5
Entalo n’amaghanga ag’oku muliinaano
(2 Bamak 10:14-33; 12:10-45)
1Abamaghanga ag’oku muliinaano bwe baawulira ng’Abayudaaya bazimbye alutaari, baizaagho n’eisinzizo buyaaka, obusungu bwabagema inho. 2Baasalagho okuzikiriza Abayudaaya boonaboona abaali baba aghalala nabo. Kale baatoolera okutemula abantu baife.
3Agho abantu b’omu Idumea baidhukulu ba Esau, baabwamanga okweteega Abaisiraeli. Yuda kyeyava n’abalwanisa mu kifo ekyetebwa Akurabattene, yaabatirimbula inho, yaabanhagululaku n’ebintu byaibwe. 4Abantu ab’e Bayeana boona yaabakolaku, kuba baali bafuukire Abaisiraeli ng’oti lutuula okubagemyanga buli kiseera nga babeeteega mu ngira. 5Abantu ab’e Bayeana abo yaabasibira mu bifo byaibwe eby’okwewogomamu, yaalayira n’okulayira ati ali n’okubazikiriza. Yaamala yaakuma omuliro ku bifo byaibwe ebyo eby’okwewogomamu, yaayokeramu ni boonaboona abaabirimu. 6Agho yaaja okulumba ensi Ammoni, yaayagaanayo eigye eikologho ery’amaani nga liduumirwa omusaadha eyayetebwanga Timotheo. 7Yuda oyo yaalwana nabo entalo kamaala, yaabakuba baanafughalira irala, yaabaghangula. 8Yaaghamba n’ekibuga Yazeri n’ebyalo ebikyezungulwire, memale yairayo e Buyudaaya.
9Agho abamaghanga agandi abaali mu Gileadi beesoloza nga benda balumbe era bazikirize Abaisiraeli abaali mu kiketezo kyaibwe. Aye Abaisiraeli baalumukira mu kifo eky’okwewogomamu ekyali e Dathema. 10Era baagheereza Yuda n’abasaadha be embaluwa ekoba eti: “Abamaghanga agandi abatwezungulwire beesoloiza okutulwanisa batuzikirize. 11Bali kwetegeka okwidha okulumba ekifo kino eky’okwewogomamu mwe tulumukiire, nga baduumirwa Timotheo. 12Kale mwidhe mpegaano mutuwonie mututoole mu ngalo dhaibwe, kuba abandi ku ife kamaala baitiibwa. 13Ni Bayudaaya banaife ababaire mu kiketezo ky’e Tobu5:13 mu kiketezo ky’e Tobu oba ababaire bali kulwana ni Tobia. boonaboona babaise, baatwala bakazi baibwe n’abaana baibwe mu bunhage, n’ebintu byaibwe baabinhagulula baabitwala. Era baitayo abasaadha ng’oti lukumi (1,000).”
14Baali bakaasoma embaluwa eyo, abakwenda abandi baatuuka n’amawulire malala ago okuva e Galilaaya, nga bakanwiremu n’ebivaalo byaibwe olw’enaku. 15Baakoba bati: “Abantu b’e Putolemai n’ab’e Turo n’ab’e Sidoni n’ab’omu Galilaaya mwonamwona, beeyimbye ghalala baakola eigye okwidha okutuzikiriza.”
16Yuda n’abantu be yali nabo bwebaawulira ebyo, baayeta abantu okwidha mu lwekobaano olukologho, basalegho kye babe bakole okuyamba ab’eighanga lyaibwe abaali batuuse mu buzibu obwo nga balumbiibwa abazigu. 17Yuda yaakoba muganda we Simoni ati: “Londayooku abasaadha, muje mununule Bayudaaya banaife abali mu Galilaaya. Ate nze ni muganda waife Yonathani twidha kuja e Gileadi.” 18Yuda yaalekera abaisirukale abaasigalagho ku igye lye boonaboona ogw’okukuuma Buyudaaya, era yaataagho Azaria ni Yosefu mutabane wa Zekaria babe abakulembeze b’abantu. 19Yaabalagira ati: “Ndi kubaleka ghano mukulemberemu abantu bano, aye mutaja kulwana na bamaghanga gandi okutuusa nga tumaze okwira.” 20Agho Simoni baamubalira abantu enkumi isatu (3,000) ab’okuja nabo e Galilaaya, ate Yuda baamubalira abantu kanaana (8,000) ab’okuja nabo e Gileadi.
21Kale Simoni yaaja e Galilaaya, yaalwana entalo kamaala n’abamaghanga agandi, yaabafuntula yaabaghangula. 22Yaamala yaababingirira okubatuukiza irala ku kibuga Putolemai. Yaabaitamu abantu ng’oti enkumi isatu (3,000), yaabanhagululaku n’ebintu byaibwe. 23Agho Yaatoolayo Abayudaaya abaali mu Galilaaya ni mu Aribatta, ghalala ni bakazi baibwe n’abaana baibwe n’ebyaibwe byonabyona bye baali nabyo, yaira nabo mu Buyudaaya. Ghaabaagho okusagamba okw’amaani.
