7
Ebigema ku Alikimo Omukulu wa Bakabona ni ku ntalo Nikanori dhe yalwana
(2 Bamak 14:1-36; 15:1-36)
1Mu mwaka ogwekikumi n’ataanu n’omulala (151),7:1 Mu mwaka ogwekikumi n’ataanu n’omulala (151): Ogwo nga n’omwaka ogwekikumi n’enkaaga n’omulala (161) nga Kurisito akaali kwidha. Demetirio mutabane wa Seleuko yaava e Roma ng’ali n’eigye lya bantu batono bati. Yaatuuka mu kibuga ekyali ku mbali okw’Enhandha Eyaghagati, yeerangirira nga ni kyabazinga. 2Bwe yali ali kumpi okutuuka mu kisaagaati eky’obwakyabazinga ekya badhaadha be, abaisirukale baagema Antioko Owokutaanu ni Lisia, babaleete ye Demetirio oyo. 3Demetirio bwe yakiwulira yaakoba ati: “Tyenda kubabonaku naire.” 4Kale abaisirukale baabaita. Demetirio yeiriza ekityamo eky’obwakyabazinga.
5Agho Abayudaaya boonaboona abadheemu abatatya Katonda, nga bakulembeirwamu Alikimo eyayenda okuba Omukulu wa Bakabona, baaja ye kyabazinga Demetirio. 6Baaghaamiriza Bayudaaya banaibwe nga bakoba bati: “Yuda ni baganda be baamala okwita abantu boonaboona abaali bakughagira, n’ife twena baatubinga mu nsi yaife. 7Kale kola otumeyo omuntu ye weesiga, aje alambuule abone nga bwe baayonoona ebintu byaife ni bafiiriza ensi yo. Memale abonereze Yuda oyo ni baganda be, n’abamughagira boonaboona.”
8Agho kyabazinga Demetirio yaalonda Bakkide owundi ku abo abaayetebwanga “Bakagwa ba Kyabazinga”, eyali afuga ekiketezo ekiri ere ng’osomoike omwiga Eufurate. Yali mukungu nga mubbede mu bwakyabazinga era nga mwesigwa eri kyabazinga. 9Kyabazinga Demetirio yaamutuma ghalala ni Alikimo omusaadha ataatyanga Katonda. Alikimo oyo, kyabazinga yali yamufuula Mukulu wa Bakabona, era yaamugha ekiragiro okuja okwesasuuliza ku Bayudaaya. 10Kale baasitula okuva mu Antiokia nga bali n’eigye einene, baaja baatuuka mu Buyudaaya. Bakkide yaagezaaku okutega Yuda ni baganda be ng’abagheereza abakwenda babalimbirize nga babakobera okuleetagho emiraala. 11Aye Yuda ni baganda be baaloba kwikiriza abakwenda bye baali bali kukoba, kuba baabona obunene obw’eigye lye baidha nalyo.
12Ghaabaagho banamateeka abeesoloza ni baidha ye Alikimo ni mwine Bakkide, nga babasaba babasalire ensonga mu butuufu. 13Abantu abo baava mu kikunsu eky’Abayudaaya abalumirwa einho eighanga lyaibwe n’ensinza yaalyo, aghazira kukyuka naire. Era n’abaasooka mu Buyudaaya okusaba Alikimo ni Bakkide baleetegho emiraala. 14Beesiga Alikimo eyali kabona ow’oku nda ya Aaroni, nga baadhuuba bati taabakole kabi koonakoona. 15Alikimo mwene yeena yaabalimbiriza nga bw’aidhie okuleetagho emiraala, era yaalayira ati: “Titwidha kutuusa ku imwe kabi koonakoona oba okukatuusa ku bakagwa baimwe.” 16Kale boona baamwesiga. Aye ate yaabeefuulaku, yaabagemaku banaibwe abaghera enkaaga yaabata mu ikomera. Era yaamala yaabaita boonaboona mu lunaku lulala, ng’Ebyaghandiikibwa bwe bikoba biti:
17“Omusaayi ogw’abantu bo abeesigwa gwayuyibwa,7:17: Zab 79:2-3
emirambo gyaibwe gyasansaanizibwa mu Yerusalemu mwonamwona,
ghaaloba kusigalagho muntu waire omulala ati ow’okuziika abafu abo.”
