4
1Gorigia yaatoola abaisirukale enkumi itaanu (5,000) ab’oku bigere, n’ab’oku mbalaasi lukumi (1,000) abasingamu kulwana ntalo. Baava ghe baali basimbye weema dhaibwe obwire, 2ng’abasaadha abaava mu kifo eky’okwewogomamu eky’omu Yerusalemu n’abali kubakulembera. Baaja okulumba eigye ery’Abayudaaya nga balizinduukiriza. 3Aye Yuda bwe yakiwulira yaaja n’abalwani be ab’amaani okulumba eigye lya kyabazinga mu Emmao, 4nga Gorigia n’eigye lye bakaali kwirayo mu nkambi yaibwe. 5Gorigia n’eigye lye bwe baatuuka Yuda n’abasaadha be ghe baali basimbye weema dhaibwe obwire obwo, tibaayagaanamu muntu yeenayeena. Kale yaatoolera okuja nga bw’ayagaaza mu nsozi, ng’akoba mule ati: “Bano batulumwike bulumuke.”
6Agho obwire nga buli kukya, abazigu baabona Yuda ng’ali n’abasaadha enkumi isatu (3,000) mu kiketezo eky’oku museetwe, aye ng’eby’okulwanisa bye bagemye ti bya maani nga bwe bandibyenze bibe. 7Ate Yuda n’abasaadha be baabona abaisirukale b’omu igye ery’abazigu abamaghanga agandi nga ba maani inho, era nga baidhi inho okulwana entalo. Baali bataireku ebivaalo eby’omu lutalo, nga bali kukuumibwa abaisirukale ab’oku mbalaasi. 8Aye Yuda yaakoba abasaadha be ati: “Muteeraliikirira lwa bunene bwa igye lyaibwe, era mutatya ni bwe batulumba. 9Mwidhukire nga Musengwa bwe yawonia badhaadha baife ku Nhandha Emyufu, kyabazinga w’e Misiri bwe yali ali kubabingirira n’eigye lye. 10Buti ni ka tusabe Musengwa oyo atusaasire. Ka tumusabe akuume endagaano ye yakola ni badhaadha baife, aniantuleniantule eigye lino olwaleero luno nga tubona. 11Olwo abamaghanga agandi boonaboona baidha kumanha nga Abaisiraeli bali ni Katonda abanunula n’abalokola.”
12Abamaghanga agandi bwe baabona Yuda n’abasaadha be nga bali kwetegekera olutalo, 13baava ghe baali, baje balwane. Agho Yuda n’abasaadha be baafuuwa amagwala gaibwe, 14baaja baabalumba. Abamaghanga agandi baavaagho buve baasansuka, baalumukira mu kiketezo eky’oku museetwe. 15Aye abo boonaboona abaasigala einhuma baitibwa. Abaisiraeli baamala baabingirira abazigu abo okubatuusa e Gezeri, abandi baabatuusa mu kiketezo eky’oku museetwe ogw’e Idumea, n’abandi baabatuusa mu bibuga, eky’e Azoto n’eky’e Yamonia. Woonawoona baita abantu ng’oti enkumi isatu (3,000).
16Yuda n’eigye lye bwe baira okuva y’okubingirira abazigu, 17yaakoba abasaadha be ati: “Mutagwidhubanira kunhagulula bintu, kuba ekaaliyo olutalo oluli kwidha lwe tuli n’okulwana. 18Gorigia n’eigye lye batuli kumpi agho mu nsozi. Aye imwe mugume bugume mulwanise abazigu baife, memale mutoole omunhago nga ghazira abakobaku naire.”
19Yuda yali ali kuja okumala okwogera ati, ekikunsu eky’abazigu kyavaayo mu nsozi, 20baabona ng’eigye lyaibwe balibinzeegho era baabona omwosi ogwabamanhisa nga ghe baali basimbye weema dhaibwe ghali kuya omuliro. 21Bwe baabona ebyo baatya inho. Era bwe baabona Yuda n’abasaadha be nga bali mu kiketezo eky’oku museetwe beetegeike okulwana, 22boonaboona baalumukira e Filisitia. 23Agho Yuda yairayo aghaali eweema edh’abazigu, yaanhagulula feeza ni zaabu mungi inho, n’engoye edh’erangi ya bbululu n’edh’eya nakasooma, n’eby’obukombe ebindi kamaala. 24Abayudaaya bwe baira mu kifo ghe baasimba weema dhaibwe, baayemba olwembo olusaaka Katonda ow’omu igulu, olw’okuba okusaasira kwe kubaagho byanda na byanda. 25Olunaku olwo lwaleetera Abantu Abaisiraeli obughanguzi obw’amaani.
