira entalo Abaroma dhe baalwana, n’ebikolwa bye baakola nga baziramu ntete naire mu b’e Galatia, bwe baabaghangula ni bamala babakaka okubaghanga omusolo. 3Bamughayira bye baakola mu Supania ye baaghambira ebirombe ebisimwamu feeza n’ebisimwamu zaabu, 4ni bafuga ensi eyo yoonayoona eyali eghala einho ni Roma, olw’obwegendereza n’obuguminkiriza bwe baali nabwo. Baamala baaghangula bakyabazinga abaidha okubalwanisa abaava etaali kumpi, baabafuntulira irala kumpi bwa kubasaanaigho, abaawonagho baaghanga Abaroma abo omusolo buli mwaka. 5Baalwanisa bakyabazinga Filipo ni Pereseo ab’e Makedonia, baabaghangula ghalala ni bakyabazinga abandi abeeyimba nabo okulwanisa Abaroma abo. 6Baaghangula ni kyabazinga Antioko omukologho ow’omu Asia, eyabalumba ng’ali n’endhovu kikumi n’abiri (120), n’abaisirukale ab’oku mbalaasi, n’ab’oku bigaali eby’omu lutalo, n’eigye einene einho. 7Baamugema nga mulamu era baamulagira mwene n’abalimwiririra mu bufuzi baghenga omusolo mungi, baghengayo n’abantu ng’omusingo, era bagheeyo n’ebiketezo byaibwe ebisingamu kuba birungi, bino: 8Ensi India, Media ni Ludia. Ebiketezo ebyo Abaroma baamala baabigha kyabazinga Eumene.8:8 kyabazinga Eumene: Oyo nga ni kyabazinga Eumene Owokubiri eyali kyabazinga w’e Perugamo okuva mu mwaka ogwekikumi n’ekyenda n’omusanvu (197) okutuuka mu mwaka ogwekikumi n’ataanu n’omunaana (158) nga Kurisito akaali kwidha. 9Abagureki baagezaaku okuja babazikirize, 10aye Abaroma baagwa mu lukwe olwo. Baagheerezaayo omukulu w’eigye mulala ng’ali n’abaisirukale, baaja okubalwanisa. Baabaitamu abantu kamaala, baagema abakazi baibwe n’abaana baabatwala, baanhagulula ebintu byaibwe, beefuga ensi yaibwe, era baabafuula bairu ni ye buli eno. 11Baazikiriza n’obwakyabazinga obundi, n’ebizinga, n’abantu abandi boonaboona abaagezangaku okubalwanisa, era baabafuula bairu. 12Aye baasigala nga bakaali ba mukwano ni bakagwa baibwe, n’abo abaabeesiganga. Baaghangula bakyabazinga ab’okumpi n’ab’eghala, era abantu boonaboona abaakiwuliraku nga bwe baali abamanhikaine einho baabatya inho. 13Abo be baayendanga bafuuke bakyabazinga nga babayamba baafuga, ate abo be baayendanga okutoola ku bwakyabazinga nga babubatoolaku, kuba baali bafuuse ba buyinza inho. 14Aye waire ng’ebyo byonabyona byali bityo, ghazira Muroma waire omulala ati eyavaalaku engule ku mutwe, oba okwegha ekitiibwa ng’avaala engoye edh’obwakyabazinga edha nakasooma. 15Aye baataagho olwekobaano, nga buli lunaku abakiise ebikumi bisatu n’abiri (320) batyama baateesa ebiruma abantu ku lw’obulungi bw’abantu abo. 16Buli mwaka nga balonda omuntu mulala abakulembere era afuge ekiketezo kyaibwe. Era nga boonaboona baba bawulize eri omuntu oyo, aghazira omuntu yeenayeena okuba n’ensaalwa ku mwine oba okukoodhana naye. 17Agho Yuda yaalonda Eupolemo mutabane wa Yoanne era mwidhukulu wa Akko, yaalonda ni Yasoni mutabane wa Eleazari. Yaabatuma e Roma baje bakole n’Abaroma endagaano ey’omukwano n’okukolera aghalala.8:17: 2 Bamak 4:11 18Ekyo yakikola olw’okwewonia Abasiria okubatuntuzanga, kuba yaja okubona ng’Abayudaaya bafuuliibwa bairu. 19Eupolemo ni Yasoni baatambula olugendo luleeyi inho. Bwe baatuuka e Roma baingira mu lwekobaano, baakoba bati: 20“Yuda Makkabeo ni baganda be n’Abayudaaya boonaboona, batutumye twidhe ghano tukole n’imwe endagaano ey’emiraala n’okukolera aghalala, olwo tubalirwe mu bakagwa baimwe be mukolaganira nabo aghalala.”
21Abaroma baasiima entegeka eyo, 22era eno n’embaluwa eyakoopololwa ku kighandiiko kire kye baakola ku bipande eby’ekikomo ni bakigheereza e Yerusalemu bakiidhukirirengaku endagaano eyo ey’emiraala n’okukolera aghalala:8:22: 1 Bamak 14:18
23“Tuli kusaba ebintu bijiirenga bukalamu Abaroma n’Abayudaaya, ka kube ku bukalu oba ku nhandha, ghalobe kubaagho lutalo waire omuzigu yeenayeena abalumba. 24Aye bwe ghatanukagho olutalo nga lusookera ku Baroma, oba ku bandi ku abo be bakolagana nabo eyo yoonayoona ye bali, 25ab’eighanga Buyudaaya baliidha na mwoyo mulala okubayamba nga bwe kiriba kyetaagiisa. 26Era Abayudaaya tibaligha bazigu ba Baroma kintu kyonakyona, k’ebe emere, eby’okulwanisa, empiiya, oba amaato. Baidha kujiiranga ku bisaliibwagho e Roma ng’abantu ab’obuvunaanizibwa, nga ghazira kye basasulwa.
27“Mu nsambo n’endala, bwe ghatanukagho olutalo nga lusookera ku b’eighanga Buyudaaya, Abaroma boona baliidha na mwoyo mulala okubayamba nga bwe kiriba kyetaagiisa. 28N’Abaroma boona tibaligha bazigu ba Bayudaaya kintu kyonakyona, k’ebe emere, eby’okulwanisa, empiiya, oba amaato. Baidha kujiiranga ku bisaliibwagho e Roma ng’abantu ab’obuvunaanizibwa, nga baziramu buguya naire.
29“Ebyo n’ebiviire mu lwekobaano, Abaroma bye bakoleireku endagaano n’ab’eighanga Buyudaaya. 30Aye ye bwidha, ab’oku ndhuyi dhombi bwe balyenda okubyongeraku oba okutoolaku ekintu kyonakyona, balikola nga bwe baliba baboine, era kye baliba bongeireku oba batoireku kiriba nga kikakasiibwa.
31“Aye ebigema ku bibi kyabazinga Demetirio bye yabakola, tumaze okumughandiikira twamubuuza tuti, ‘Lwaki watuntuza otyo bakagwa baife Abayudaaya be tukolagana nabo? 32Bwe banairayo okukutuseeghera nga benda tubayambe, twidha kwira ku luuyi lwaibwe tukulwanise ku bukalu ni ku nhandha.’ ”