18Ebyo bwe byamala okubaagho, abantu boonaboona baatya inho Alikimo ni Bakkide, era baakoba bati: “Abantu abo bazira mazima era bye bakola tibyoleka butuufu naire, kuba bye baasuubiiza nga balayira n’okulayira baalobye okubituukiriza.” 19Bakkide yaava e Yerusalemu yaaja yaazimba weema dhe e Bethi Zaithi. Yaalagira baagema abandi ku Bayudaaya abaaloba okumweyungaku, aye era baagemaku ni ku Bayudaaya ababi ab’enkwe abaamweyungaku ekyeyendere. Boonaboona baabaita, era baamala baabasuula mu gwina oguleeyi. 20Agho Bakkide oyo yaalekera Alikimo ekiketezo ekyo akifugenga, yaamulekera n’eigye okumuyambangaku. Mwene yairayo ye kyabazinga.
21Alikimo yaafaabiikana inho okwenhweza ng’Omukulu wa Bakabona, 22era nga buli muntu omutabuzitabuzi mu kiketezo ekyo aidha yaamweyimbaku. Abantu abo beefuga Buyudaaya, era baakola akabi kanene inho ku Bayudaaya. 23Agho Yuda yaabona ng’akabi Alikimo n’abasaadha be ke baakola ku Bayudaaya kanene inho, n’okusinga abamaghanga agandi ke baakola. 24Kale yaaja ng’abitabita mu nsi Buyudaaya yoonayoona nga bweyeesasuuliza ku bantu boonaboona abeeyimba ku Alikimo ekyeyendere, era nga bw’abaziyiza okuva mu bibuga okuja mu byalo. 25Alikimo bwe yabona nga Yuda ni be yali nabo beeyongeire okuba ab’amaani, era nga taja kusobola kubalwanisa, yairayo ye kyabazinga. Yaabataaku emisango kamaala eminene.
26Agho kyabazinga yaatuma Nikanori owundi ku bakungu be abaagheebwanga ekitiisa einho, aye nga yakyagha inho Abaisiraeli. Yaamulagira aje azikirize Abaisiraeli abo abamaliregho irala. 27Nikanori yaidha n’eigye einene e Yerusalemu. Yaagezaaku okutega Yuda ni baganda be, ng’abagheereza obukwenda okubalimbiriza nga bw’aja okuleetagho emiraala. Yaakoba ati: 28“Nze n’imwe tutalwana lutalo. Ndidha kwidha ye muli n’abantu batono bati, mbabone nga tuli mu miraala.” 29Kale baidha ye Yuda era baalamusagania bya bulungi. Aye abazigu ba Yuda abo, baali beetegeike kumugema bugeme. 30Era Yuda bwe yagwa mu lukwe lwa Nikanori olwo n’alutegeera, yaatya, yaaloba kwirayo kuja y’ali. 31Agho Nikanori yaakizuula ng’olukwe lwe balugwiremu. Kale yaaja okulwana olutalo ni Yuda oyo okumpi n’e Kafarasalama. 32Mu igye lya Nikanori mwafaamu abaisirukale ng’ebikumi bitaanu (500). Abaasigalagho baalumukira mu kibuga kya Daudi mu Yerusalemu.