Okughangula Lisia
(2 Bamak 11:1-12)
26Agho ab’omu igye ery’abamaghanga agandi abaawonagho, baaja ye Lisia, baamukobera byonabyona nga bwe byali. 27Lisia bwe yabiwulira byamuwubania n’amaani gaamuwaamu, olw’okubona ng’Abaisiraeli tibaaghangulwa nga bwe yali akitegeike okusinziira ku kiragiro kya kyabazinga.
28Mu mwaka ogwairirira, Lisia yaasolozaayo eigye lije lighangule Abaisiraeli. Lyalimu abantu abaali basingamu okulwana abaghera emitwalo omukaaga (60,000) nga ba ku bigere, n’abandi enkumi itaanu (5,000) nga ba ku mbalaasi. 29Baaja baatuuka mu Idumea, baasimba weema dhaibwe e Bethizuri. Yuda yaidha ye bali ng’ali n’abaisirukale omutwalo mulala gwonka (10,000). 30Yuda bwe yabona ng’eigye lya bale lya maani inho, yaasaba Katonda ati: “Wo Katonda Omulokozi wa Isiraeli, tugwaine tukusaakenga. Wakozesa omukono ogw’omugheereza wo Daudi, waaghangula omuzigu ow’amaani eyatulumba. Waaleetera Yonathani mutabane wa Saulo n’omwisuka eyamugemeranga eby’okulwanisa, okughangula eigye eiramba ery’Abafilisiti. 31Ni mpegaano kozesa omukono ogw’abantu bo Abaisiraeli okughangula abazigu baife bano. Oleetere abazigu abo okuswala, waire nga bali kwesiga inho eigye lyaibwe ery’oku bigere n’ery’oku mbalaasi. 32Baleetere okutya, baweemu amaani bafootookerere era badhugumire nga beeraliikirira okughangulwa okuboolekeire. 33Baitise empiima dh’abo abakugonza ni bakusinza, olwo abakwidhi boonaboona bakwembere enhembo edhikusaaka.”
34Agho olutalo lwatoolera, era mu igye lya Lisia mwafaamu abaisirukale enkumi itaanu (5,000). 35Ekyo kyaleetera Lisia okwirayo mu Antiokia, kuba yabona ng’eigye lye liri kughangulwa, yaabona n’ensambo Yuda n’abasaadha be ye baali abagumu aghazira kwebalirira, nga booleka bwe baali abeetegefu okuba abalamu oba okufa aye nga tibafiiriirwa kitiibwa kyaibwe. Bweyatuuka eyo yaasoloza eigye ery’abaisirukale abapangise, ng’ategeka okwira okulumba Buyudaaya n’eigye einene okuwula lye yaidha nalyo ku olwo.
Okutukuza eisinzizo
(2 Bamak 10:1-8)
36Agho Yuda ni baganda be baakoba bati: “Bona, nga bwetumaze okughangula abazigu baife, ka tuniineniine tuje e Yerusalemu, twiremu okutukuza eisinzizo era twiremu okulighaayo libe lya Katonda.” 37Kale eigye lyonalyona lyesoloza, lyaja ku lusozi Sioni. 38Baayagaana ng’eisinzizo lyawolongera lyazika, alutaari baagyonoona, emiryango baagyokya omuliro, empya dhaazika dhaafuuka bwa bibira ng’oti n’ebiri ku nsozi, n’ebisenge bya bakabona byamenhebwagho. 39Enaku yaabagema inho, baakanulamu ebivaalo byaibwe, baawowoola, beemansira n’eivu mu mitwe. 40Agho baakuba amakiryaivu era baakutama n’ebyeni byatuuka ku itaka. Eigwala bwe lyavuga ng’akamanhiso, buli muntu yaalira ng’asaba Musengwa.