24Mu kiseera n’ekirala ekyo, Yuda Makkabeo ni muganda we Yonathani baasomoka omwiga Yorudani, baatambulira enaku isatu nga babita mu irungu. 25Baayagaanana n’Abanabateo, baabasangaalira bukalamu era baabakobera byonabyona ebyatuuka ku Bayudaaya nga bali mu Gileadi. 26Baabakobera bati: “Ghaligho Abayudaaya kamaala abaasibwa mu makomera agali mu bibuga ebyezungulwirwa ebimante ebigumu, nga Bozira, ni Bosori, ni Alema, ni Kasifo, ni Makedi, ni Karanaimu. 27Abandi baasibwa mu makomera agali mu bibuga ebindi eby’omu Gileadi. Era abazigu bali kwetegeka okulumba ebifo eby’okwewogomamu ebirimu Abayudaaya ku lunaku olwaidho, olwo babaite boonaboona babazikirize mu lunaku lulala luti.”
28Kale Yuda n’eigye lye baakyusa mangu ago, baagema engira ey’omu irungu, baaja baalumba ekibuga Bozira baakigema. Baita buli musaadha ye baayagaanamu, baanhagulula n’ebyali mu kibuga ekyo byonabyona, baamala baakikunaaniaku omuliro kyaya. 29Agho baavaagho, baatambula obwire bwonabwona baatuuka ku kifo eky’okwewogomamu eky’e Dathema. 30Agho obwire nga buli kukya, Yuda n’abasaadha be baaja okulinga bati, nga babona eigye einene eritabalika. Ng’abaisirukale baalyo bali kuleeta amadaala n’ebintu eby’okuniiniraku ebimante, bageme ekifo eky’okwewogomamu, olwo balumbe Abayudaaya abakirimu. 31Yuda bwe yawulira okwasiikana mu kibuga n’amagwala agali kuvuga, yaamanha ng’olutalo lutooleire. 32Kale yaakoba abasaadha be ati: “Olwa leero luno mulwanirire Bayudaaya banaife!”
33Agho baajiira mu bikunsu bisatu okulumba abazigu nga babava einhuma, eno nga bwebafuuwa amagwala era nga bwebaleekaana nga basaba Katonda. 34Ab’eigye lya Timotheo bwe baabona nga Yuda Makkabeo n’ali kubaidhira, baakyuka balumukegho. Aye Yuda yaabatirimbula inho, yaabaitamu abantu oti kanaana (8,000) olunaku olwo.
35Yuda yaamala yaakyukira agho, yaaja okulwanisa ekibuga Alema era yaakigema. Yaita abasaadha boonaboona be yayagaanamu, yaakinhagululamu ebintu, yaakikunaaniaku n’omuliro. 36Bwe yava eyo yeeyongerayo, yaaja yaagema ebibuga Kasifo, ni Makedi, ni Bosori, n’ebibuga ebindi eby’omu Gileadi.
37Ebyo nga biwoire, Timotheo kabiri yaasoloza eigye erindi, baasimba weema dhaibwe nga balingiriiza Rafoni ekiri ere ng’osomoike omwiga. 38Yuda yaatumayo abantu baaja baakeeta ekifo ekyo. Baamala baira baamukobera bati: “Abamaghanga agandi boonaboona ab’omu kiketezo ekyo beeyunze ku Timotheo baakola eigye einene einho. 39Era Timotheo oyo yafunieyo n’amagye amapangise ag’Abawarabu bamubeereku, era nga baasimbye ira weema dhaibwe ku luuyi lule olundi olw’omwiga nga beetegefu okukulumba.” Kale Yuda yaaja okubalwanisa.
40Yuda n’eigye lye bwebaaseeta okumpi n’omwiga, Timotheo yaakoba abaduumizi mu igye lye ati: “Bweyeeyongera okwidha ye tuli n’asomoka omwiga, tituumusobole kumwizaayo inhuma, aidha kutughangula bughangule. 41Aye bwatya n’akoma ku luuyi lule olw’omwiga, ife twidha kusomoka tuje tumulumbe tumughangule.” 42Yuda bwe yatuuka ku mbali kw’omwiga, yaagha abaduumizi be ebiragiro obutaganha muntu yeenayeena kwemerera, aye baje buje mberi mu lutalo. 43Yuda mwene n’eyasooka okusomoka omwiga okulwanisa abazigu, n’abantu be boonaboona baamunonereza. Abamaghanga agandi baavaagho buve baasansuka, baasuula ere eby’okulwanisa byaibwe, baalumukira mu isabo ery’emisambwa eryali mu kibuga Karanaimu. 44Aye Yuda n’abasaadha be baagema ekibuga ekyo, baayokya n’eisabo eryo ghalala ni boonaboona abaalirimu. Karanaimu bwe kyamala okughangulwa, olwo abamaghanga agandi nga tibakaasobola kulwanisa Yuda.