33Ebyo nga biwoire, Nikanori yaaniinaniina yaaja ku lusozi Sioni. Abandi ku bakabona baavaayo mu isinzizo ghalala n’abakulu ab’ebika, baidha baamulamusa bukalamu, baamwoleka n’ekigheebwayo ekyokebwa kye baali bali kughaayo ku lwa kyabazinga. 34Aye mwene yaabasekerera n’obunhoomi, yabaleetera okuba aboonoonefu ng’abafuudhaku amatanta, era yaayogera nga yeesaakiriza. 35Yaalayira ng’aidhwire obusungu ati: “Yuda n’eigye lye bwe bateegheeyo mu ngalo dhange amangu geene, olunaira nti nga mmaze okughangula, ndidha kwokya eisinzizo lino.” Yaavaagho mu busungu obubitirivu. 36Bakabona baingira mu luya lw’eisinzizo, baayemerera emberi okulingirira alutaari n’eisinzizo eryo. Baatoolera okulira amaziga nga bakoba bati: 37“Wo Musengwa, niiwe walondamu endhu eno bagituume eriina lyo, olwo ebenga ekifo abantu bo mwe banaabanga okukusaba nga bakweghemba. 38Buti weesasuulize ku musaadha ono n’eigye lye, boonaboona obaleetere okufiira mu lutalo. Otabeerabira nga bwe boogeire ebikuvuma, otabaganha kusigalagho nga bakaali balamu.”
39Mu kiseera ekyo, Nikanori yaava e Yerusalemu, yaaja yaasimba weema dhe e Bethi Horoni. Eyo eigye ery’Abasiria ye lyamwagaana lyamweyungaku. 40Era mu kiseera n’ekirala ekyo, ni Yuda yeena yaaja yaasimba weema dhe mu Adasa, ng’ali n’abantu enkumi isatu (3,000). Agho Yuda oyo yaasaba ati: 41“Wo Musengwa, kyabazinga bwe yatuma7:41 kyabazinga bwe yatuma: Kyabazinga ali kwogerwaku ghano, ni Sennakeribu ow’e Siria ( 2 Bakyab 19:35). abakwenda okwidha okwogera ebikuvuma, malaika wo yafuluma yaabaitamu abantu emitwalo ikumi na munaana n’enkumi itaanu (185,000). 42Mbeeni n’olwaleero ganha oniantuleniantule eigye lino, abantu boonaboona bakimanhe nti Nikanori ali kubonerezebwa lwa kwogera bubi ku isinzizo lyo eitukuvu. Mubonereze nga bw’agwaniire olw’obubi bwe.”
43Agho amagye ag’oku ndhuyi dhombi gaayagaanana mu lutalo, ku lunaku olweikumi n’eisatu mu mwezi ogwetebwa Adari. Eigye lya Nikanori baalighangula, era Nikanori mwene oyo n’eyasooka okwitibwa mu lutalo olwo. 44Abaisirukale be bwe baabona ng’afiire, baasuula agho eby’okulwanisa baalumuka. 45Abayudaaya baababingirira olunaku lwonalwona, okubatoolera mu Adasa okubatuukiza irala e Gezeri. Baajanga bwe bafuuwa amagwala agalaalika okulumba omuzigu. 46Abantu baava mu byalo ebiriinaine agho, baazingiza eigye ery’abaali bali kulumuka, baabairirizaayo eri abaali bali kubabingirira. Boonaboona baitirwa mu lutalo, ghaaloba kuwonagho muntu waire omulala ati.
47Abayudaaya baanhaga ebintu by’abazigu. Baatema ku Nikanori omutwe, baamutemaku n’omukono gwe omusaadha gwe yabagalulira ku lule ng’ali kwesaakiriza, byombi baabireeta kuliya kwa Yerusalemu baabiraga abantu. 48Abayudaaya baasagamba inho, era baakuza olunaku olwo nga bali mu isanhu eritaloodheka. 49Baabisa n’ekiragiro ng’olunaku olwo olweikumi n’eisatu mu mwezi Adari lunaakuzibwanga buli mwaka. 50Ensi Buyudaaya yaafunaku akalembereza okumala akaseera.