41Agho Yuda yaalagira abandi ku baisirukale be baje balumbe abasaadha abaali mu kifo eky’okwewogomamu, eno nga mwene bw’atukuzanga eisinzizo. 42Yaalondayo bakabona abaali nga baziraku kibi kiboogerwaku, era nga beeghaayo inho okugondera Amateeka ga Katonda. 43Baakola omukolo ogw’okutukuza eisinzizo, baalitoolamu amabaale agaayonoonebwa baagata mu kifo aghasuulibwa ebitali birongoofu. 44Beebuuzagania kiki ekigwaine okukolerwa alutaari ey’ebigheebwayo ebyokebwa eyali emaze okwonoonebwa 45abamaghanga agandi. Baasalagho okugimenhagho erobe kubavumaganianga buli kaakyeire. Kale baagimenhagho, 46amabaale gaayo baagata mu kifo ekirungi ku lusozi oluliku eisinzizo, gakuumirwe agho okutuusa omulanzi lw’aliidha n’asalagho eky’okugakolera. 47Agho baaleeta amabaale agatali mateme gaaku nga bajiira ku mateeka ga Musa, baazimba alutaari empyaka ng’efaanana n’ere enkaire.4:47: Kuv 20:25; Ma 27:5-6 48Bwe baamala ekyo, baalongoosa eisinzizo munda ni ku ngulu, baakola n’omukolo ogw’okutukuza empya dhaalyo. 49Baakola ebintu ebitukuvu nga biyaaka ebikozesebwa mu kusinza. Baaleeta ekikondo eky’entaala, ni alutaari eniokezebwaku obubbaani, n’emeeza kwe bata emigaati egigheereibwayo eri Katonda, baabita mu isinzizo. 50Baaniokeza obubbaani ku alutaari, baakunaania n’entaala edh’oku kikondo, olwo mu isinzizo mwaba nga mulimu obutangaavu. 51Baata emigaati ku meeza, baataagho n’entimbe, olwo baamaliriza omulimo bukalamu.
52Kwali ku nkyo inho ku lunaku olwamakumi abiri n’eitaanu olw’omwezi ogwomwenda ogwetebwa Kisilevu, mu mwaka ogwekikumi n’ana n’omunaana (148)4:52-54 mu mwaka ogwekikumi n’ana n’omunaana (148): Ogwo nga n’omwaka ogwekikumi n’enkaaga n’ena (164) nga Kurisito akaali kwidha.. 53Baasituka, baaja baaghaayo omusengo ku alutaari eyo empyaka, ng’amateeka bwe galagira. 54Ku lunaku lwene olwo, lwe gwaghera omwaka kasookanga abamaghanga agandi boonoona alutaari ere enkaire. Kale baayemba enhembo nga bwe bakubiraku entongooli n’ensaasi, eno nga bwe bafuuyiraku n’endere. Olwo baaghaayo ye Musengwa alutaari eyo. 55Abantu boonaboona baakuba amakiryaivu, era baakutama n’ebyeni byatuuka ku itaka. Baasinza Katonda ow’omu igulu nga bamusaaka olw’okubagha obughanguzi. 56Baamala enaku munaana nga bali kukola omukolo ogwo ogw’okwiramu okutukuza alutaari eyo, egheebweyo ebe ya Katonda. Baaghaayo ye Musengwa ebigheebwayo ebyokebwa nga basangaavu, baaghaayo n’ebigheebwayo olw’okumusaaka n’okumwebaza okubawonia. 57Baatimba engule edha zaabu n’engabo emberi w’eisinzizo, baazimba buyaaka emiryango n’ebisenge bya bakabona, baabitaamu n’endhigi. 58Abayudaaya abo baasagamba ebitaloodheka, beerabira n’okuswala abamaghanga agandi kwe baali babaleeteire. 59Agho Yuda yaisania ni baganda be ghalala n’Abaisiraeli boonaboona abaaligho nga beesoloiza, yaabisa ekiragiro ati buli mwaka ekiseera ekyo lwe kinaatuukanga, enaku omunaana edh’okwiramu okutukuza alutaari eyo dhiidha kukuzibwanga n’ekibinuko, okutooleranga n’olunaku olwamakumi abiri n’eitaanu olw’omwezi ogwetebwa Kisilevu.
60Agho baazimba ebimante ebireeyiriri n’ebituuti ebirengererwaku ebigumu okwezunguluza olusozi Sioni, olw’okuziyiza abamaghanga agandi okwidha kabiri okutyankirira eisinzizo n’ebintu ebiririmu. 61Yuda yaataayo enkambi ey’abaisirukale okukuumanga olusozi olwo. Yaazimba n’ebimante okwezunguluza ekibuga Bethizuri, abantu basobole okuba n’ekifo eky’okwewogomamu, ere okulingiriza Idumea.