45Agho Yuda yaasoloza Abayudaaya boonaboona abaali mu Gileadi, aireyo nabo e Buyudaaya. Kyali kikunsu kinene inho nga kirimu abantu aba buli nsambo, nga bali ni bakazi baibwe, n’abaana baibwe, n’ebintu byonabyona bye baali nabyo eyo. 46Baaja baatuuka ku kibuga Efuroni ekyali ekinene einho, nga kyezungulwirwa ebimante ebigumu. Baali tibasobola kukibita ku mbali ku luuyi lwonalwona, ka lube olw’omukono omusaadha oba olw’omukono omugooda, okutoolaku okukibitamu ghagati. 47Aye abantu baamu baaloba kubaganha kukibitamu, era baasemba amabaale mu miryango gyakyo. 48Agho Yuda yaabagheereza obukwenda obw’omukwano nga bukoba buti: “Tubeeghembye mutuganhe tubiteku mu kiketezo kyaimwe, twireyo ewaife. Ghazira aidha kubakola kabi koonakoona. Twidha kubita bubite nga tutambulira ku bigere.” Aye baaloba okwigulagho emiryango.
49Kale Yuda yaakoba abantu boonaboona abaali mu kikunsu kye yali nakyo, basigale agho ghe baali okutoolaku abalwani. 50Yaasimbya abalwani be enhiriri, baaja baalumba ekibuga. Baalwana olunaku olwo lwonalwona n’obwire bwonabwona, okutuusa lwe baakighamba. 51Yuda yaalagira baita abasaadha boonaboona abaali mu kibuga ekyo, yaanhagulula ebintu, era yaamala yaakisaaniagho. Agho mwene n’eigye lye baakibitamu nga baja batuuma mirambo. 52Baasomoka omwiga Yorudani, baatuuka mu kiketezo eky’oku museetwe ekigazi ekiringiriiza Bethi Shani. 53Agho woonawoona nga bali kutambula, Yuda yaajanga ng’asoloza abaali basigaire einhuma nga bakooye, eno nga bw’aiza mu bantu amaani okutuusa bwe baatuuka mu Buyudaaya. 54Baaniinaniina baaja ku lusozi Sioni mu isanhu n’okusagamba. Baaghaayo ebigheebwayo ebyokebwa, olw’okuba baira bukalamu nga ghazira muntu ye bafiiriirwaku waire omulala ati.
55Ekiseera Yuda ni Yonathani mutabane wa Zekaria kye baabeeramu mu Gileadi, muganda waibwe Simoni yali ali kulwanisa Putolemai eky’omu Galilaaya. 56Agho Azaria ni Yosefu mutabane wa Zekaria abaali abaduumizi ab’eigye eryali mu Buyudaaya, baawulira ebikolwa Yuda ni Yonathani bye baakola nga baziramu ntete naire, era baawulira n’obughanguzi bwe baatuukaku. 57Boona baakoba bati: “Tuje tulwanise abamaghanga agandi abatwezungulwire, twena twekolere eriina.” 58Agho baalagira abantu be baali nabo, baaja baalumba Yamonia. 59Gorigia n’abasaadha be baava mu kibuga ekyo, baidha ye Azaria ni Yosefu. 60Era baabaghangula, baamala baababingirira okubatuukiza irala ku nsalosalo ni Buyudaaya. Ku lunaku olwo mu Baisiraeli mwaitibwamu abantu ng’enkumi ibiri (2,000). 61Okughangulwa okunene kutyo kwabatuukaku, olw’okuba baayenda okwefuula abakanu einho, baaloba kuwulirisa Yuda ni baganda be. 62N’ekindi, tibaali ba ku nda ya Bamakkabeo Katonda be yalonda okuleetera Abaisiraeli eidembe.
63Abaisiraeli n’abamaghanga agandi boonaboona baaghanga Yuda Makkabeo ni baganda be ekitiisa kinene. Era abantu olwawuliranga obuwulire ku liina lyaibwe, 64nga beesoloza okubasaaka.
65Agho Yuda ni baganda be baaja okulwanisa Abaedomu baidhukulu ba Esau, mu nsi eri ku luuyi olw’omukono omusaadha olw’e buvandhuba. Baalumba ekibuga Heburoni n’ebyalo ebikyezungulwire, baamenhamenha ebifo byakyo eby’okwewogomamu, baayokya n’ebituuti ebirengererwaku ebikyezungulwire. 66Agho baatambula nga babitira mu Marisa, baaja mu nsi ey’Abafilisiti.5:66 Mu bighandiiko ebindi eby’eira mulimu Marisa aye mu Lugureki mulimu Samaria. 67Olunaku olwo ghaaligho bakabona abaitibwa mu lutalo olw’okwenda okwefuula abakanu einho. Kale mu busiru bwaibwe, boona baaja mbu balwane. 68Yuda oyo ni baganda be abo baamala baakyukira agho, baaja mu Azoto mu nsi y’Abafilisiti. Baamenhamenhagho alutaari dhaibwe, baayokya ebifaananie ebibaadhe eby’emisambwa gyaibwe, baanhagulula n’ebibuga byaibwe, memale baira mu Buyudaaya.